Obheto briyante den shelo di Aruba a causa inkietud pa algun hende tocante fin di mundo

Diasabra ultimo den oranan di anochi, casi 8or specificamente, hopi hende a mira un luz cu tabata atravesa e shelo di Aruba, riba rednan social a cuminsa bay viral potret y videonan mustrando e fenomeno, un fenomeno cu segun Space and Nature Aruba Foundation a señala, esaki por trata di e restonan di e reciente lansamento di Starlink dia 12 juli ultimo.

E obheto briyante a ser mira den e shelo di Aruba y di otro islanan tambe manera Corsou, e tabata mustra colornan blanco, geel y berde. Pa esaki, Space and Nature Aruba Foundation a bisa cu den teoria esaki por trata di e restonan di e reciente lansamento di Starlink e cual a tuma luga dia 12 juli ultimo cu a presenta un fayo segun loke SpaceX a indica.

“E satelitenan ta bay kima den atmosfera,” e mal funcionamento a laga den carga di e rocket 20 mini satelite di Starlink v.2 incapaz di yega te nan orbita previsto. Ta di spera cu e satelitenan lo cay riba Tera. Si esey lo ta e caso, por drenta mas restonan den atmosfera pa e siguiente dianan.”

Esaki, segun e compania mes, no tin motibo pa panico, pero ciertamente a causa lo contrario. Usuarionan riba rednan social a cuminsa reacciona sigurando como por ehemplo cu “fin di mundo ta cerca, nos ta bendiciona cu e no a cay cerca nos.”

Falcon 9 a despega for di California diahuebs ultimo den oranan di anochi, transportando 20 satelite si Starlink. Despues di algun minuutnan di vuelo, e motor di e etapa superior a faya. Diabierna ultimo, SpaceX a tira e culpa di e incidente pa un leakmento di oxigeno likido.

Ademas, Space X tambe a bisa cu e satelitenan lo bolbe drenta den atmosfera y lo kima. Mas di .600 satelite di Starlink ta den orbita y na e momentonan aki ta proporciona servicio di internet na clientenan di algun di e luganan mas lehano na mundo.

Tambe, por a trata di un asteroide ya cu NASA a emiti un advertencia despues cu a detecta un asteroid yama 2024 NB2 e cual tabata cerca di planeta tera diasabra ultimo 13 di juli.

Sinembargo, astronomonan a detecta e asteroide aki bulando cerca di Tera na Tucson, Arizona biahando na 47,921 kilometer pa ora, aunke ta hopi cerca di Tera, cientificonan ta pensa cu no ta un menasa pa e planeta, segun e website WION a reporta.

Potretnan ta di Space and Nature Aruba Foundation su FB page.