Durante weekend a tuma luga e di dos edicion di Aruba Art Fair. E feria di arte den caya principal di San Nicolas a mira un acogida grandi durante su tres dianan, cu diferente atraccionnan artistico den henter area di San Nicolas.

Tabatin muralnan riba diferente edificionan, un version di obra Tactus di Natusha Croes ahusta pa e feria, Prins Bernhard Cultuurfonds tabata ocupa e ex edificio di douane, un galeria di arte bou un igloo dilanti Wintergarden, obranan di instalacion traha na diferente sitio pa entre otro Elvis Lopez y Romelinda Maldonado y na delaster un exposicion di Academy of Fine Arts & Design Aruba (Afada).

Sin importa unda bo tabata den e area di mainstreet, bo lo a hole e cuminda cu tabatin na benta na cada skina di e luga. Den e edicion di awe nos lo elabora riba e obra di e academia.

Concepcion di e obra
Kevin Schuit hunto cu Glenda Heyliger a lidera e proyecto di e aña academico 2017-2018 di e academia Afada cual tabata encera traha un concepto a base di curpa humano trahando cu e tema di e diferencia entre e individual y e colectivo. Sr. Schuit ta conta nos mas tocante e proyecto: “Prome mi no tabata sa specificamente kico pa traha riba dje pa e Art Fair, pero nos tabatin 2 siman den e clase di introduccion pa traha riba e concepto cu nos lo presenta na San Nicolas. Esaki riba su mes a bin cu cierto retonan pasobra e trabounan mester a tuma luga na un sitio specifico. Specificamente si e evento pa cual nos ta traha e obra no ta unda bo ta opera normalmente y e evento ta 2 luna leu. Esey a hacie hopi dificil pa nos pre package e proyecto.”


Sinembargo sr. Schuit a splica cu e idea mas aleu ta pa duna e studiantenan e espacio pa por experimenta y improvisa cu nan concepto. Den esaki sr. Schuit ta kere cu nan a logra cu hopi exito pa introduci e studiantenan na kico un obra di arte ta encera y kico tur ta bay den dje.

Aunke e tabata dificil pa por maneha e expectativanan y formato cu a surgi entre director di Afada Glen Goddijn y e evento mes mientras ta tene cuenta cu e studiantenan, sr. Schuit a expresa cu esaki a pone pensa riba un tema cu por trece tur cos hunto. “Despues di dos siman mi tabata sinti cu nos no tabatin nada pa mustra pe trabou cu nos a haci, entre otro pa via di expectativanan cu mi hefe ta pone riba mi. Mi ta compronde cu nan ta necesario pero como artista limitacion por ta tanto algo negativo como positivo.”

E manera con a bin cu e concepto tabata casi por coincidencia, pero hopi biaha asina e cos ta bay den mundo di arte. “Mi ta kere tabata un buki cu mi a lesa di un escritor Hulandes, un novela di genero dystopian di un mundo unda autonan ta humano”, e ta conta nos. Esaki tin hopi relevancia pa nos tempo, segun sr. Schuit, pasobra cyborgs ta birando realidad. No mucho tempo pasa por a mira un inteligencia artificial den un curpa di robot cu por a te hasta expresa emocion cu su cara.

Apart di esaki e idea di autonan a bin tambe pa via di e cultura cu tin na nos isla pa drecha auto. “Aruba ta un isla di auto, ironicamente aunke nos ta un isla chikito”, e artista a expresa. Tambe tin un conexion fuerte cu a bin pa via di San Nicolas y e refineria. Mi a sinti un conexion entre Motor City y e trabou na e scol. Asina e pensamento a surgi di compara pieza di auto cu un organismo humano.

“Como hende ora nos ta traha riba ciencia of tecnologia nos ta bas’e riba naturalesa. Si bo wak un avion e ta tuma inspiracion di parha por ehempel. Esaki ta mustra cu ciencia y tecnologia ta algo hopi natural, di manera di bisa.”

Den e contexto di e lesnan di introduccion pa e studiantenan, e idea tabata con pa pensa riba e grupo y kico esaki ta representa. Asina e artista a bin realisa cu e grupo mes ta un auto, cu cada studiante representando un pieza. Tin studiante ‘cu ta mas manera un stuur wiel, por ta abo ta mas manera taira pues bo tin grip, cada un tin su rol pa hunga den e grupo’. Esaki tabata algo bon pa e les di introduccion pasobra e studiantenan mes por a cuestiona ken nan ta y kico nan ta contribui na e grupo.

Pues sr. Schuit a dicidi pa djis tuma un auto y bay drecha esaki. “Nos a bay Daltra y mi a mira yen di organismonan bibo cu tabata stima pero despues di un tempo a stop di sirbi. Pues e doñonan a stop di worry cu nan.” E idea tabata pa laga un curpa morto y bandona manera un auto bieu biba bek.

Tur hende a contribui cu ideanan y sketch mientras tabatin algun ehercicio manera ‘si bo o ta un pieza di auto cua bo lo ta?’. E parce un pregunta ridiculo pero esaki por wordo mira mas abstract, pasobra segun sr. Schuit esaki por wordo aplica pa cualkier organisacion manera un compania, sociedad, un mashin, etc.

E studiantenan di Afada lo sigui y ta sigui traha riba e auto, segun sr. Schuit. Esaki ta algo cu e ta contento di dje, pasobra nan no a caba e obra completamente. “Pa hende cu ta cana rond bo ta mira cu cada dia e obra ta cambia, al contrario di hopi obra di arte cu ta wordo presenta.”

‘Mi kier ta liber como artista’
Pa sr. Schuit personalmente e proceso di arte ta mas interesante cu e producto final mes.
Aunke e lo por ta un tiki intimidante pa presenta algo cu no a wordo caba hunto cu yen producto final, esaki ta algo cu ta cambiando den mundo di arte mes tambe. “Na e feria di arte mes esaki tin beneficio cu ora hende cana ariba bou varios biaha nan no ta mira e mesun cos”, e artista a expresa.

Como artista na Hulanda den pasado sr. Schuit a experiencia cu tabatin un diferencia entre negoshi y arte. “Mi tabata mira amigonan di mi ta haci cosnan cu ta popular of cu ta bende pa nan por sobrevivi.”
Sinembargo e no ta desmenti cu e hendenan aki ta traha riba proyecto interesante, solamente ta e manera con esaki ta pasa no ta con sr. Schuit kier hacie su mes.

“Mi ta un persona mas bohemio ora ta trata di arte. Mi no ta purba fabrica nada, solamente uzando mi sintimento natural. Pero ora bo ta un artista mi ta kere bo no por keda contra algo mucho fuerte tur ora. E ora ey bo ta gaña bo mes. Mi ta haya cu mester tin facilidad pa cambio.”

Den sociedad esaki ta dificil pasobra segun sr. Schuit hende semper lo purba di conoce bo pa cierto cos, nan lo purba label bo.