4mei, NW, comunidad abogado (1).jpg

Dia 27 di april ultimo e abogado mr. Gabri de Hoogd a dal un auto pero no a para y a sigui core bay. Esaki a bira un caso grave di dal core bay y ta castigabel na tur parti di mundo. E chauffeur di e auto, cu a sufri daño,  a percura pa avisa polis y a sigui tras di e abogado. Polis a logra para e abogado pero mirando con su condicion tabata, a dicidi di bay cun’e warda pe supla. Abogado de Hoogd a nenga di supla y a lag’e bay cas. Esaki a pone cu den comunidad hopi hende a reacciona hostina y no ta contento cu e abogado a dal auto core bay,  e ta nenga di supla y e si ta bay cas sin mas. Mientras nos por lesa tur dia den corant cu otro ciudadano ta nenga di supla y ta aplica e maximo di alcohol riba su nomber y e ta wordo atendi conforma e maneho stipula. Ta ki bagamunderia esaki ta awo? Kico e ta mas cu otro ciudadano cu tambe por comete un pifia? Ta pagamento bou mesa tabata tin?

 

Na warda abogado de Hoogd a nenga di supla pa asina polis por midi e nivel di alcohol. Tambe el a pidi asistencia di dos abogado, esta mr. John Zara y mr. Ronnie Wix, pa defende su caso, cu ainda no a drenta den proceso. Fiscal Auxilia a laga polis interoga e abogado Gabri y despues e por a bay cas.

Hopi di esunnan cu a wordo gara ta core auto bou di influencia di alcohol y e nivel ta halto, a haya un castigo. Hopi ta haya cu si a laga e abogado bay cas, tur esunnan cu ta wordo haya y ta mustra cu nan ta bebi  y cu nenga mester haya e mesun trato. Hopi chauffeur cu a wordo para pa polis, mester a supla y si e nivel di alcohol tabata halto nan tabata wordo hiba pa warda y treci dilanti di Fiscal Auxilia. Tambe nan tabata haya un castigo. Si e persona a nenga di supla e peso di ley ta esun cu ta conta. Den ley ta stipula cu si e nivel di alcohol ta halto, rijbewijs por wordo kita pa tanto tempo, keda cera te ora buracheria pasa y por haya boet.

 

Hendenan ta reacciona hostina

E situacion aki a pone cu hopi hende a reacciona rabia. Hopi ta indica cu tin ley y e ley mester wordo aplica manera e mester ta. Ley pa un, ley pa tur, esey ta loke hendenan ta exigi. Hopi den comunidad kier compronde kico precies a pone cu a tuma e decision di acepta cu e abogado a nenga y despues lag’e bay su cas. Hende kier sa dicon no a aplica e ley manera mester ta. Comunidad kier un claridad, pasobra e situacion aki ta treciendo hopi pregunta y un di nan ta si ta corupcion tin den polis. Of ta solamente un amistad grandi entre Fiscal Auxilia y abogadonan cu ta trapa riba ley? Of ta paso Gabri ta macamba blanco?

 

Polis mes ta kibra ley

Un automobilista a bisa Bon Dia Aruba, cu un situacion cu el a pasa siman pasa ta cu ora el a yega pa bay na e veld di Pos Chikito, tin un borchi di prohibicion. E automobilista a dicidi di pasa rond pa evita di pasa den “verboden” y haya boet di e polis cu tabata su tras. El a tuma nota cu e polis si a pasa den verboden sin sirena y zwaai licht. El a indica cu si e mester a pasa den verboden mesora polis lo a cende e luz y e lo a haya un boet. “Mi kier sa ken ta controla e polisnan sea nan ta na pia di trabou of bisti na civil ora cu nan mes no ta sigui e ley di trafico. Pasobra si ami kibra ley, mi sa cu mi ta haya un boet y mi no ta haya ta husto cu nan si no ta haya,” e automobilista a indica.