Nunca ta laat pa consulta… Pero prome ta miho…

Cu satisfaccion nos a tuma nota di e noticia cu e gremionan empresarial a sinta cu e mandatario encarga cu Infrastructura, Desaroyo Teritorial y Medio Ambiente, pa discuti e situacion di procesamento di desperdicio. ATIA, AHATA, ATSA, SNBA, WEB y Serlimar, hunto cu Camara di Comercio a sinta cu e mandatario den un reunion di cual e relato di KvK ta duna un bon impresion. Un consulta cu mester a tuma luga hopi tempo pasa caba, pero enfin. Nos ta comprende e trasfondo di e reunion aki, unda ta cuminsa aparece un oposicion bastante fuerte contra e proyecto di un incinerator, y na fabor di un otro solucion, manera recicla y exporta mas tanto posibel. E alternativa ey no a bin dilanti mas tempran, recientemente no mas a traves di e noticia cu e compania concerni a cera un contract cu un partner externo pa exporta desperdicio.

Cu a tarda tanto pa e alternativa aki bin dilanti, esey tin su motibo. Camara di Comercio mes hopi aña pasa tabatin contacto cu empresario Colombiano cu a pone e asunto aki riba mesa. Pakico e no a yega mas leu e tempo ey? Talbes pasobra e tempo ey tur hende cu tin algo di haci cu e sector aki tabatin nan propio idea, plan, pensamento. Y nan no tabata encera exporta desperdicio. No cu nos no tabata exporta, pero na escala mas chikito y solamente cierto material: auto bieu, otro forma di scrap, tire, diferente metal, etc. Tur esey ta bon, pero exporta practicamente tur cos? Esey tambe tabata posibel, pero nos no tabata mir’e.

Awor, kico ta e proposito di e Editorial aki? Lamenta cu nos por a haci e cos aki tanto aña pasa caba? Critica nos instancianan gubernamental pasobra por a haci un miho trabao hopi aña pasa caba? Nos no ta kere cu na e altura aki esey tin tanto sentido, ya cu e no ta añadi nada y no ta produci nada. Nos tin un cierto situacion nos dilanti y lo unico cu ta importante ta cu nos ta amplia nos vision riba e asunto aki. Loke ta bin dilanti den e caso aki ta cu den hopi asunto ta surgi un idea y cu seguidamente esnan cu tin suficiente ‘leverage politico’ ta brasa e asunto di tal forma, cu no kier sa nada mas di ningun otro posibilidad o manera pa yega na un solucion pa e problema cu mester di un.

Nos por bisa cu esey no ta algo exclusivo di Aruba, na tur pais bo ta haya cu esnan cu tin interes financiero economico den un cierto proyecto ta busca leverage politico y si nan logra, porta ta cera pa otro alternativa y ta enfoca solamente riba e proyecto visualisa, cu despues, sigur si bin algo di contratiempo, ta bira un cuestion di wanta duro y defende e proyecto cu tur cu tin, y ya cu den arena politico deportivismo y ‘fair play’ ta elemento desconoci, nos por imagina con e ambiente por bira. Cu esaki anto nos ta boga pa cambia e reglanan di wega politico? Nos ta kere cu esey tambe ta tempo perdi, mundo ta manera e ta.

Sin embargo, mundo no ta asina simpel tampoco. Pakico no? Pasobra participa den conkista y mantene poder politico ta un buskeda constante di base di apoyo. Un politico semper mester corda cu si e no tin hende pa apoya loke e ta propone, e tin un problema grandi. Logico anto cu ora cos no ta cana manera tabata pensa, busca alternativa ta primordial. Pero pakico no organisa e asunto aki di otro forma, y esey ta cu mas tempran den e proceso ta pone e alternativanan riba mesa y ta analisa a base di esey. Y ta esey tambe ta e trabao di e expertonan cu gobierno tin den cas y esnan cu nan ta contrata, e ultimonan aki pa demasiado hopi placa, pero enfin. Nan no t’ey pa bisa e mandatario kico e kier tende, no ta e ministro ta paga nan, ta nos ta haci esey. Ora un proyecto no ta bon, e no ta bon, y ta tarea di esnan den e posicion di consehero pa actua. Y ta aki nos ta mira un deterioro grandi, unda e distincion entre experto y cheerleader ta cuminsa desaparece. Y como cu den e mesun proceso aki nos ta mira mas y mas e fenomeno cu cada ministro ta forma su circulo di confiansa y ta cera su mes paden cu nan, esey ta splica e casi desespero di esnan cu tin pa contribui pero no kier keda reduci na parti di e ‘corte real’ di un mandatario.

Un bon ehemplo di loke nos kier bisa aki a sucede cu e mesun Camara di Comercio aki na 2013, tempo cu e entidad tabatin e curashi pa bin dilanti cu e tema di “Un Aruba sin refineria.” E rabia di e mandatarionan di e tempo ey tabata asina grandi cu tabatin como 300 hende den e sala e mainta ey, pero ningun empleado publico. Kico ta e les aki? Nos mester hopi mas consulta, y no solamente cu esnan cu ta pensa mescos cu nos. Escogencia sensato no tin tanto di haci cu core tras di bo propio idea.