Ayera a tuma luga e reunion publico number 5 na Parlamento di Aruba pa trata presupuesto di aña 2023, contando cu presencia di ministernan di Gabinete Wever-Croes 2 y algun parlamentario di oposicion.

Durante e reunion, Minister di Finanzas y Cultura, Xiomara Maduro a informa cu presupuesto complementario di aña 2022 a conoce un cambio unda e deficit financiero pa esaki ta baha y e lo bira 92 miyon florin, ekivalente na -1.6% di e GDP. El a señala cu ta un trabao hopi grandi cu a wordo haci na 2022, un aña cu a wordo tipifica pa hopi presion, unda CAft a escala esaki na e reunion di Conseho di Minister di Reino.

“Conseho di Minister di Reino a mira esfuersonan cu a haci y e decision e ora eynan a wordo tuma cu Aruba no ta haya un aanwijzing, no ta haya un KB of un instruccion”, el a bisa.

Den esaki Aruba tambe a manda su puntonan di bista, cual tabata dividi den dos parti, di cual un a mustra e parti legal y e otro parti a mustra e parti di esfuersonan financiero cu e pais ta bin haciendo.

E zienswijzing tin un parti huridico cu ta masha importante, manera el a sigura, pa motibo cu e parti huridico no ta conta solamente pa presupuesto 2022, sino tambe pa presupuesto 2023.

Den e nota di cambio, minister Maduro a señala cu nan a traha cu e cifranan cu a wordo realisa, y esey te cu luna di september 2022 nan por a cambia e entrada di pais Aruba, cu a aumenta cu 54 miyon florin. E saldo ta drecha door cu nan a tuma algun decision di maneho pa por baha gasto, loke a resulta den un mehoracion di saldo di 3.7 miyon florin.

Pa locual ta inversionnan, esey a aumenta cu 1.3 miyon florin, y cu e saldo na fin di dia ta drecha den un cifra di 148 miyon florin, y cu e nota di cambio, a bira 92 miyon florin. Esaki ta nifica cu e deficit ta baha cu 56 miyon florin cu e resultado cu a wordo haci.

Entrada di pais Aruba ta aumenta. E tabata na 1.360 miyon florin y e ta bira 14.014 miyon. Gasto tabata 1.508 miyon y e ta bira 1.506 miyon florin. Impuesto directo tabata 460 y e ta aumenta na 487 miyon florin; impuesto indirecto tabata na 575 miyon florin y e ta aumenta na 600 miyon florin; inversion tabata na 22 miyon y e ta bay na 24 miyon florin; fiansa pa estudio ta keda igual cu 26 miyon florin; subsidio tabata na 206 miyon florin y ta baha na 204 miyon florin.

Interes ta keda mesun cos, 253 miyon florin; servicio di producto tabata na 214 miyon florin y e ta bira 216 miyon florin; y tambe e gastonan di personal ta keda igual cu 426 miyon florin.

Door di e cambionan aki, e necesidad financiero tabata na 1.169 miyon florin y e ta bira 113 miyon florin, unda den esaki, Maduro a splica cu nan a tuma na cuenta henter e suma di e debe cu Hulanda, pa motibo cu ainda mester tin un discusion tocante kico ta e condicionnan pa haci pago back riba esaki.

E deficit financiero na comienso di aña tabata di 226 miyon florin, unda nan a presenta na Parlamento un cambio cu a contene 148 miyon florin na deficit y a aworaki nan a presenta un nota di cambio cu ta trece e deficit na uno di 92 miyon, cu ta ekivalente na -1.6% di GDP, manera a menciona caba.

Den su opinion, minister di Finanzas ta indica cu e debate cu a wordo hiba pa presupuesto 2023 ta uno hopi importante pa a por debati tocante e zienswijze cu a bay pa Hulanda, pa motibo cu Conseho di Minister di Reino no a trat’e den nan conclusion y decision.

Di su parti, minister di Salubridad Publico y Turismo, Dangui Oduber a trece dilanti cu den ultimo lunanan turismo ta kibrando record y nan ta experienciando un miho aña miho cu 2019, despues di dos aña di pandemial unda e aña ki por cera cu un recuperacion economico riba 100%.

Igualmente el a señala cu den parti di Salud, nan ta bay monitoria e dokternan cu ta haci mas bewijzing door cu nan ta pidi pa no controla. Tin hopi test cu pashentnan ta haci cu no ta relaciona na e malesanan pa cual e pashent ta acudi na dokter di cas, segun un investigacion cu a wordo haci. Cuido mester wordo duna caminda ta wordo dirigi, kiermen si un persona mester acudi pa su kehonan cerca un dokter di cas, en bes di un specialista ta e dokter di cas mester atende cu e kehonan y no specialistanan cu ta un cuido mas costoso.

Ayera algun parlamentario di partidonan di oposicion tabata presente den Parlamento despues di varios dia di ausencia, unda cu esey a wordo cuestiona un biaha mas. Tambe a tuma luga discusionnan riba cobramento di salario mientras cu algun parlamentario no tabata sinta den Parlamento.