– Openbare Avondleergangen Aruba(OAA) a introduci cambio den nan sistema pa habri mas posibilidad di formacion profesional pa e hendenan cu no por a bin cla cu scol. Un comision institui pa ministerio di Enseñansa a traha riba e cambionan aki cu lo drenta na vigor entrante januari 2017.
Nan a bin cu e cambio aki, ya cu e tipo di estudio aki cu ta wordo duna den oranan di atardi of di anochi, tin su retonan cu ne. Normalmente nan studiantenan ta hendenan cu ta traha y tin nan compromiso familiar. Tin algun di nan cu tin un disciplina ya cu despues di nan trabou pisa, nan ta bin atende e tipo di estudio aki.
OAA ta hunga un rol hopi importante den e preparacion di diferente grupo di persona pa loke ta trata formacion profesional. Pa añanan nan a desaroya diferente tipo di programa pa e grupo meta aki. E grupo aki ta hendenan jong cu a cay afo di enseñansa regular, pero tambe hendenan adulto cu ta desea cu ta desea di ricibi nan diploma of certificado pa realisa un ofishi. Pero actualmente tambe nan ta sostene e proyecto “Trayecto Siña Traha” pa e clientenan di e fundacion Reclassering.
Mercado laboral
Directora di OAA, Sra. Claudia Withfield a bisa cu nan ta contento cu e crecemento y desaroyo cu OAA lo haya cu e cambionan cu ta wordo introduci entrante otro aña.
OAA ta un scol cu tin mas cu 60 aña di existencia cu tabata ofrece programanan pa e mercado laboral solamente. Pero aworaki e cambionan cu ta bin den OAA, no ta solamente tin di haber cu e parti laboral so, sino cu e persona lo por sigui aspira pa un estudio di standard profesional mescos cu un estudio regular.
Encuanto si den e grupo aki ta cay e clientenan di Reclassering, Sra. Withfield a bisa cu pa medio di e programa cu nan lo inicia dia 9 di januari 2017, tambe nan lo cuminsa cu e programa di Trayecto Siña Traha. Esaki ta bay ta e di tres aña cu nan ta bay realisa e trayecto aki.
Algo nobo di e trayecto aki ta cu tambe e ta un aña, caminda nan ta purba cu e hobennan aki cu a confronta problema cu husticia, lo wordo prepara pa nan por sigui pa un di e estudionan cu OAA ta ofrece. E tipo di estudio aki no ta uno exclusivo pa hende homber so, sino cu hende muhe tambe lo por probecha di dje.
Certificado y diploma
Nan lo otorga certificadonan parcial loke ta nifica cu si e studiante ta keda pega un caminda, loke el a logra ta wordo reconoci despues ora cu e ta incorpora bek. Pues e no mester cuminsa full di nobo. Ademas e certificado tin su peso pa aspira traha den miho condicion den mercado laboral.
Si e persona aki ya caba tin experencia laboral riba cierto trabou, ya sea como assistent di construccion, ayudante mecanico, carpinte, metsla, pero e ta scoge pa sigui un studio pa obtene un diploma –segun directora di OAA- mester recompensa nan esfuerso y nan experiencia laboral
