Obispado di Willemstad y Comision di Mayor di Colegio Arubano, OCCA, a yega na un convenio, un “Memorando di entendimento” pa trata di logra un salida pa e conflicto cu ta reina na Colegio Arubano. Esey ta principalmente e conflicto encuanto e maneho cu ta hibando na e scol, cu a conduci na retiro recientemente di e rector, drs. Michella van Loon.
E convenio ta significa un cambio remarcable den posicion di OCA, cu recientemente a nombra e actual presidente ainda como nan representante.
Ambos partido ta reconoce den e documento cu e scol ta pasando den un crisis administrativo, esaki particularmente despues di e salida di e rector, y tumando na cuenta tambe e alegacionnan expresa entre otro pa mayor y ex-alumnonan. Obispado ta señala cu den un carta di 22 di mei 2020 a pidi e directiva pa, den interes di alumno, docente y mayornan, tambe teniendo cuenta cu e plazo di nombramento, pa no keda como directiva y pa no alarga e plazo a traves di nombra nan mes pa otro periodo di 3 aña. Sin embargo, segun Obispado, directiva no a presta atencion na e peticion aki. E convenio ta bisa tambe cu OCCA no tabata na altura di e peticion di Obispado di 22 di mei 2020, y por lo tanto a firma e carta di 27 di mei 2020 pa sostene e nombramento di Robert Croes como miembro di OCCA den directiva di SMOA.
Awor, consciente di e escalacion di e problemanan entre directiva, docente y mayornan, obispado y OCCA, cu segun estatuto ta e uniconan (*externo; red.) competente pa nombra miembro den e directiva di SVOA/SMOA, ta haci un apelacion na e directiva actual pa retira inmediatamente, “pa asina crea e posibilidad pa un directiva nobo tuma posicion, unda cu un maneho administrativo renoba cu vision pedagogico y un concepto di tarea obhetivo, por restaura e trankilidad na scol y sigura e cooperacion y mehoracion di ambiente entre directiva y cuerpo di docente.” Tambe ta haci un apelacion na directiva di SMOA pa detene e proceso di reclutamento y seleccion di un rector pa Colegio, te ora e directiva nobo di SMOA a tuma posicion.
E convenio, fecha 16 di juni 2020, a ser firma pa pastoor Andres Makowiec, vicario episcopal na Aruba, y di banda di OCCA pa drs. Giovanni Koffy.
Nota di Redaccion:
E acuerdo aki ta bisa cu ta Obispado y OCCA so por nombra miembro, pero esey ta como partner externo. Mientras tanto a cambia e estatutonan, den cual a stipula cu por tin 7 miembro den e directiva, di cual 5 por ta nombra pa ‘cooptatie’, es decir, cu e miembronan ya presente den e directiva ta nombra miembro segun mayoria di e directiva ta dicidi. Asina recientemente lo a keda nombra algun miembro nobo, cu awor ta confronta cu e peticion di e dos organismonan cu por nombra un miembro cada un, pa nan tambe renuncia. Registro di Fundacion na Camara di Comercio dia 17 di juni 2020 sin embargo no ta mustra cambio ainda den e directiva. Tambe tanto Obispado y OCCA ta pidi directiva di SMOA pa no continua cu e proceso di selecciona un rector nobo, pa cual e periodo di solicitud a termina dia 6 di juni ultimo. Asina leu cu ta conoci, no tabatin envolvimento ainda di docente y personal administrativo den e proceso di seleccion, mientras cu un di e conrectornan tambe lo a entrega su retiro.
