NPU Mabon ta organisa tayer di agricultura

Agricultura ta un aspecto hopi importante cu diferente organisacion ta pone enfasis riba dje, sobretodo na un isla manera Aruba cu mayoria di alimentonan cu ta ser consumi ta importa. Pa remarca e importancia di agricultura, Comite Nos Prohimo Uni (NPU) Mabon ta organisando tayer di agricultura pa siña y conscientisa e comunidad ariba e importancia di agricultura. Presidente di comite, Astrid Vries, a splica mas tocante e tayernan.

Vroes a splica cu ayera habri e siman cu un charla tocante agricultura. E charla a conta cu cuater invitado cu a comparti nan conocemento y experiencia. For di Corsou Sr. Hensley Martina tabata presente na e charla y di Aruba tabata presente e cunukero Michael Lopez di Organic Paradise Aruba, Teophilo ‘Tilo’ Damian, ex director di Santa Rosa Aruba y Romulo Geerman di Rumbo Ranch cu ta un agricultor y criado di bestia.

Awe e prome dia di tayer ta tuma luga y tin un total di cuater dia di tayer. Vries a aclaria cu e tayer no ta dura cuater dia, ta ofrece e tayer ariba cuater dia pa asina e participantenan tin e oportunidad di scoge e dia y orario cu mas ta cumbini nan pa asisti. E orarionan ta di 9or pa 11or di mainta of for di 3or pa 5or di atardi.

E tayer ta habri pa muchanan di cinco aña te cu adultonan grandi. Muchanan di cinco y seis aña por participa den e tayer completamente gratis, muchanan di 6 pa 11 aña ta paga cinco florin, hobennan di 12 pa 16 aña ta paga 10 florin, hobennan di 17 pa 21 aña ta paga 15 florin y participantenan riba 21 aña ta 25 florin pa e tayer.

“Agricultura ta algo hopi importante pasobra nos tur ta depende riba dje. Ta hopi importante pa mira e direccion cu e mundo ta bayendo, con mas y mas bo ta mira tambe e aumento di prijs di locual ta alimentacion,” Vries a resalta.

El a indica tambe cu tin hopi proyecto cu ta draai rond di naturalesa y a traves di e diferente proyectonan aki mas hende ta usa naturalesa como un fuente di alimentacion y naturalesa ta bira menos, door di cual, el a enfatisa, agricultura ta hopi importante. “Ta importante pa nos siña e muchanan pasobra nan ta e futuro di mañan,” el a agrega.

Vries a trece pa dilanti cu awendia por mira cu tin cierto frutanan cu no ta bin cu simia mas. El a remarca cu aworaki kier crea mas fruta y berdura cu ta bin sin simia tambe y esey lo por tin un efecto negativo pa agricultura y alimentacion.

“Si e hendenan tuma agricultura na serio y cada un di nos cuminsa planta na cas, nos por tin simianan cu nos por keda planta den futuro. Pa nos conserva e naturalesa manera cu Dios a crea, e ora nos tin cu cuminsa tuma agricultura na serio, pasobra si hende cuminsa inventa cosnan, fruta y berdura ta pa nos curpa, nos salud y si bo inventa cosnan, ki beneficio nos ta bay saca for di e fruta y berdura pa nos salud?” el a indica.

Pa loke ta e tayer, Vries a splica cu nan ta den man di Sr. Martina di Corsou y e ta bay siña e participantenan e teoria y practica di agricultura y tambe e ta bay splica tocante tur locual un persona por ricibi ora cu e ta planta.

El a remarca cu agricultura of plantacion no ta solamente planta un simia, muh’e pa un mata sali, despues e mata ta crece y duna un fruta. El a enfatisa cu un persona cu ta planta ta cuminsa ripara cu door di plantacion diferente aspecto den su bida ta cambia y mehora.

“E ta haya back pasenshi, e ta duna bo amor, bo ta cuminsa dominio propio, bo ta cuminsa bira un persona responsabel. E ta bay duna bo tur e cos nan ey, pero hopi biaha un hende no ta mira esey pasobra hopi biaha nan ta hendenan cu door cu bo no ta mir’e bo no ta kere den dje. Pero en berdad bo ta ricibi hopi beneficio pa yuda bo den bida na djis e eherce e parti di plantacion. E ta yuda bo den hopi area di bida,” el a resalta.

Por ultimo Vries a extende su invitacion na tur persona cu ta interesa di siña mas di agricultura, pa tuma contact a traves di e number di telefon 593-3156 pa asina por haya mas informacion of inscribi pa participa den e tayer di agricultura.

E tema di agricultura for di algun tempo caba ta hayando atencion for di Gobierno di Aruba. Den luna di februari, Minister Geoffrey Wever a anuncia cu pa soluciona e necesidad pa acceso na financiamento atractivo pa empresarionan den e sector di agricultura, lo establece un fondo yama Agri Fund. E meta di e Agri Fund ta pa facilita financiamento na un interes atractivo pa (futuro) empresarionan den e sector di agricultura di Aruba.

Pa haci e Agri Fund posibel, minister Geoffrey Wever, minister Ursell Arends y Qredits Aruba a firma un Memory of Understanding (MoU). E Agri Fund lo ofrece financiamento na un interes reduci di 2% pa sumanan entre Afl. 5.000 y Afl. 200.000. E suma total den e fondo ta 3 miyon florin.

Banda di e Agri Fund, e (futuro) agricultornan por registra tambe pa e Agri Business Academy ofreci den cooperacion cu Qredits Aruba. E obhetivo di ambos, e Agri Fund y Agri Business Academy, ta forma un base pa stimula e potencial di e sector di agricultura como industria y diversifica economia di Aruba.

Luna pasa tambe Minister Ursell Arends a bishita e Hofi Pal’i Siya Cora na scol SPO Santa Cruz. Durante su bishita Minister Arends a indica cu tin diferente proyecto pa stimula agricultura macro y un di e proyectonan aki ta e Agri Business Academy, ya caba menciona y el a agrega tambe, pa loke ta e Agri Fund, cu den transcurso di lunanan proximo ta bay lansa esaki oficialmente tambe.

“Esaki ta manera con nos ta stimula agricultura y e pasa di ta un hobby pa haci esaki den un negoshi organisa. Mi ta kere un bes tin financiamento cu e hendenan aumenta proporcionalmente nan negoshinan, e ora nos ta bay yega na e caminda unda nos kier. Limita importacion. Na e momentonan aki casi 99% di loke hende ta come na Aruba ta wordo importa y poco poco nos ta cuminsa baha e porcentahe aki pa cosnan cu nos ta cultiva localmente,” e mandatario a indica durante su bishita na e scol den luna di juni.