NuStar Energy, cu sede na San Antonio, Texas, a bisa diabierna pasa cu nan ta bendiendo nan instalacionnan di almacenamento di crudo den Caribe pa US$ 250 miyon, despues di termina e contracto cu su cliente mas grandi, e empresa estatal Venezolano Pdvsa, cumpliendo cu e sancionnan di gobierno Mericano.

NuStar a revela e benta tambe di e firma subsidiario ProStar Capital, como parti di su anuncio di ganashi di prome trimester, segun relato di San Antonio Express News

NuStar a informa un perdida netto di US$ 278 miyon pa prome tres luna di 2019, compara cu un ganashi di US$ 126 miyon pa prome trimester di 2018.

E perdida ta debi na e amortisacion no monetario di US$ 328 miyon di e instalacionnan den Caribe, situa na St Eustatius.

Den un entrevista e presidente y CEO di NuStar, Brad Barron, a bisa cu e benta lo permiti e compania continua enfocando riba den expansion di su operacionnan. Lo inverti US$ 250 miyon den proyecto den e Cuenca Permiano na estado Texas y otro luganan den Norteamerica.

NuStar tin un debe di US$ 3.300 miyon, loke ta aproximadamente cuatro biaha su capital.

E terminal di St Eustatius, cu un capacidad di 14.4 miyon bari, tin dos tercera parti bashi desde cu e funcionarionan di NuStar a cancela e contracto cu Pdvsa, na fin di februari, como parti di e sancionnan di gobierno di Trump. E instalacion ta e empresa principal di e isla, cu tin un poblacion di 4.000 persona.

“E benta di e instalacion na St Eustatius ta elimina un activo di rendimento abao, loke lo permiti NuStar concentra riba su iniciativanan di crecemento,” e analista di Stifel, Selman Akyol a bisa den un nota diabierna pasa despues di e anuncio di e compania.

Ta spera cu e benta di e terminal lo ta un hecho den di dos trimester di e aña aki. Ora esey ta completa, e operacionnan di NuStar lo ta estrictamente na Merca, Mexio y Canada. NuStar abende su operacionnan Europeo na november 2017.

Barron a bisa cu e instalacion na St Eustatius a pasa pa varios bida.

“Den su apogeo, e tabata hopi rentable como (…) instalacion cu tabata almacena crudo di Saudi Arabia pa Merca,” el a bisa. Segun cu Merca a pasa di importador di crudo pa exportado debi na e auge di shale oil, e fluhonan comercial a cambia.

Barron a bisa cu region di Caribe tin un exceso di oferta di almacenamento di crudo disponibel y cu e instalacion lo tin mas uzo pa ProStar, cu lo uza e mayor parti di e almacenamento pa su propio suministro di crudo, cu un menor dependencia di e contractonan di tercer parti.

Barron a bisa cu ta “desafortuna” cu NuStar mester a termina su relacion cu Pdvsa. “Nos tabatin un relacion comercial pa hopi tempo,” el a declara.

Sin embargo, nan relacion a bira mas dificil den ultimo añanan, ya cu e compania Venezolano tabatin problema financiero, debi na maneho di su gobierno, loke a hiba na retraso den e pagonan di lease. Aña pasa NuStar a prohibi Pdvsa temporalmente e uzo di su instalacionnan pa almacena crudo.