Mediante un comunicado di prensa, Obispado di Willemstad a informa cu Iglesia Catolico nunca a condena carnaval y ta sostene expresionnan artistico, cual ta inclui participacion den carnaval. E tema aki ta den combersacion intenso den comunidad desde november aña pasa cu participacion di Pastoor Jairo Maduro den Caiso y Soca Monarch y aworaki den carnaval.
Hopi a critica e decision di e pastoor pa participa den carnaval, pero di otro banda hopi a defende tambe y hopi a cuestiona si esaki ta permiti y kico Obispado tin di bisa. Finalmente Obispado di Willemstad a vocifera nan sosten pa carnaval, pero ta urgi pa drecha e degradacion cu tin den e celebracion aki pa medio di baile- y disfraznan indecente y cancionnan cu letranan inapropia.
“E posicion Catolico no ta cu carnaval ta malo riba su mes. E tumba, calypso, soca, eleccionnan di Prins y Pancho, Rey y Reina, trahenan creativo cu hopi biaha ta keda asocia cu temporada prome cu cuaresma, tin cu yuda nos mantene presente cu tin un tempo pa diberti na un manera sano y un tempo di reflexion profundo. Den carnaval a keda demostra e capacidad artistico di nos hendenan pa medio di creatividad cu a keda presenta tanto pa disfraznan, roadpiece y carosa,” e comunicado ta remarca.
E Obispado ta sigui splica cu Iglesia Catolico ta sostene arte y ta encurasha pa yuda, specialmente e muchanan, pa desaroya e capacidadnan aki, sin importa den ki forma of manera e expresion aki por bin.
E Obispado ta remarca cu Catoliconan cu ta participa den carnaval no mester lubida ariba kico realmente carnaval mester ta y mantene un bon comportacion moral durante e periodo di celebracion cultural aki.
“Obispado di Willemstad ta indica cu Evangelisacion no ta nifica solamente resa pa otro y ta testigo di balornan autentico. E ta nifica tambe ta visibel den e aspectonan cultural aki, tumando risiconan prudente den nomber di Dios ofreciendo nos presencia, bida y comportacion cu ta yuda halsa norma- y balornan di nos comunidad,” e comunicado a finalisa.
Relaciona na e publicacion di e comunicado aki, Pastor Jairo Maduro pone ariba rednan social pa “hende stop di keha cerca Obispo,” referiendo na esnan cu no ta di acuerdo cu su participacion den carnaval y cu ta manda kehonan cerca Obispo tocante esaki.
