Ayera tardi durante un conferencia di prensa e ekipo di Cas di Cultura a anuncia e presentacion di e obra di teatro internacional “White Rabbit Red Rabbit” dia 13 di maart 2022. Robert Anjie, business developer & events manager, Lotte van der Heuvel, client & project coordinator hunto cu e artista di e obra teatral Jair ‘Buddy’ Versprey, a splica un poco tocante e obra aki y kico e concepto di esaki ta.

Anjie a splica cu White Rabbit Red Rabbit ta un obra teatral interactivo, explosivo y internacional pa celebra teatro en bibo aki na Aruba y henter mundo. Segun el a menciona cu Cas di Cultura tin un partnership cu Aurora Nova, un agencia internacional di booking situa na Berlin y nan a ricibi e licencia di e obra aki pa mustra cu teatro t’ey back despues di un temporada fastioso door di e pandemia COVID-19

Van den Heuvel a cota un poco mas di e autor di e obra aki, cu ta Nassim Soleimanpour. Soleimanpour ta un refugiado y activista Irani cu no tabata por a sali di su pais. Pa motibo ey Soleimanpour a skirbi e obra di teatro aki pa asina e obra biaha rond mundo den su nomber. “See where theater can take you with or without a passport” (Wak unda teatro por hiba bo cu of sin un paspoort).

“Buddy” Versprey ta e artista cu lo actua e obra di teatro aki. “Locual cu mi sa ta nada, mi no sa nada. E ta bay bira echt un aventura”, Versprey a bisa. Segun el a splica e idea, e contexto di e obra ta cu unabes e actor subi escenario e lo haya un envelop y el lo lesa locual tin den e envelop y actua esaki. E actor no sa kico ta wordo poni den e envelop, e no sa kico mester wordo haci, nada.

“Locual mi gusta ta un reto, dus manera cu mi a haya e invitacion aki mi a bisa si. Mi a duda un poco pasobra ta mi prome biaha haciendo algo asina bunita, e ta mi prome biaha riba un stage pero haciendo algo diferente y semper mi tabata kier actua y esaki mi ta supone ta mi prome oportunidad. Mi ta sumamente emociona”, Versprey a expresa.

El a remarca cu locual el a gusta di e obra ta cu e ta un improvisacion. “Locual cu wordo haci e dia ey ta pasobra el a bin for di ami of pasobra e publico, e hendenan cu a bin, a duna mi e idea. Nada no ta pensa, nada no a wordo ensaya kiermen e ta full algo completamente nobo”, el a agrega.

Pa locual ta su preparacion pa e presentacion aki, Versprey a bisa cu honestamente e ta purba di ta autentico. El a remarca cu e no ta bay studia nada, niun tecnica specifico di actuacion. Unico preparacion cu el a haci ta solamente wak un splicacion cortico di otro actornan cu a actua e obra aki caba y con nan experiencia tabata. “Pero esey te, mi no tin ningun preparacion. Mi ta kere di parti di Cas di Cultura mi ta kere cu nan kier pa esey ta e idea pa e ta algo hopi mas autentico, hopi mas real tambe”, e a bisa.

Van den Heuvel ta e persona encarga cu e envelop secreto cu Versprey lo mester habri riba stage, e tin conocemento di locual ta bay den e envelop y el a splica cu tin algun instruccion cu e escritor a duna. Segun el a sigui splica e autor ta bisa cu ta okay si e actor pega, pero e mester indica esey na e publico, y e autor ta bisa tambe cu mag di agrega algun cos si e actor ta sinti cu e ta actuando y e mester haci esey e por hacie, pero e tin cu bisa tambe cu esey ta algo agrega di su mesun parti.

E obra aki, White Rabbit Red Rabbit, a wordo traduci den 30 idioma y a wordo actua mas cu mil biaha pa mas di mil actor. Esaki pasobra un actor no por actua e obra aki dos biaha door cu e ta familiarisa caba cu e concepto y kico lo pasa.

Ariba e mesun anochi di e presentacion di e obra di teatro tambe lo tin exhibicion di arte di dos artista local y pa un pakete special personanan cu bay wak e obra di teatro lo por disfruta tambe di e exhibicion aki como parti di Aruba Exhibits.