Occidental Hotel (actualmente Barcelo Hotel) ta negoshando cu e grupo Canades interesa pa opera ex Aura Casino. Bon Dia Aruba a haya sa cu finalmente nan lo a firma un acuerdo.
Den e ultimo fase aki, Mediador di Gobierno no ta directamente envolvi den e negociacion aki entre Occidental Hotel (Barcelo Hotel) y e operador nobo.
E otro parti tin di haber caminda e abogado di FTA representando un grupo di alrededor di 44 trahado y abogado di e hotel ta sinta hunto pa atende cu e derecho di e trahadonan.
Mediador di Gobierno, sr. Anselmo Pontilius a declara na e matutino aki cu ainda nan no a mira e contenido di e acuerdo aki entre gerencia di hotel y operador di casino. Ya cu si ambos parti a yega na un acuerdo pa opera e casino, e segunda parti lo tin di haber cu e parti di e derecho laboral di e trahadonan.
Manera el a yega di expresa caba, e punto di salario retroactivo fei december ultimo cu Aura casino a cera su porta, cu ya a bira casi 7 luna, ta ainda e ta un punto di discusion entre FTA y e operador nobo.
Mediador di Gobierno ta spera cu e siman aki lo por haya mas bista riba loke e dos partidonan lo por yega na dje. Si tin algun punto di salida na final FTA lo tin cu presenta esaki na tur e trahadonan.
Negociacion
Abogado di ambos partido ta tratando cu otro actualmente e partinan legal. Pues si ta corecto cu si finalmente diahuebs ultimo hotel a firma cu un operador nobo di e casino, ta pa prome biaha -despues di un proceso largo- cu berdad tin algo cu lo duna un poco di claridad na e proceso aki. E echo cu tin un grupo interesa pa opera e casino ta trece hopi posibilidad y speransa pa e trahadonan actualmente.
Sinembargo ta keda den debate e cantidad di trahadonan cu e operador nobo lo tuma den nan servicio. E operador aki a yega di bisa caba cu nan no por tuma tur e 44 trahadonan pa motibo cu espacio di e casino a bira mas chikito. Pero di otro banda ta pendiente e parti di e salario atrasa den cual legalmente cualkier operador of dunado di trabou cu ta drenta nobo, ta carga e responsabilidad ey.
Mediador di Gobierno ta spera cu ambos parti, esta FTA y gerencia di hotel, lo sa di supera nan diferencia y e ta spera cu e siman aki eventualmente nos lo por tende mas detaye si berdaderamente FTA lo por yega na un acuerdo cu e operador nobo ariba e condicionnan y e cantidad di trahadonan cu nan lo tuma, y con lo sigui aki pa dilanti.
Si nan por yega pronto na un acuerdo riba e cantidad di trahadonan cu nan lo tuma na servicio y si nan lo por yega na un acuerdo riba asunto di salario, e casino mes no ta cla pa drenta den un operacion inmediatamente pa motibo cu nan tin ainda cu acomoda e casino. Ta hopi cambio nan tin cu haci y e cambionan aki nan ta calcula cu lo por dura dos luna.
