ORANJESTAD – E problema di consumo di droga, den decada aki ta constitui un di e principal preocupacion riba isla y na nivel mundial.

Ta existi studionan cu ta bisa cu e problema di droga tin di haber cu problemanan psicologico, por ehempel autoestima baho, depresion, problema di conducta, asina tambe conflicto cu e rol sexual di un persona, y esey ta trece como consecuencia e consumo di diferente substancia y alcohol.

Ayera den oranan di anochi, a ser presenta na Cas di Cultura e obra di teatro “Ruta di mi sombra” cual a ser skirbi pa Jarmine Acosta di Fundacion Rosea Cultural, cu e fin di trece un mensahe pa e comunidad di Aruba tocante e topico di consumo di droga.

Sra. Marcia Dirksz miembro di Fundacion Rosea Cultural y cu ta tambe ta forma parti di e obra a splica cu den dje tin e topiconan di droga, abuso mental, abuso fisico, abuso sexual, dependencia.

Fundacion Adopt an Addict Aruba a pidi colaboracion pa Fundacion Rosea Cultural pa nan lo por colabora hunto pa trece dilanti den e comunidad y pa obtene fondonan.

E obra di teatro a ser enfoca riba e problema di caya y a ser presenta na Festival di Mascaruba, despues sr Audrey a tende cu e obra tin di haber cu caya y problemanan di droga, el a acerca pa e fundacion pa skirbi e obra den cuadro di e personahe di Nataly Tromp, un di e prome cliente di Fundacion Adopt an Addict Aruba.

Nataly Tromp tabata un persona hopi conoci na Aruba den caya, e tabatin un relacion cu Sky y for di e relacion ey a naci un yiu homber, ora e Fundacion Adopta n Addict Aruba a yuda pa saca Tromp for di riba caya y el a ser traslada pa Santo Domingo pa su tratamento el a haya e noticia cu tabatin e malesa di cancer.

E obra di teatro “Ruta di mi Sombra” basa riba e bida cu e personahenan di Nataly (Natania) representa pa e actriz Judith Werleman, y Sky (Jonito) representa pa Danny Marquez,tabatin riba caya, hunto cu e personahe di Sombra representa pa sra. Marcia Dirksz cu ta e representacion di e mama di Natania, un persona hopi importante den su bida y cu ta forma parti di e ‘cataclismo’ den su bida.

Manera sra. Marcia Dirksz a splica, nan a acepta pa traha cu e Fundacion Adopta an Addict pa motibo cu nan no ta traha cu subsidio, “nan ta hungando un rol hopi importante den e comunidad”, p’esey mes e Fundacion Rosea Cultural a colabora pa nan haci e obra pa obtene fondo y pa haci un ‘yamada di advertencia’ pa e comunidad.

“Tabata un presentacion di lo cual bida di caya ta ocasiona, algo cu no ta bunita, ta algo cruel y ta un constante abuso”, Sra. Marcia Dirksz a expresa.

Di mesun manera sra. Marcia a comenta cu e obra tambe tabatin e parti unda e nan ta duna e mensahe pa e comunidad cu ta bisa ‘si bo kier cambia, si bo kier Sali, tin caminda pa cana, tin speransa’.

Pa finalisa, sra. Dirksz a duna di conoce cu e obra ‘Ruta di mi sombra’ a wordo aproba pa minister di Enseñansa, Armando Rudy Lampe pa un presentacion na Cas di Cultura den e siman aki pa e studiantenan secundario, pa asina e muchanan lo por wak y experencia kico e ta, lo bay ta un presentacion un tiki diferente pa motibo cu nan mester adapta pa e muchanan y tambe lo tin un seccion di informacion y preguntanan pa e muchanan.