Den un colaboracion entre Openbare Avondleergangen Aruba (OAA) hunto cu Design Academy Aruba ta bay ofrece un estudio na nivel di MBO 4 specialisa den arte y diseño cu ta bay cuminsa na october proximo

E hobennan cu lo participa den esaki e cual ta un estudio di cuatro aña lo haya un diploma reconoci y ta encera cu lo por siña e studiantenan demostra e talento den area aki y ademas tambe lo siña bira entrepreneur pa asina por traha e mesun productonan cu ta diseña.”

“Nos ta relaciona esaki hopi cu turismo y nos sa cu tin hopi tienda cu kisas ta bende artefacto, entre otro pa turista, y ta algo cu nos mesun hendenan den futuro ora bo pasa door di e opleiding aki cada conciudadano lo por bira exitoso sea den un trabou of sea como entrepreneur,” minister Croes a señala.

E proyecto aki ta coordina cu un scol na Hulanda specialisa den materia aki unda ta tene cuenta cu tur aspecto, tanto local como internacional pa studiantenan cu logra registra y sigui e cuatro aña tin e garantia di haya un diploma acredita.

“Pa mi como minister di Enseñansa mester bisa cu pa prome biaha den historia riba e nivel di MBO 4 ta cuminsa cu un opleiding di Art and Design riba e nivel aki, pa dia 7 y 14 di september ta bay tin e toelating unda ya caba a cuminsa propaganda esaki riba Facebook di OAA y e nan website unda por haya tur informacion,” el a sigura.

Tambe minister Croes a declara cu nan lo percura pa pone fondonan disponibel pa e siguiente añanan di e proyecto aki pa asina por drenta den un “mercado cu ta hopi den necesidad.”

The Foundation International Design Academy Aruba ta lansa un design studio y academia den curason di Aruba. Diseño grafico, diseño di producto y educacion ta loke nan ta bisa, nan pasion. Nan ta spera di cuminsa activamente den luna di october na Oranjestad y cu actitud habri y colaboracionnan fuerte tanto na nivel local como internacional. Como meta nan kier haci impulso di Aruba su industria creativo, eleva arte y cultura Arubano na un nivel mas halto.

Durante e educacion e studiante ta siña bira un diseñador grafico y trahado di borchi profesional. For di diseña logo y materialnan di marca te na traha publicidad y grafieknan digital cu despues por print riba T-shirt, glas riba ceramica of crea pa websitenan etc. Tambe lo bo siña domina diseño di software siguiendo tendencia y tecnologianan. Usa diferente mashin innovativo manera laserprinter y ceramic-printers. Pero tambe siña diseña mas sostenibel posibel.

E programa di Arte & Diseño ta dura cuater aña y ta reparti riba cinco dia pa siman: dos anochi y tres dia practico durante dia. E structura aki ta provee ​ tanto e conocemento teoretico como e habilidadnan practico cu bo mester pa cuminsa e carera den e industria creativo.

Banda di tur e materianan di diseño lo tin tambe materianan manera ‘Rekenen, Nederlands, Engels, Papiamento, Loopbaan & burgerschap’. Despues di e educacion aki e studiante lo por sigui un HBO opleiding na por ehempel, Hulanda of cuminsa un carera laboral.

E carera aki ta abarca tur industria, ofreciendo oportunidadnan sin fin pa traha riba proyectonan diverso. Sea ta diseña pa agencianan di publicidad, companianan di tecnologia of clientenan freelance. E ta tocante comunica mensahenan efectivamente pa medio di e diseñonan unda tin e poder pa inspira, informa y influencia publico.

Pa loke ta trata e parti di OAA, Carlos Martinus a señala cu ta trata di dos anochi cu lo introduci e materianan generico y e resto ta wordo duna pa Design Academy Aruba.

Ya caba nan tin 21 persona registra y nan ta kere cu esey ta bay aumenta den proximo dos of tres siman, pero solamente tin luga pa 15 candidato so pa motibo cu Martinus a señala cu esaki ta trata di un proyecto piloto y ta prome biaha cu nan ta haciele: “nos tin miedo di cuminsa mucho grandi y p’esey laga nos cuminsa cu 15 pa nos por zorg pa tur hende haya e atencion necesario.”

Nan praktijklokaal tampoco ta mucho grandi segun loke el a afirma pero nan ta kere cu den futuro por expande esey.

Pa registracion, por bishita e website di www.oaa.aw unda ta bay riba inscripcion y yena e formulario pa Art and Design unda e persona interesa ta haya un e-mail automaticamente cu tur indicacion.

E opleiding aki tin un costo di 1,200 florin pa aña e cual ta encera e Adobe programa cu tin un costo halto unda Aruba a zorg pa facilita studiantenan cu e laptop cu ta bay dura pa cinco of seis aña.