Obesidad no ta aumenta riesgo di muri di Covid-19

(nltimes) – Na momento di admision den ICU pa coronavirus, pashentnan obeso no tin un riesgo mas halto di morto compara cu hende cu un BMI saludabel, segun investigacion no publica entre 2,600 pashent di Covid-19 den Unidad di Cuido Intensivo bao cuido di 82 dokter Hulandes y investigadonan durante prome mita di aña pasa, Volkskrant ta reporta.

“Unabes ta den ICU, e riesgo di mortalidad di tur grupo ta comparable”, lider di investigacion y profesor di medicina di cuido intensivo na Radboud MC, Peter Pickkers, a bisa. E tasa di mortalidad di coronavirus pa pashent cu sobrepeso compara cu esanan sin sobrepeso den ICU tabata similar, na 25 te 30%.

Sinembargo, peso si tin efecto riba e chens di wordo admiti den ICU na prome luga. Alrededor di 80 porciento di tur pashent di coronavirus den ICU tabatin sobrepeso, segun cifranan di fundacion NICE.

Dokternan ainda no a yega na un conclusion pakico pashentnan mas pisa tin un tasa di admision den ICU mas grandi. Nan sistema immuun no ta mas zwak, manera estudionan anterior a sugeri, segun International Journal of Obesity ta bisa. Un factor decisivo por ta cu pashent obeso tin diabetes mas frecuentemente, loke ta magnifica e impacto di coronavirus.

De hecho, a demostra cu un BMI (Body Mass Index) mas halto den otro malesa ta contribui na un riesgo menor di mortalidad pa pashent den ICU. Esaki ta conoci como e paradox di obesidad. Dokternan ainda ta confundi pakico esaki ta e caso. Un teoria ta cu vet excesivo den curpa ta provee reservanan importante den caso di malesa serio.

Coronavirus ta contradeci e paradox aki. Pashentnan obeso di Covid-19 den ICU no tin tasa di mortalidad mas abao cu pashentnan cu peso saludabel. Na luga di esaki, e probabilidadnan ta casi igual. Investigadonan a bisa cu esaki por ta pasobra e coronavirus ta mara su mes na celulanan di vet. Tehido di vet por e ora ey ehecuta un papel patogenico.

Pickkers a enfatisa cu e descubrimento aki no ta nenga e efectonan adverso di obesidad. E tasa di mortalidad igual entre pashent cu y sin sobrepeso por ta pa motibo cu mayoria di pashent di Covid-19 den ICU tin sobrepeso. Esaki ta nifica cu e cantidad total di morto pa persona obeso ta keda mas halto cu pa persona cu peso saludabel.