Ban cuminsa unda por, y mester

Nos bon deseonan relaciona cu Aña Nobo, mas tanto ta bay pa tur hende cu nos topa. En general esey naturalmente ta bon; no tin motibo pa laga cierto hende o grupo un banda den nos deseonan. Pero, nos sa para keto tambe y puntra nos mes si esey realmente ta posibel y cu na fin di cierto aña, esun aki tambe, nos lo a avansa en berdad den e direccion desea?

Ta parce cu atrobe nos mester haci distincion entre e cosnan deseabel y loke ta factibel, a corto plaso. Y mirando cu nos ta lidiando cu un estado den problema financiero serio, nos lo mester establece prioridad. No necesariamente nos ta bay ta di acuerdo cu otro tocante loke nos ta mira como prioridad, pero den e discusion tur hende mester por bisa kico nan ta mira como tal. Nos prioridad lo ta pa pone e gruponan di ciudadano dilanti cu ta den un situacion dificil y cu ta core riesgo considerabel. Ehemplo? Nos ciudadanonan di edad halto cu ta biba den isolacion social, sin cu tin un proteccion y vigilancia diario pa interveni ora ta necesario. No cu nos kier bay asina leu di take over e dirigencia di con nan bida mester ta, pasobra si tin algo cu nos por siña di e experiencia den otro pais, por ehemplo na Europa, ta cu simplemente hinca tur hende di edad den un institucion grandi y percura pa nan haya cuminda tres biaha pa dia, a cambio di kita totalmente nan libertad di dicidi pa nan mes, mientras cu nan tin e capacidad ainda pa funciona masha bon como miembro completo di nos comunidad, esey no ta e ruta cu nos mester tuma.

Si nos por ta di acuerdo riba esey, ta surgi e siguiente tema. Mester reconoce cu tin un diferencia grandi entre mantene e libertad individual di cada ciudadano, tambe na edad halto, y biba den (casi) completo isolacion, cu tur e riesgo cu esaki ta trece cu ne pa un persona asina. Atrobe, nos no ta partidario di tuma encargo completo di bida di tur e personanan aki, pero kico si nos por haci anto? Bon, nos por cuminsa cu haci un estudio ta cuanto hende nos tin den situacion di riesgo, cu nos por facilita un artefacto cu ta zona un alarma cerca e instancia cu ta vigila nan salud? Diripiente nos ta elimina pa un bon parti e riesgo cu hende di edad y cu un salud fragil ta haya nan mes den problema serio, sin cu tin un manera pa avisa un miembro di famia o otro persona cerca, si acaso nan tin hende ainda cu ta pendiente di nan. Na momento di emergencia, gara e celular y yama un persona por ta algo cu ya bo no por haci. Primi boton di un artefacto di emergencia por ta algo cu ainda bo ta capaz di haci. Ademas, no ta algo cu mester inventa, pero cu ta existi pa basta aña caba. Y si nos mes ta papia henter ora di innovacion y bay digital den tur sentido, ata algo cu nos lo por haci.

Di biaha caba nos ta tende e comentario di: “Aha, y ken ta bay paga tur esey?” E contesta lo ta bastante facil: nos tur hunto. “Esey ta implica cu ta AZV lo mester bay paga esaki; nan tin hopi cos di paga caba”, nos ta tende atrobe. Nos no ta bay asina leu di bisa di cual fondo mester paga esaki, pero si cu e ta parce nos un prioridad. Ademas, nos no sa mes con grandi e problema ta, te pa nos tin un idea con costoso, o no, e solucion ta. Y pakico esaki ta asina? Pasobra nos ta asina manso, tambe medionan di comunicacion cu mester ta na vanguardia di interes di comunidad, cu nos ta biba trankilamente den un comunidad sin cifra, sin dato. E idea di introduci un artefacto di siguridad pa hende di edad den situacion delicado no ta surgi pasobra nos tin un relacion cu esunnan cu ta bay importa e aparatonan. No, importante ta cu henter e asunto aki ta trece dilanti cu nos no tin pero mester haya un bista riba con grandi e problema ta. Y, nos ta papiando aki di un grupo creciente, y mas ainda e grupo di persona di 75 aña bay ariba. Entre fin di 2014 y tercer kwartaal di 2017 e grupo aki a crece cu 543 persona, pa un total reciente di 5455 persona. Tur esunnan entre nan cu ta ciudadano Hulandes tin derecho di voto… Pero esey no ta e argumento mas importante.

Esun mas importante ta cu un comunidad cu ta respeta su mes, ta tuma na su encargo pa atende su ciudadanonan di mas vulnerabel. Despues di loke nos a pasa aden como comunidad aña pasa, ta mas cu claro cu esaki ta conta pa esunnan mas hoben entre nos, cu lo t’ey dia cu nos mes no t’ey mas. Pero un cuido optimal pa esunnan cu estadisticamente mira lo ta bay t’ey pa e tempo mas cortico, tin derecho riba cuido optimal. E ta un asunto di civilisacion.