Contractonan sin licitacion, sabotahe, y desvio di e produccion petrolero lo ta, entre otro, e motibonan pa cual e Direccion General di Contra Inteligencia Militar (Dgcim) a detene 9 gerente di Pdvsa-Occidente y a hiba nan na sede di Guardia Nacional Bolivariano, na Maracaibo, Zulia, dialuna pasa.
Nan lo a wordo presenta den tribunalnan di Cabimas y lo procesa nan pa e presunto desvio multimiyonario di crudo, mediante agregacion di emulsionante y awa, cu tabata exporta via Puerto Miranda, di unda ta sali 1.5 miyon di bari diario, segun informenan militar.
Dgcim a aresta Gustavo Malavé, director ehecutivo di Exploracion y Produccion di Pdvsa-Occidente; Juan Carrillo, subdirector Adhunto di Explotacion y Produccion; Juan Barreto, di Coordinacion Operacional; Hector Roque, di Operacion di Planta; Cesar Valera, gerente di Oportunidad di Negocio; Juan Romero, presidente di Petrozamora); Adolfo Torres, di DSI Occidente; José Marín, di DSI Petrozamora, y Henry Sánchez, di DSI-COL.
E diputado di Unidad Democratico, Robert Alcalá, cu a investiga e caso desde seis luna pasa, a determina cu e supuesto iregularidadnan ta data desde 2010, tempo cu a constitui un empresa, Tratamientos Químicos, C. A. (TQCA), cu a monopolisa e benta di emulsionante na Pdvsa-Occidente, y cu ta sirbi pa separa petroleo di otro substancia, manera awa salo, pa asina facilita refinacion.
Den e averiguacion a haya sa cu TQCA no ta posee e experticio petrolero y tabata bende kimico inapropia cu a ser paga cu sobreprecio di 150%. “Desde 2010 te cu e fecha aki, Pdvsa a gasta mas di 150 miyon dollar den e operacionnan aki, loke a genera perdida di 600 miyon dollar cu extraccion di crudo cu e iregularidadnan aki, principalmente na Zulia,” Alcalá a bisa, ken lo entrega un informe na e Comision di Contraloria di Asamblea Nacional, di cual e ta miembro.
“E mesclanan tabata iregular pasobra e empresanan no tabata conta cu e capacidad di produci e kimiconan. E responsabelnan: Juan Carrillo, Héctor Roque y César Valera. Carrillo tabata lidera e grupo di empleado di Pdvsa cu tabata sabotia e produccion di empresanan mixto cu tabata traha cu e industria petrolero, a impone e compra di kimico di empresanan no cualifica y sin licitacion, a desvia e barinan di petroleo den e fiscalisacion y a obstaculisa e procesonan si e empresanan no tabata paga e soborno,” Alcalá a denuncia. El a papia di tres gerente solamente, y cu e Departamento di Siguridad Industrial, o sea e polis di Pdvsa, lo tabata avala e supuesto echonan.
