Siman pasa tabata tin e resultadonan di scolnan rond di Aruba. Bon Dia Aruba a pasa na Filomena College MAVO cu tabata e miho di scolnan pariba di brug y e di dos miho rond Aruba.
Adjunct directeur juffrouw Raquel Lampe a bisa cu siendo un scol chikito, e ta sinti masha orguyoso di nan studiantenan. Un total di 52 mucha, di cual 42 a slaag y e resto por ripiti examen ainda y logra slaag.
“E diferencia di e scol ta cu e ta chikito, y pa e motibo aki por dedica mas tempo na alumnonan. E muchanan pariba ta genuino. Tin circunstancianan dificil, pero esaki ta conta pa henter Aruba”, juffrouw Lampe a splica.
Juffrouw Lampe kiermen cu ‘e ta conoci pa haci fastioso riba cierto puntonan’.
“Mi ta bisa e alumnonan tocante entre otro bistimento di uniform, cu e ta un disciplina, paso pa dia di mañan cu nan mester bay traha, mester aplica regla como un adulto, mester ta disciplina. Semper mester link e reglanan cu nan ta haya util, pasobra si ta djis keda zeur sin duna e motibo, dicon e ta wordo disciplina, nan no ta bay wak’e”, juffrouw Lampe a remarca.
Segun juffrouw Lampe ta aclara cu nan team di scol ‘ta traha duro’ pa nan studiantenan. Tin maestronan ta dedica extra tempo, extra les den temporada di examen. E ta splica cu maestronan ta hinca tempo y dedicacion pa nan alumnonan asina nan ta bon prepara.
Pa juffrouw Lampe tur scol mester ta asina, ‘tur ta yuda otro asina crea un esfera cu awe nos por celebra cantidad di nos alumnonan cu a slaag. “Tin un conexion grandi entre e studiantenan, nan maestro te na Directie.
Tambe el a splica cu nos cu e muchanan di Filomena College en diferencia cu otro scolnan ta cu ‘e alumnonan gusta scol’, tin cu ta keda te oranan laat pa combersa, hang, haci amistad. “Nan ta yama e scol nan di dos cas”, asina juffrouw Lampe a aclara.
“Ta locual e maestronan ta proyecta, e studiante ta sinti. E bon energia di esfuerso di nan maestronan. Y nan ta aprecia esaki tambe. Tin mucha cu mas dificultad cu otro, pero cu guia necesario por sigui crece.”
Juffrouw Lampe tambe a bisa cu nan trabou principal ta pa duna y ofrece e guia pa e muchanan. “Un bes cu bo ta worry pa nan, lo tin un diferencia”, el a remarca.
E ta splica cu muchanan Latino ta mira ‘estudio na Aruba un bon oportunidad’ pa bay dilanti, algo cu si nan tabata na nan mesun pais nan no lo haya. Tin ta haci wega paso nan ta keda hoben, pero hopi di nan ta pusha pa haci nan miho esfuerso sea den Hulandes o cualkier otro vak.
“Den nos resultadonan nos a wak varios di nos alumnonan cu a bin di afo na un edad jong of mas grandi, anto nan a logra paso nan a pone nan meta dilanti. Nan sa e oportunidad cu Aruba su enseñanza ta ofrece.”
El a termina bisando cu na San Nicolas tin hopi sub cultura, a pesar cu Aruba ta chikito. “Nos custumber ta otro, e forma di biba ta diferente. Nos tin varios nacion ta biba akibanda y toch e ta great pa wak union”, juffrouw Lampe a finalisa.
