Occidental Hotel a wordo cumpra pa e cadena di hotel Barcelo. Pero siman pasa dia 27 di october empleadonan di benta y mercadeo a tene un walk out mustrando nan mal contento. Ayera un biaha mas nan a bin hunto pa sigui mustra cu nan no ta contento con cosnan ta andando, specialmente den e parti cu algun di nan no a cobra nada. Gerencia a bisa empleadonan cu no tin mas areglo di pago.
“Tin un problema basta grandi aki nan y awe el a yega su final,” Sr. Rudy Richardson, ehecutivo di benta di Alegro Vacation Club/Occidental Vacation Club a indica. Desde cu Barcelo hotel a cumpra Occidental Vacation Club un guera a inicia entre e doñonan nobo y e departamento benta y mercadeo di time share. Prome cos cu nan a haci ta saca e departamento for di lobby y hinca nan den un skina, di cual Sr. Richardson a haya cu esaki ta e prome paso pa afecta nan entrada. Despues nan a cuminsa un guera cu e parti di bendedonan, unda cu nan a wordo saca for di nan oficina di cual tabata tin tur e materialnan cu nan tabata tin mester y hinca nan den un oficina chikito cu 4 mesa so, no tabata tin airco. Basicamente nan a down size e departamento aki di cual ta algo inadecuado pa nan por funciona debidamente.
E cantidad di tour a baha, e calidad di cliente a cuminsa baha y logicamente nan entrada tambe a wordo afecta. E doño di e compania Sr. Luis Nanun hunto cu su man drechi aki na Aruba Sr. Carlos Pacheco, a splica nan riba e situacion cu ta andando. “Nan a splica nos bon cla, cu tin un problema cu e inventario,” Sr. Richardson a indica. “Nan tin e inventario. Prome nan a bisa cu nan tin e inventario te di dos kwartaal di 2016. Djey nan a cuminsa bisa nos cu no tin inventario te cu januari. Ora cu nos a bay prensa dos siman pasa, nan a hinca nos den un aula un tiki mas grandi y un tiki mas adecua” el a sigui bisa.
Punto cardinal
E punto cardinal ta cu e mercadeo no ta funcionando manera e tabata prome. E team di mercadeo no ta contento cu e trato, ya cu nan no por bay mas den lobby, no por bay mas banda di beach y tambe nan a wordo bisa bon cla cu e doñonan nobo no kier e division di time share, no kier e departamento di benta y mercadeo eynan. Asina nan a dicidi di bay busca un abogado pa busca nan derecho laboral.
No lo wordo paga
Prome e empleadonan a wordo bisa pa e gerencia cu nan no lo haci e cos aki un problema y nan lo wordo paga pa loke ley ta prescribi. Na diferente ocasion nan a keda papia cu otro y awor cu ta casi 5 siman e empleadonan a ricibi un noticia nada agradabel. E abogado a duna e gerencia te cu dia 31 di october pa yega un areglo cu e empleadonan, pero nan a ricibi nan contesta ayera mainta 6 di november. Durante e encuentro aki, nan ta haya sa cu no lo tin pago, cu no tin areglo mas.
Nenga oferta
E doñonan nobo a laga sa cu nan lo bay Departamento di Labor y retira e empleadonan di departamento di benta y mercadeo. Esaki ta loke nan a wordo bisa, despues di tabata tin caba 3 oferta riba mesa. Pero awo tur oferta cu tabata tin riba mesa rotundamente e gerencia a nenga.
Prome nan a bisa caba esunnan cu kier pakete por acerca nan pa asina haya uno. Segun Sr. Richardson, tres di su coleganan a comete e eror aki y a busca e pakete. Di e team aki tres di nan a haya e pakete cu e hotel a ofrece cu pa Sr. Richardson ta uno chiripero. E pakete cu a wordo ofreci ta loke e hotel kier paga e empleado, el a comenta. Esunnan cu no a tuma e pakete, a dicidi di busca nan derecho. Nan a yega tres biaha na un oferta y tabata bayendo pa e di cuater, pero esaki no a sigui. Pa e motibo aki Sr. Richardson ta bisa cu esun encarga, esta Sr. Carlos Pacheco, ta di hopi mala fe. “E compania aki y e doño cu a bin dos siman pasa papia cu e team, Luis Nanun, nan tin hopi mala fe pa haci riba e teritorio Arubano desde 1990 te aña aki mas di 100 miyon dollar. Awe bo ta trata nos hendenan manera cacho. Trato nos manera nos no tin dignidad,” el a bisa.
No a cobra
Dia 5 di november e trahadonan mester a cobra nan ultimo kinsena, di 16 pa 31 di october. Varios di nan a cobra cero florin, esunnan cu no a bende a cobra salario minimo. P’esey dia 27 di october nan a bin pafo unda cu e abogado a bisa e gerencia cu nan tin di paga e trahadonan riba e salario averahe mirando e situacion laboral, mirando cu no tin un operacion di benta y mercadeo. E motibo cu no tin un operacion di benta y mercadeo, ta bin pa motibo cu e doño nobo no ta interesa den e division di time share.
No tuma pakete
Un otro cos cu e empleadonan kier hinca den contexto ta, cu nan a wordo bisa cu inventario ta hopi limita. Nan tin inventario di studio so, y esaki kiermen cu entrada di e trahadonan lo baha pasobra esaki ta mas abou. Sr. Richardson a indica, cu Sr. Carlos Pacheco y Sr. Luis Nanun a bisa nan bon cla, cu si nan no tuma e pakete chiripero e trahadonan aki por wel di muri di hamber. P’esey dia 6 di november contenido di su palabra a wordo poni. Nan no a paga riba e averahe, nan a nenga tur negociacion cu e abogado y awo nan a bista ta basta. E empleadonan aki kier pa henter Aruba sa di e mal trato di e hotel Barcelo. Tur esunnan cu ta pasando den e situacion aki ta mas o menos 30 trahado y ta traha full tempo. algun di nan tin 1 aña den servicio, 5 aña, 10 aña incluso un di nan tin 31 aña.
