Den fin di siman, Stichting Katholiek Onderwijs Aruba (SKOA) a confirma ariba nan pagina di Facebook cu oficialmente schoolgeld lo conoce un aumento pa aña escolar nobo, 2023/2024, pa tur e scolnan kleuter, basico y scolnan mavo.

Pa scolnan kleuter e schoolgeld ta bira 250 florin, esaki ta nifica un aumento di 75 florin compara cu prijs di e aña escolar aki, 2022/2023, pa scolnan basico e ta bira 275 florin, un aumento di 100 florin y pa e e scolnan mavo e schoolgeld ta bira 350 florin, cual ta nifica un aumento di 100 florin tambe.

No ta un secreto cu costo di bida a aumenta pa un y tur, y esaki ta nifica cu mas trempan cu laat, e efectonan lo sacudi e instancianan di enseñansa tambe. For di aña pasa e entidad a anuncia cu lo mester a bin un aumento den schoolgeld, pero a cancela esaki. Finalmente, e aña aki, nan a anuncia oficialmente e aumento.

E noticia aki a causa un cadena di reaccion den comunidad. Riba rednan social decenas di persona, mayornan cu tin yiu den scolnan cu ta cay bao SKOA, a reacciona ariba e noticia aki. Algun di nan cu disgusto y otronan cu comprendmento, mirando e situacion economico cu hopi ta pasando aden.

Hopi usario di Facebook a keha abiertamente di e aumento. Un usuario ta bisa: “Pakiko hisa schoolgeld y airco geld si e entrada di e muchanan toch ta un suma grandi caba? Nos ta papiando aki di miles di muchanan. Sigur cu e resto di schoolnan cu no ta kai bao di SKOA tambe lo hisa nan prijs! Pa e pago keda igual pa tur scol! SKOA no solamente ta perhudica mayornan cu e aumento aki pero tambe ta forsa otro scolnan pa subi prijs cu lo perhudica mayornan eybanda tambe!”

Otro ta indica: “Mi ta haña ja cu SKOA lo aumenta schoolgeld awor gobierno lo por stop e subsidio na SKOA tambe. Di e manera ey gobierno lo por subsidia e mayornan cu NO lo por paga e aumento aki. Mayornan tambe por busca otro scol cu no ta kai bou SKOA.”

Di otro banda tin esnan cu a compronde e motibo di aumento. “Cuanto aña sin aumento di schoolgeld? Jammer cu ta di golpi asina ariba pueblo. Y tin leerplicht. Airco Geld cu mi sa pa 6 aña ta mesun suma! No keha pa tin aumento pa esaki,” un usuario a comenta.

Tin usuarionan ta recorda cu tin e posibilidad si haci areglo di pago, specialmente pa esnan cu tin mas cu un yiu y cu e aumento lo afectanan un poco mas. “Mi tin cu bisa cu ta jammer cu tin aumento, pero mi ta compronde dicon nan a hisa e placa pa scol si. Como mayor corda duna prioridad na bo yiu su educacion y no lubida cu bo tin chance di haci areglo di pago pa bo no mester saca e placa di un solo shot,” otro usuario a bisa.