Durante siman Openbare Avondleergangen Aruba (OAA) a tene un conferencia di prensa na unda a duna splicacion tocante cursonan cu nan ta ofreciendo aworaki y cu lo cuminsa pa e siguiente aña escolar, y alabes a anuncia cu ta bay tin dos anochi informativo pa tur persona cu ta interesa di haya sa un poco di e estudio anochi ofreci pa OAA.
Carlos Martinus, representante di OAA, a splica durante e conferencia di prensa cu OAA tabatin tres aña cera pa diferente motibo cu, segun Martinus ta indica, tabata fuera di su alcance y tambe COVID-19. “Nan a par’e, nan a cer’e, no tabatin claridad y na maart a puntra mi si mi ta desea di cuminsa cu e cursonan di nobo y asina a lant’e back,” el a indica.
El a sigui splica cu nan cuminsa cu un curso di leerwerktraject cu ta un curso di un aña cu ta cabando e aña aki. Nan a cuminsa tambe cu dos curso den nivel dos cu tin un duracion di entre un aña y mei pa dos aña y nan a cuminsa cu un entreeopleiding (curso di entrada).
Martinus a indica cu nan a dicidi di cuminsa cu e cursonan na october 2022, pero lastimamente tabatin 100 aplicante pa curso y 50 di esaki nan mester a manda cas sin duna nan scol. “Nos ta promove di ta tweede kansonderwijs (enseñansa di segundo oportunidad) y eynan nos ta fayando riba nos mes,” el a expresa.
Esaki a hiba, el a agrega, cu nan mester a cambia di pensamento y bay di nivel dos pa nivel uno, cu ta e curso di entrada. Na januari e organisacion mester a cuminsa cu mas curso di nivel dos, pero nan mester cambia y cuminsa cu e curso di entrada pa e area di servicio.
E cursonan a cuminsa aworaki cu 18 pa 19 alumno cu te ainda ta participando y esey ta e motibo pakico OAA a cambia cu aworaki nan ta bay cuminsa cu mas curso di nivel uno den futuro.
OAA ta enfoca riba educacion pa adulto y manera menciona caba enseñansa di segundo oportunidad. Esaki ta conta pa tur hende cu di un manera of otro no tabatin e oportunidad di caba pa cualkier motibo.
Martinus a splica cu nan a scoge un estilo di enseñansa digital. E material di les ta riba licencianan y tur e material ta bin for di Hulanda y ta acredita door di instancianan Hulandes y e diploma tin validez. E lesnan ta dual, na Papiamento y Hulandes. Martinus a agrega cu den ultimo siman den e curso di entrada nan a ripara tambe cu el a bira hasta Spaño cu Hulandes.
“Nos meta ta pa tur alumno logra, pero nos tin cu bisa si cu nos examennan ta keda na Hulandes,” el a remarca
Alumnonan cu caba e curso di entrada automaticamente tin entrada pa cuminsa cu nivel dos y den futuro ta bay introduci nivel tres y nivel cuater.
Pa otro aña escolar 2024-2025, el a sigui splica, nan mester cuminsa cu curso di nivel tres y esey ta bay ta e siguimento di e curso di nivel dos cu tin actualmente. Despues di dos aña di e curso di nivel tres, OAA ta spera cu por cuminsa cu nivel cuater tambe.
E aña aki OAA ta cuminsa cu seis curso di entrada y entre nan tin e curso assistent horeca voeding en voedingsindustrie. Pa esaki, pa prome biaha OAA ta bay traha conhuntamente cu Aruba Food and Beverage Association y na unda e organisacion ta zorg pa e alumnonan core nan stage y practica cu nan.
Martinus a remarca cu nan ta spera cu tin suficiente alumno pa por cuminsa cu e cursonan tambe pasobra mester un cantidad di minimo 15 alumno inscribi pa por cuminsa cada curso. “Nos ta ofrece hopi pero ta depende di pueblo con nan ta bin cerca nos pa nos por haci esaki,” el a enfatisa.
Martinus a subraya tambe cu den pasado OAA tabatin problema cu reconocemento di diploma. E biaha aki e organisacion a scoge pa haci’e cu e diploma cu e alumnonan ta ricibi aki na Aruba ta reconoci. Por ehemplo, na momento cu un alumno termina su curso di nivel uno e por drenta automaticamente na nivel dos, pero si pa un of otro motibo e alumno mester bay Hulanda, cu e diploma aki nan por sigui e curso na Hulanda sin problema.
Un di rekisitonan cu OAA tin pa por inscribi den e cursonan ta cu e alumno mester tin 17 aña di edad bay ariba. Esaki pa motibo cu, segun Martinus a menciona, e organisacion tin miedo cu muchanan mas jong ta kita for di scol den dia pa asisti OAA anochi. Pa loke ta nivel uno no tin ningun rekisito di entrada, tur persona cu tin mas cu 17 aña por asisti na e estudionan aki. Pa nivel dos, mester completa nivel uno pa por continua cu esaki.
Pa loke ta e gastonan cu tin envolvi pa completa e cursonan aki, teniendo na cuenta e licencianan pa e material di e curso y algun otro factor, Martinus a indica cu, dependiendo di e curso, e prijs por varia entre 500 te 800 florin, cual lo inclui loke e alumno tin mester pa completa e curso den e aña di duracion.
Mirando cu e material di e curso ta digital, un di e condicionnan, ta pa e alumno tin un laptop. Martinus a agrega cu tin computer disponibel cu por fia e alumno cu no tin di su mes, pero esaki ta solamente pa usa durante e orario di e les, e alumno no por bay cu esaki cas cual ta haci dificil pa realisa cualkier otro tarea cu tin di haber cu e curso na cas.
Por ultimo Martinus a invita pueblo di Aruba en general, pa dos anochi informativo, dia 5 y 7 di juni entre 6:45 pa 8:30 di anochi. E scoge pa haci dos anochi informativo pa esnan interesa cu talbes no por asisti dia 5 di juni, e ora por asisti e anochi di informacion dia 7 di juni. Esaki ta bay tuma luga den e auditorio di scol EPB Oranjestad.
