(CuraçaoChronicle) – Notario Johnny Kleinmoedig a keda sentencia na 18 luna di prison diabierna ultimo pa malversacion y labamento di placa. E notario ta acusa di a transferi cantidad di placa for di su cuenta di garantia (escrow) na su cuenta priva, sin base legal.
E fondonan deposita den e cuenta di garantia tabata sumanan di clientenan di oficina di e notario. Segun e notario mes, tabata trata di placa cu no tabatin un destinacion mas. Sinembargo, Ministerio Publico (OM) ta indica cu mester a debolbe e placa na e doñonan corecto cu tabatin derecho riba esaki.
Segun Ministerio Publico, un investigacion di Landsrecherche den colaboracion cu Autoridadnan di Impuesto a mustra cu e cuenta di placa di terceros pa varios aña ta ser usa como un sorto di banco interno pa propositonan priva.
Tin indicacion cu Kleinmoedig ta bay apela e veredicto. “Tur suma ta parce di tin hustificacion administrativo, manera ta evidencia den e investigacion financiero forensico entrega pa e defensa. Lo ta bon pa tin tres hues evalua e caso”, segun abogadonan Jansen y Braam.
