Citgo Aruba no por cumpli cu su obligacionnan?
Riba e website Venezolano Noticia Sigatoka Venezuela a aparece un articulo cu ta cita un articulo cu a aparece riba e website di Energy News Today, den cual ta notifica di un posibel incumplimento di Citgo Aruba Refinery (CAR) cu e contract cu ta existi cu Refineria di Aruba NV pa lease y rehabilita e refineria na Aruba, y cu ademas lo ta negociando con ta sali di e proyecto.
E articulo original di Energy News Today, fecha 15 di juni, ta bisa cu Citgo (Citgo Petroleum Corporation) a clarifica cu tin un distincion entre e entidad Mericano aki y e subsidiario na Aruba, pero cu nan no a haci comentario encuanto e default o posibel negociacion di nan salida. Energy News ta cita Citgo Petroleum Corp. bisando cu “CAR ta independiente di Citgo Petroleun Corp. o Citgo Holding, Inc. Contractnan di operacion relaciona cu e refineria a ser haci entre Citgo Aruba Refinery N.V. y gobierno di Aruba. Ademas, tur lease, impuesto y pago di personal relaciona cu e refineria a ser haci manera programa.”
Y e medio digital ta continua: “Mientras awor Citgo ta enfatisa e distincion entre e mes y CAR, tabata James Cristman, vice-presidente di Citgo Petroleum cu a anuncia 21 di februari e slowdown den e proyecto di rehabilitacion na e refineria.”
Segun Energy News, un startup na augustus 2018 tabata stipula den e contract. E incumplimento por costa e compania CAR bastante placa, ya cu gobierno di Aruba lo exigi compensacion financiero pa e kiebra di contract. Tambe lo tin e opcion cu ta obliga CAR desmantela e refineria y mayoria di e terminal di almacenamento, incluyendo saneamento ambiental. Mayoria di e capacidad di almacena di e terminal lo no ta necesario pa tene combustibel importa pa consumo local. (Esaki no ta corecto, den e sentido cu e instalacion pa almacena combustibel pa mercado local ta separa di e terminal di crudo; red.).
E medio Energy News Today ta sigui bisa cu presidente di Citgo Petroleum Asdrubal Chavez y su vice-presidentenan, actuando na nomber di CAR, lo a reuni diaranson (dia 13 di juni) cu prome minister di Aruba, Evelyne Wever-Croes (MEP), pa discuti e opcionnan pa terminacion di e contract di lease.
Tambe Energy News Today a bisa cu nan a haya sa cu Agostar Group PLC, un compania di inversion estableci na Londres tambe lo ta discutiendo cu Refineria di Aruba e opcionnan pa opera e refineria y e terminal. E grupo, funda nan 2016 como un compania priva, ta claim di tin shares den e campo di gas offshore Dragon di Pdvsa na Venezuela. Segun Energy News, ademas Aruba lo ta negociando cu dos compania cu base na Europa pa reemplasa CAR como operador. Segun e medio digital, e Prome Minister lo a bisa cu e lo discuti e terminacion di e lease mas pronto posibel. Tambe ta bisa cu Citgo a declara cu e sancionnan imponi contra accionista (di Citgo) Pdvsa no ta permiti adkiri financiamento adicional pa continua cu e proyecto y cu tur e personal envolvi den e proyecto lo ser retira. (Den un articulo anterior Energy News ta cita Citgo bisando cu e personal di contratista trahando riba e proyecto lo keda retira, no e personal trahando cu CAR mes.
Nota di redaccion: Segun e website di e propio Agostar Group PLC e compania a keda incorpora na april 2017 na Inglatera y Wales, y na juni 2017 a keda re-registra como ‘public limited company’.
