Desde varios dia esnan cu ta bay direccion Sero Patrishi y Paradera via e rotonde na Sero Patrishi, mester busca un ruta alternativo pa yega nan destino.
Segun informacion haya di DOW, banda di e rotonde ta cobando un canal pa guia awa di yobida, cu tabata yena y keda para riba caminda un poco pabao di e rotonde, via un canal bao tera te na e rooi cu ta cruza Watty Vos Boulevard y cu ta sigui den direccion di Rooi Manonchi. Di e manera aki e compania responsable pa construccion y mantencion di e ringweg mester percura pa e problemanan di exceso di awa keda resolvi.
Segun DOW, mesun solucion lo keda aplica na otro ‘bottleneck’ cu tin cu exceso di awa di yobida, por ehemplo na Ponton y riba e Boulevard entre Ponton y Bushiri, unda regularmente por a mira mitar meter di awa den caso di yobida fuerte, cu tabata haci e parti aki intransitable pa autonan abao. Ta di spera cu e medidanan aki resulta suficiente pa resolve e problemanan aki definitivamente.
