Diasabra y diadomingo a tuma lugar e ultimo actividadnan den marco di Carnaval 71. Esaki a inclui Parada Grandi na San Nicolas y Oranjestad, y kimamento di Momo. Manera semper, Cuerpo Policial di Aruba tabata riba caya cu control pa percura seguridad pa tur Carnavalista y publico en general.
Pa loke ta e paradanan mes, polis a informa cu tabatin tres detencion durante e parada na San Nicolas, entre otro, pa no sigui ordo di polis, resisti contra polis, arma blanco (switch blade) y posesion di droga.
Tambe tabatin 36 detencion durante e parada na Oranjestad. Detencion tabata entre otro bringamento, no sigui ordo di polis , buracheria, droga, arma blanco.
Durante e paradanan, Cuerpo Policial a conta cu 220 personal riba pia. Diferente departamento di Polis a traha hunto entre otro Polis Uniforma, ME, Motor Unit, Flex Team, K-9 , Mobile Commando, O.C.C., Planologie, departamento di recherche, Personal administrativo y tambe personal di CEA.
E aña aki tabatin menos detencion tanto na e parada na San Nicolas como na Oranjestad. Aña pasa tabatin 19 detencion na San Nicolas y 41 na Oranjestad.
Nuebe persona ta perde rijbewijs
Despues di e parada, unidad motorisa di polis a tene control riba careteranan di Aruba, enfoca riba core auto bao influencia di alcohol. Segun polis a informa, a controla prome, durante y despues di e paradanan.
Despues di e parada grandi na Oranjestad a detene un total di 13 persona, di cual 9 a perde nan rijbewijs. Aña 2024 tambe tabatin 13 detencion.
Pa loke ta San Nicolas, unidad motorisa a para na diferente punto strategicamente pa asina por haci e control di trafico prome, durante y despues di parada grandi.
A detene 8 chauffeur di cual 6 persona a perde nan rijbewijs door di supla mas halto cu ta permiti pa ley. Mester bisa cu di e 6 cu a perde nan rijbewijs , 2 chauffeur tabata asina burachi cu ni por a supla; door di esey nan a perde nan rijbewijs. Ademas, 2 chauffeur a ya a keda deteni aña pasa caba y for di aña pasa caba ya nan rijbewijs a ser kita. Na 2024, a detene 11 chauffeur.
