(AP)—Un grupo di expertonan global ta proponiendo un manera nobo pa defini y diagnostica obesidad, reduciendo e enfasis riba e metodo di ‘body mass index’ (BMI) controversial y sperando pa miho identifica hende cu mester tratamento pa e malesa causa pa grasa corporal en excesivo.
Bao recomendacionnan publica diamars anochi, obesidad no por ser defini mas solamente cu BMI, un calculacion di haltura y peso, pero combina cu otro medida, manera circunferencia di cintura, ademas di evidencia di problemanan di salud conecta cu peso mas halto.
A calcula cu obesidad ta afecta mas cu 1 biyon hende mundialmente. Na Merca, aproximadamente 40% di adulto ta sufri di obesidad, segun e U.S. Centers for Disease Control and Prevention (CDC). “E meta di esaki ta pa tin un definicion mas preciso pa asina nos por enfoca riba hende cu mester mas ayudo,” segun Dr. David Cummings, un experto di obesidad na e University of Washington y un di e 58 autor di e rapport publica den e journal The Lancet Diabetes & Endocrinology.
E rapport ta introduci dos categoria di diagnosis nobo: obesidad clinico y obesidad pre-clinico. Hende cu obesidad clinico ta cualifica pa medidanan di obesidad, incluyendo BMI, y tin evidencia di problema cu organo of tehido causa pa peso excesivo. Esey por inclui problema cardiovascular, presion halto, malesa di riñon of higra, of dolor severo cronico den rudia of heup. E hendenan aki lo ta eligible pa tratamento, incluyendo intervencionnan di dieta y ehercicio y medicamento pa obesidad. Hende cu obesidad pre-clinico ta den riesgo di e condicionnan ey, pero no tin ningun malesa existente, e rapport ta bisa.
BMI a ser considera pa basta tempo como un metodo incorecto cu por sobre-diagnostica of sub-diagnostica obesidad, cual actualmente ta defini como un BMI di 30 of mas. Pero hende cu un exceso den grasa corporal no semper tin un BMI di 30 of mas, manera e rapport ta nota. Y hende cu un masa di musculo halto—manera atletanan—por tin un BMI halto a pesar di un masa di grasa normal.
Bao di e criteria nobo, aproximadamente 20% di hende cu a ser clasifica como obeso no lo ta cualifica pa e definicion, segun analisis preliminar ta sugeri. Y aproximadamente 20% di hende cu efectonan di salud serio pero un BMI abao lo ser considera awor como clinicamente obeso, e expertonan a bisa.
“E no lo cambia e porcentahe di hende defini di tin obesidad drasticamente, pero e lo diagnostica miho esnan cu en berdad tin clinicamente un exceso den grasa corporal,” Cummings a bisa. E definicion nobo a ser promove pa mas cu 75 organisacion medico rond mundo, pero no ta claro con amplio of rapido esakinan lo ser adopta den practica. E rapport ta reconoce cu implementacion di e recomendacionnan “lo carga costo significante y consecuencia pa e sector laboral.”
Un vocero pa e seguro di salud AHIP, conoci anteriormente como America’s Health Insurance Plans, a bisa “ta demasiado trempan awor pa calcula con plannan lo incorpora e criteria aki den cobertura y otro politicanan.”
