Den un entrevista cu presidente di Fundacion Gobernacion di Calidad Aruba (FGCA) Armand Hessels, Bon Dia Aruba ta purba aclara e metanan cu e fundacion aki a pone pa su mes y proyectonan vigente. Tambe a tene un combersacion tocante reevaluacion di sistema di representacion democratico.
Sr. Hessels ta splica cu e meta ta pa conscientisa comunidad di Aruba tocante e necesidad pa bin cu bon gobernacion. E opinion di sr. Hessels ta cu ‘desde inicio di Status Aparte na 1986 Aruba ta wordo goberna a base di mal gobernacion. Y esaki ta trece hopi consecuencia negativo pa e pais’.
“Nos no ta un fundacion cu ta traha a base di critica. Nos a critica asuntonan negativo si, pero e meta ta pa yega na un situacion positivo cu ta cumbini henter Aruba.”
Pa yega na nan meta e fundacion ta traha riba diferente rapportnan investigativo detayando kico bon gobernacion y mal gobernacion ta. Recien tambe nan a cuminsa traha riba videonan riba Facebook cu ta sirbi e mesun funcion. “Nos ta tene consideracion cu nos no ta den un cultura di lesamento.”
Riba e website di e fundacion por haya informacion tocante e diferente aspectonan cu ta sintoma di mal gobernacion. Entre otro: patronahe politico (nepotismo), falta di transparencia, mal maneho di financia, personal y/of material y maneho coruptivo. Riba e puntonan aki sr. Hessels ta drenta den detaye.
El a splica cu no ta solamente e gobierno y politiconan mester para responsabel pa e calidad di gobernacion, pero e comunidad mes tambe.
Patronahe politico/nepotismo
Sr. Hessels ta splica cu e fenomeno aki ta ora hende wordo nombra den e aparato gubernamental cu e mesun color politico cu esunnan den poder. Esaki por tin varios consecuencia, segun e.
“Na prome luga, bo ta pone hende den puesto cu nan no ta prepara pe. E aparato gubernamental na tur pais tin tareanan hopi specifico y esencial pa un pais funciona bon. Esaki kiermen cu mester tin cierto preparacion pa cada funcion.”
El a sigui splica cu si bo pone hende aden djis pasobra nan a campaña pa bo, vota pa bo of haci bo cualkier fabor, esaki ta baha henter e eficiencia di e aparato gubernamental.
Ademas e aspecto financiero tambe ta importante, e ta splica, pasobra na momento cu bo hinca mucho hopi hende den gobierno como recompensa, e gastonan di esaki no ta cay riba e politiconan ni e partidonan cu a nombra nan. Si no riba e comunidad di Aruba.
“Nos tur como pueblo ta pagando e fabor di politico den cualkier partido cu ta yega na gobernacion.”
Evasion di impuesto
Segun sr. Hessels, ‘e Controlaria General di hopi aña ta adverti gobierno cu e administracion financiero ta sumamente caotico’.
“Nos no sa si e gastonan ta klop cu e placa cu ta saliendo, nos no sa si nos ta hayando e placa cu nos mester haya aden.”
Un aspecto importante segun sr. Hessels ta evasion di impuesto. E ta splica cu hopi hende ta invadi di impuesto pa hopi aña pasobra nos sistema di impuesto ta uno directo. Sr. Hessels a splica cu hopi instancia internacional y riba Aruba mes a recomenda pa cambia pa un sistema di impuesto indirecto. Na 2016 porfin minister di Financia a bin cu e sistema aki pero nos a wak cu minister president a bari e sistema aki fo’i mesa.
Sinembargo sr. Hessels ta splica cu College Aruba financieel toezicht (Caft) a calcula cu si bin cu e sistema nobo aki, Aruba lo gana e prome aña 40 miyon florin extra pa aña y despues 100 miyon extra pa aña.
Esaki ta un desaroyo positivo, segun e. “Esaki no kiermen cu hende lo paga mas impuesto, esaki kiermen cu esunnan cu no ta paga impuesto awo, entre otro turista y hendenan ilegal, lo paga impuesto no di antemano pero ora cumpra articulonan.”
Transparencia
Segun sr. Hessels, e fundacion a produci un rapport tocante transparencia di e gobierno un par di luna pasa. Den e rapport a constata cu e transparencia di parti di gobierno ta sumamente limita.
Un aspecto cu sr. Hessels kier subraya, ta cu den e rapport nos a detaya cu instancianan manera Controlaria General ta raporta riba administracion financiero y personal di gobierno pero no riba transparencia.
Un ehempel cu sr. Hessels ta duna di falta di transparencia ta e situacion cu Citgo na tempo cu a publica e rapport. “Hasta nos propio parlamentarionan, cual ta esunnan cu mester duna e decision final pa un acuerdo cu por costa Aruba mas cu 600 miyon florin, no a haya e condicionnan di e contracto pa esaki.”
Segun sr. Hessels, esaki ta forma parti di un forma di gobernacion na unda ta cera contracto secreto sin ningun tipo di transparencia. Esaki hopi biaha ta resulta eroneo. Y atrobe, e cuenta aki no ta wordo paga pa e personanan cu a cera e contracto pero e pueblo.
Reevaluacion di e sistema
“Tur e puntonan aki y e manera cu placa ta wordo tira afo ta trece mi na e conclusion cu henter nos sistema politico ta sumamente cuestionabel. Nos ta bay trece dilanti esaki entre otro durante e simposio cu nos ta organisando. Nos sistema simplemente no ta funcionando manera debe ser. E sistema mes ta bon pero na Aruba y tambe na otro paisnan e no ta traha bon.”
Segun sr. Hessels, tin mas y mas inkietud rond mundo cu e sistemanan politico y democracia. Cada bes hende rond mundo ta riparando cu e solidaridad cu ta existi entre nan y un pais no ta existi entre politico.
Nos reportero a busca ehempelnan di diferente sistema cu ta keda den cuadro di democracia, y e sistema di democracia directo a resalta. E sistema aki ta hopi similar na democracia representativo, esta un sistema parlamentario, y por bin na diferente forma. E ta wordo uza na diferente pais na diferente nivel.
Un manera cu e por wordo uza, ta den un manera semi directo unda representantenan ta anda cu asuntonan dia pa dia. Sinembargo e ciudadanonan ta keda soberano y tin poder popular di referendum, iniciativa y recall. Esaki ta haci cu e polisanan cu ta wordo traha pa representantenan por wordo revoca via instrumentonan democratico directo.
Sr. Hessels a expresa cu ‘esaki ta un bunita desaroyo cu ta tumando luga cu nos mes ta sigui bastante di acerca. Na e simposio cu mi a menciona anteriormente nos lo trece cierto cosnan dilanti, y esaki hustamente ta un di e cosnan cu nos lo trece dilanti como posibel solucion’.
Segun sr. Hessels, e desaroyo nobo aki den democracia por wordo mira rond mundo. Diferente paisnan na nivel di municipio ta experimentando cu e tipo di representacion directo aki, el a splica.
E simposio lo tuma luga riba 12, 13, 14 september.
