Nos tin un siman… Pa yega na acuerdo razonable…

Mester bisa cu e bishita di nos Promer Ministro na Den Haag no tabata sin exito. Tin un espacio pa negocia un acuerdo cu ambos por biba cune. Importante si ta pa en berdad logra esey, pasobra loke no a cambia ta e situacion, unda keda sin acuerdo no ta un opcion. Esey no mester splica ningun hende na Aruba.

Si nos a comprende bon, un di e puntonan cu ta keda molestia ta cu e ley di supervision di Reino, originalmente traha ‘tailormade’ pa Curaçao y Sint Maarten. For di nan situacion di saneamento di debe, e ta diferente cu esun di Aruba. No pasobra Aruba no tin un debe mes of mas halto cu esun di Curaçao e tempo aya, pero pasobra den pasado caba (2015) a cay e decision cu Aruba lo mester bay sanea su propio debe den e decadanan nos dilanti, y cu esey por requeri/hustifica un otro maneho cu di e otro islanan. Basicamente esey por significa cu no ta bin tanto cambio den e actual regimen di supervision, loke por haci esey mas aceptable pa parti di base di apoyo politico di actual gobierno. Di mes no tin espacio pa e cabeznan cayente cu no kier supervision at all, esey absolutamente no ta un opcion na e momento aki.

Ta importante remarca cu henter e punto aki lo no tabata riba agenda mes, si aña pasa e partidonan cu ta sostene gobierno lo a pasa e cambio di ley di supervision manera cu nan Promer Ministro a palabra, pero manera nos por corda bon, mester a proba cu “Parlamento ta e organo mas halto; ta nos ta dicidi”. E Hulandesnan no a lubida cu nan a keda sin e cambio di ley palabra, cu hunto cu e cumplimento cu e normanan stipula conhuntamente lo a crea un otro ambiente pa e deliberacionnan di e momento aki. Esaki ta haci cu actualmente ta solamente posible negocia algun aspecto di e ley di Reino, pero e resultado final lo ta cu Aruba lo acepta bay bao di e ley, a cambio di acceso na e financiamento necesario pa sobrevivi e actual crisis. Es decir cu den e setup principal, despues di tanto zundramento, e ley di Reino lo ta nos futuro den e proximo añanan y no e tan anhela ‘Begrotingskamer’ cu e coalicion tabata ambiciona. Esey lo keda posponi te despues cu e añanan di supervision aki keda conclui.

E otro punto duro den e negociacion ta e entidad supervisor di e fondonan cu Hulanda ta pone disponible, unda realmente no tin un base tampoco pa keda nenga esaki. Den pasado caba Hulanda a pone placa disponible como ayudo di desaroyo, y a administra esakinan conhuntamente, manera mester ta. Sin embargo, nos ta comprende cu den e caso aki, Hulanda a tuma e iniciativa pa e persona o empresario individual tambe por yega na financiamento, sin cu gobierno ta intermediario, cu den cierto caso ta resulta un filtro politico. Nos por conclui aki cu nan tambe a siña a traves di aña ta con e clientelismo politico ta funciona riba e islanan aki y ta mustra cu nan kier kibra cu esey: pa e politico di mala fe un derota, pa mayoria di nos ciudadanonan un oportunidad extra.

Otro aspecto importante di e entidad aki, cu finalmente Aruba ta bay acepta tambe otro siman, ta cu e terenonan unda Hulanda ta mira cambio necesario, ta cosnan cu gran parti di e comunidad tambe ta mira como necesidad. Como un di asuntonan mas penoso pa ehecuta lo ta e deseo di Hulanda pa reduci e aparato gubernamental cu 1500 persona, loke ta parce factible y sin perde efectividad organisatorio. Den e documento Hulandes (Landspakket Aruba) ta menciona un intencion pa baha gasto di personal di gobierno di Aruba bao 10% di su GDP. Esey ta menciona como average di Caribe, pero en general ta un average hopi halto cu pa añanan caba ta preocupacion di instancianan internacional. Cu otro palabra, nos no por tuma e 10% ey como un meta final pa alcanza. E ta duna si un indicacion cu e actual factura total di gasto di personal ta por lo menos Afl. 200 miyon di mas. Esey ta exactamente e placa cu nos falta pa cubri otro necesidad. Pa sanea esaki si ta necesario un plan cu ta abarca varios aña, muy probablemente mas di un periodo di gobernacion. Esey lo implica cu e proyecto facilmente ta core te final di e proximo periodo di gobernacion, cualkier gobierno cu lo tey pa e tempo ey.

Un di e aspectonan cu ta genera menos entusiasmo cerca nos ta e plannan pa flexibilisa mercado laboral. Aki por mira cu e Landspakket no ta mucho mas cu un resumen di cosnan cu por haci; nos a spera mas di nan. Ta bisa cu mester flexibilisa leynan laboral, como si fuera contrato ‘on call’ y uitzendbureau nunca a yega Aruba. E clima empresarial tin hopi mas di sufri di e ineptitud y lentitud di e operacionnan gubernamental cu di e flexxibilisacion di leynan laboral, na nos parecer. Pero nan no por sa tur cos… Pesey, ki dia nos mes ta cuminza en serio discuti nos problemanan, y stop di papia di Hulandes cu kier bin haci nos trabao?