Tin un presion grandi riba e sistema ecologico di Aruba. Aruba, cu 614 persona pa kilometer cuadra y mas di un miyon bishitante pa aña, ta confronta mas urgencia cu nunca pa proteha su naturalesa.

Segun e nota di informacion riba e ley cu a pasa recien unda a otorga 16 tereno proteccion como area natural, e base di e proceso ta e ley di Proteccion di Naturalesa.

E ley aki ta califica flora y fauna specifico, como balornan importante di Aruba. E proteccion di bida marino ta sigui den e ley nobo, basa riba e mesun Ley di Proteccion di Naturalesa.

E impacto financiero di e ley nobo aki ta limita, ya cu un parti di flora y fauna ta protegi caba y unicamente ta sigui e situacion nobo, incluso den e 16 terenonan cu ta protegi awor aki. Tanto polis como Kustwacht ta encarga pa mantene e ley vigente pa loke ta lama y beach. Sinembargo, te cu awor nan no tin e tarea specifico pa proteha flora y fauna endemico, esta cu ta aparece unicamente na Aruba.

Pa tal motibo mes a dicidi cu e encargo aki lo ta den man di park rangernan cualifica cu ta bay haya e responsabilidad di inspectornan na Direccion di Naturalesa y Medio Ambiente, DNM, pa asina nan por bira supervisor y ambtenaar cu autoridad specifico. DNM como tal lo percura cu tin curso y medionan di transporte, ademas di campañanan di informacion pa e supervisornan por cumpli cu nan encargo. Gobierno lo aloca fondonan den e presupuesto di DNM pa logra e meta aki. E seccion di inspeccion lo ta reforsa cu cursonan na Scol di Polis y pa esaki si ya tin medionan financiero reserva.

Sistematica di e ley

Tin cuater categoria cu ta determina cua ta e tipo di flora y fauna cu mester di proteccion. E liña cora entre mayoria ta cu tur ta especienan di Aruba, of cu ta crece unicamente na Aruba y mester di proteccion, ya cu nan ta den peliger di extincion. Esaki basa riba diferente estudio cu a keda agrega como informacion pa sostene e ley. E motibo pakico e proteccion ta mara na ley ta pasobra Aruba tin un responsabilidad pa sigura cu e especienan unico aki keda existi. Shoco por ehempel ta un di nan y mester percura pa su sobrevivencia.

Tambe a inclui otro especie cu kizas por a desaparece caba for di Aruba, manera e Lora. Pero e ley ya ta brinda proteccion den caso cu mester reintroduci e lora y automaticamente e ta protegi. Otro animalnan protegi ta entre otro e Bludeifi, Coneu, Falki, Patrishi y Dori.

E flora di Aruba tambe ta bou presion. Matanan endemico di Aruba ta poco y e lista di proteccion ta inclui Palisia Cora, Azufro, Stoki, Batata di Zumbi, Orkidia di Mondi y Yerba Stinki. Mayoria di e especienan cu a sobrevivi ta concentra den Parke Nacional Arikok.

Ademas di e lista di Ley di Proteccion di Naturalesa, Aruba ta mara na e Tratado di Cartagena, cu ta dirigi riba proteccion y desaroyo di ambiente marino di henter e region Caribense. E tratado aki ta obliga Aruba pa respeta y proteha animalnan cu no ta den peliger di extincion ainda. Nan ta califica como especienan menasa. Aruba no a conoce investigacion specifico pa identifica e grupo aki, sinembargo mirando e escala chikito di nos pais y e cantidad di persona cu ta trafica riba y rond di e isla, nan existencia ta keda afecta. Pues, no ta rekeri investigacion pa determina cu ta trata di especienan cu ta bou menasa. Riba dje, Aruba ta mara y legalmente responsabel pa proteha animalnan cu ta crusa e teritorio segun temporada, sea ta den lama of riba e isla mes. Y ta papia di ‘migratory animals.’

No por saca animal di lista

Algun yamativo den e nota di informacion pa e ley, ta cu ta reitera tur e proteccionnan existente y ta enfatisa cu no mester investigacion adicional pa asumi cu tur e animalnan y vegetacion cu ta riba e lista di proteccion of lista di menasa actual, ta rekeri cu Aruba ta cumpli. E solo hecho cu nan ta riba e lista di Proteccion di Naturalesa ta nifica cu nan ta core peliger y no por saca nan for di e lista.

Menasa

Kizas no tur riba e lista ta coriendo peliger di extincion actualmente. Pero asina mes ta necesario pa proteha nan. Motibo ta cu e especienan, sea ta vegetacion of animal, ta crucial pa sobrevivencia di ecosistema y habitat. Si e cantidad di especienan aki baha of desaparece, e impacto riba henter e sistema ecologico lo ta enorme.

E tipo di especienan aki, cu ta bou menasa, tin cu cumpli cu dos rekisito. E prome ta cu nan ta cuminda pa e animal cu ta rekeri proteccion. Pues si baha e cantidad of elimina su presencia, e ta nifica cu e especie endemico tambe lo desaparece. E otro condicion ta cu nan ta di balor pa ciclo di bida pa e especie protegi. Mangel, of mangroven, por ehempel ta luga di sconde of unda piscanan chikito y jong ta busca nan cuminda. Ademas nan ta luga unda parha ta broei.

Gutu

Un di e piscanan cu mas ta hayando atencion den e temponan aki – despues cu hasta Ministernan di Husticia y Minister di Sector Primario, Andin Bikker y Chris Romero respectivamente a pidi pa sak’e di e lista di animalnan protegi – ta e Gutu. E Gutu, of Parrot Fish, segun e ley cu ta dirigi aworaki e 16 terenonan di reserva natural, ta conoci di ta responsabel pa e beachnan blanco di Aruba. Pero e pisca ta mas cu esey. E Gutu ta come alga for di e coralnan. Esaki ta balor sin precendencia den e epoca actual. E ta un hecho cu cambio di clima cu henter e planeta ta experiencia, ta hisa e temperatura di lama. E ta nifica creacion di alga cu ta daña coralnan. Pero e Gutu ta percura pa elimina e alga cu na su turno ta nifica cu coralnan por sigui biba y sostene un biodiversidad rico.