Obhetividad y transparencia dos cos dificil

Practica mester cambia si

Pa cualkier persona cu un trabao normal ta casi imposibel pa sigui e debate politico te den detaye, sacando afo kico relamente ta berdad y kico ta ficcion, o ta mita berdad, y cual di e dos mitanan e tin su dilanti. Esaki lo no bira menos, esey ta e bida politico aki, y otro pais tambe. Como medio di comunicacion ta nos tarea pa busca pa sa kico exactamente ta e asunto y con e ta hinca den otro. Pa nos no tin e posibilidad di bisa: “Laga e cos aki manera e ta, cualkier dia den futuro nos lo cuminsa averigua atrobe.” Esey ta implica si cu hopi biaha nos ta haci pregunta, prome na nos mes y despues na otro, kico ta e caso real. Un trabao dificil pero ta paga nos pesey. Kico asina nos ta topa?

Den e debate tocante e situacion financiero nos ta haya nos cu un discusion interminabel cu pa un parti ta totalmente inutil. Gobierno actual a drenta den di dos mita di november y te cu fin di aña a paga loke mester a paga, y a drenta caha di gobierno loke tabata di drenta. Simplemente nan a cera buki, esey tabata nada mas cu e realidad di semper. Ta den e aña siguiente semper e gobierno nobo ta logra implementa su propio maneho. Na 2009 tampoco niun hende a hinca den nan cabes pa acusa e gabinete nobo cu e caida di economia y finanzas publico tabata nan culpa; tur hende cu un poco realismo sa cu un crisis economico y financiero mundial a afecta nos pais tambe. Pues a cuminsa responsabilisa e gabinete nobo di e tempo ey desde 2010. Suficiente argumento pa pone un banda e ponencia ridiculo cu dia 18 di november tur cos tabata color de rosa y pa su mañan e gobierno nobo a converti esey den un deficit di 137 miyon. Ta incomprendibel cu actual oposicion ta keda insisti den e idiotez aki.

Di otro banda, e minister encarga cu finanzas tambe ta haci su mes vulnerabel cu comparacion cu ta mustra bon, pero no ta duna un bista completamente realistico di e situacion financiero. No ta asina cu actualmente 93 of 91 cent di cada florin ta bay na paga debe. Si ta berdad cu e debenan ta asina hopi, cu den e caso teorico, si nos lo mester paga tur nos debe di un solo tiro, anto esaki lo bay cu 91 of 93% di tur placa gana den e aña particular ey (nos GDP). Esey naturalmente no ta e caso. Loke si ta e caso ta cu nos ta pagando den e ultimo 10 aña so caba mas di 1.600 miyon florin na interes riba debe, sin paga ningun debe, cu ta placa fia pasobra no ta maneha e pais aki debidamente. Den e mesun rosea por menciona cu Aruba su ‘eigen vermogen’ (patrimonio) a surpasa caba Afl. 2,5 biyon den cora, es decir, si nos – teoricamente atrobe – bende tur propiedad cu Pais Aruba tin, ainda nos a keda cu mas di 2.500 miyon florin di debe! Atrobe lo tin esnan cu ta bisa “OK, pero esey ta teoria,” y esey ta berdad. Berdad ta tambe, y esey no ta teoria, cu nos a yega un punto, unda mester hala un linea, y bisa te aki y no mas leu. Y nos lo haya e claridad ey, sea via un presupuesto realistico y un plan di recuperacion, of un intervencion Hulandes cu ta bin haci nos trabao pa nos.

Ta pesey tambe cu nos ta cuminsa haya cierto preocupacion. Si di berdad cos ta asina serio, pakico nos ta mira cierto mal custumber di anterior gobierno(nan) ta bolbe atrobe? Cada pregunta un tiki mas specifico ta haya e contesta cu mester warda rueda di prensa pa haya un contesta. Y tin varios asunto cu no ta aparece mes, ta cu tempo nos ta haya sa. Por ehemplo, cuanto cambio tabatin den diferente departamento o empresa estatal, cu no a ser divulga manera mester ta? Ta nos como prensa mester cana second guess kico ta pasando?

Otro di e mal mal custumbernan ta e mania di sustitui un hefe o director pa un management team, loke pa nos ta haci e pregunta surgi cu si bo ta kita un pa pone tres, anto hunto e tresnan ey mester yena e sapatonan di esun anterior? O ta splica na placa chikito ta ki talento cada un tin cu hunto nan por haci e trabao cu anteriormente un tabata haci? Of ta atrobe regala puesto na simpatisante?

Si ta papia di practica transparencia, loke lo ta carga nos apoyo completamente, hacie anto. Na prome ocasion ya tabata purba sconde e medida encuanto e accijns riba combustible, cu ta algo cu por a bisa nos den nos cara! Mayoria di Aruba a vota pa un cambio, a sabiendas cu e gobierno anterior a ruina nos finanzas publico. Cu gobierno mester di placa anto y cu ta nos tin e carteranan di cual e mester sali, nos tabata sa caba. Pero loke ta e ultimo cos cu mester sucede awor ta trata nos manera mucha chikito.