Ayera durante prome rueda di prensa di gobierno pa 2018, prome minister Evelyn Wever-Croes (MEP) a papia un rato riba e asunto di empleadonan di gobierno anterior cu a haya carta di retiro. E premier a bisa cu nan a topa cu hopi sorpresa di personal ultimamente anto a trece dilanti algun documentonan riba decisionnan cu gobierno anterior a tuma cual a afecta e hendenan cu awe a haya carta di retiro.

“Nos a haya nos cu hopi sorpresa riba e tereno di personal,” e prome minister a comenta ayera.
E ta bisa sorpresa pasobra e gobierno anterior riba su ultimo dianan despues di eleccion, a core pone hopi hende den servicio di gobierno como ambtenaar. Na momento cu un gobierno bira demisionario, bo no por tuma decisionnan asina mas. Ora bo ta demisionario bo por tuma decisionnan solamente coriente (lopende zaken).”

E mandatario a splica ayera cu por ehempel si por dicidi riba duna aprobacion pa paga salario di ambtenaar den servicio caba, of sigui paga pa AZV y hospital haya su placa pa cubri gastonan medico ora ta demisionario. Gobierno anterior a entrega su retiro riba 21 di september na gobernador di Aruba. Desde e momento eynan nan sa cu nan ta demisionario y cu tur decision cu wordo tuma ta invalido segun premier Wever-Croes kende a sigui bisa ‘toch nan a tuma e decisionnan y ta culpando nos pasobra nos no ta ehecutando nan’. Akinan e mandatario a referi na e cartanan cu a bay pa varios persona cu a wordo hinca den e aparato gubernamental manera ambtenaar, cu no tabata ambtenaar prome segun e ta bisa. “Ta trata akinan di un grupo di hende cu tabata traha na oficinanan di ministernan,” premier Wever-Croes a bisa. Pues ta papiando di hendenan cu riba nan payslip ta para ‘Bureau minister algemene zaken, Bureau minister Financien,’ etc.

A purba acomoda yen hende
Minister Wever-Croes a sigui splica cu e gobierno anterior a bira demisionario, nan a manda tur nan hendenan diferente caminda pa purba acomoda nan. Algun di nan cu tabata importante pa e gobierno a keda acomoda mas trempan den e aña, y otronan cu a keda lubida a purba acomoda na ultimo momento segun minister Wever-Croes.

E hendenan aki cual ta un total di mas o menos 100 persona a haya un carta fin di siman pasa cu ta informa nan cu e decision no por wordo ehecuta. Pa motibo cu atrobe, e ta tuma den periodonan cu no por wordo respeta. Prome minister anterior a reacciona riba esaki algun dia pasa y purba haci un intento pa lanta pueblo riba esaki. Minister actual encarga cu Asuntonan General pues a subraya cu ta importante pa mustra e mandatario anterior cu e ta fout cu su propio pruebanan y actonan.

Minister Wever-Croes a trece dilanti ayera un decision di conseho di minister di Gabinete Mike Eman tuma riba 13 november 2009. E tempo ey a wordo dicidi cu tur decision di gabinete di Nelson Oduber (MEP) a tuma den e periodo prome cu eleccion y periodo demisionario despues di eleccion ta bay wordo declara nulo. A base di esaki e departamento di gobierno a traha un maneho cu aworaki a wordo pues ehecuta. Premier Wever-Croes a trece dilanti un otro documento di 29 di october 2013 riba un otro decision di e gobierno anterior despues di a gana e di dos eleccion. Den e segundo decision aki ta para cu tur esunnan cu tabata cay bao di e shete ministerionan di Gabinete Mike Eman, entrante 30 october 2013 – cu ta e Gabinete nobo – ta bay wordo prolonga ‘voor de duur van Gabinet Mike Eman II’. E otro gabinete aki a vence 31 october di 2017 pues e personanan aki a ricibi e cartanan corespondiente.

No a retira ambtenaar cu tin añanan trahando
Ayera fraccion AVP a bisa cu tin trahadonan cu tin por ehempel 7 of 20 aña trahando cu gobierno anto a haya carta di retiro. E fraccion den oposicion a subraya cu enbes di kita e hendenan aki pa kico e gobierno actual no por djis drecha e asunto y percura pa e hendenan aki keda cu un trabao. E mandatario ta desmenti cu tin hendenan cu tin tanto aña asina den servicio y ta reta parlamentarionan pa bin cu e documentonan aki dilanti si ta e caso.

Premier Wever-Croes: “Nos a wordo tilda cu nos no ta pone e ser humano central. Mi kier pone esaki den contexto: si pa Mike Eman complace cu su capricho politico kiermen pone e ser humano central y laga esunnan mas vunerabel den nos comunidad sigui sufri, mi ta kere e ta fout den bisa anto cu e ser humano ta central.” E mandatario a sigui bisa cu sr. Eman den su declaracion recien a bay un paso demasiado leu na momento cu a bay ataka hefenan di departamento.

“Mi ta bisa sr. Eman esaki: E politico ta ami y abo. Si bo tin algo di bisa mi ta reta bo pa ban papia di dje. No core manera bo a core pa e debate politico, ban debati di dje. Ami y abo anto laga e hefenan di departamento cu ta profesionalnan afo. No baha bo mes na nivel di bay ataka hende cu bo sa no por contesta bo bek.”