(AP) – New York City pronto lo pidi prueba di vacunacion di COVID-19 pa cada persona cu kier sinta come paden den restaurant, wak un presentacion, of bay gym, Alcalde Bill de Blasio a anuncia riba diamars, haciendo esaki e prome ciudad grandi den Merca pa impone restriccionnan di e tipo aki.
E rekisito nobo aki, cual lo tuma luga den diferente fase durante augustus y september, ta paso mas agresivo cu e ciudad a tuma te awo pa purba combati e aumento den casonan causa pa e variante delta. Hendenan lo mester mustra prueba cu nan tin por lo menos un di e dosisnan di e vacuna.
“E unico manera di por usa e establecimentonan aki paden ta si bo ta vacuna,” de Blasio a declara. “E meta aki ta pa por convence tur hende cu esaki ta e tempo. Si nos ta bay stop e variante delta, e tempo ta awo. Y esaki kiermen cu bo mester ricibi e vacuna aworaki mes.”
E Democrata a bisa cu te ainda mester regla algun detaye, incluyendo reglanan afectando muchanan di edadnan 12 bay abao, kendenan te ainda no ta eligibel pa ricibi e vacuna. E polisa aki lo drenta den efecto riba 16 di augustus pero inspeccionnan y aplicacionnan no lo cuminsa te cu 13 di september, e siman unda cu e ciudad su scolnan publico ta habri pa e siguiente aña escolar.
Carchinan di vacunacion lo ser acepta como prueba di vacunacion, hunto cu e applicacionnan di estado y e ciudad.
De Blasio a enfoca riba logra di tin e cantidad mas grandi di ciudadanonan di New York vacuna cu ta posibel, mientras cu e ta resisti e yamadanan pa haci uso di tapaboca obligatorio paden, den bista cu varios ciudad y pueblo den California a haci esaki caba.
