Parlamento cu ‘reces’ no oficial desde fin di augustus…
Despues di e turbulencia na Parlamento dia 27 di augustus ultimo, a bira keto eybanda. Por cierto cu tabatin ainda apertura di aña parlamentario riba di dos diamars di september, pero despues di e evento di disfraz aki, cu tambe a bira parti di e cantidad di ‘tradicion’ cu nos a adopta den nos cultura benevolente, a bira berdaderamente keto. Trafico dilanti e edificio a sigui mes pega, pero esey no tabata pasobra tabatin algo di interes tumando luga.
Riba un pregunta di prensa al caso, presidente di Parlamento a contesta cu e parlamentarionan ta ocupa cu e cantidad di comision cu Parlamento conoce. Esey ta berdad, pero no ta kita afo cu nos mester puntra con ta para cu e tarea clave di Parlamento, esta trata y aproba ley (y cambio di ley). Por ta cu esun cu no ta asina bon informa ta pensa: “net bon, menos ley pa nos ta menos molester… Ley nobo semper ta costa placa y cerca ken nan ta bin busca esey?… Exacto.” Pero lamentablemente esey no ta asina. Pa por dirigi nos pais bon, no solamente mester traha ley nobo, pero tambe mester adapta ley existente pa nan ta al dia y ta sirbi e proposito cu nan mester tin awendia. Regularmente nos ta tende di leynan di mas di un siglo bieu cu no tin fin pa yega un oportunidad pa modernisa nan. Esey ta un realidad grandi y por cierto e ‘stuwmeer’ (dam) di proyecto di ley cu ta wardando turno ta impresionante, posiblemente banda di 300 diferente caso. Tin di nan ta trata cambio relativamente simpel den un ley; otro ta cambio mayor o hasta volumen completo di cierto Codigo, manera e famoso ‘Boek 2 Burgerlijk Wetboek’, cu na Aruba so no a conoce un version nobo ainda. E volumen aki di Codigo Civil ta trata derecho relaciona cu e ‘persona huridico o legal’, cual ta e fundacion, asociacion, NV, VBA, AVV, etc. Tin un comision trahando riba esaki pa varios aña caba, y ta di spera cu den curso di 2016 por yega na entrega un proyecto di ley cla pa cana su caminda pa yega Parlamento. Lo ta unfair pa pensa cu e tardanza ta pasobra e comision no ta funciona, mester considera cu ta persona di diferente area di trabao den sector publico y priva cu den nan tempo liber ta duna nan conocemento pa cumpli cu e tarea aki. Esaki djis como un ehemplo di e trabao cu ta ser haci den silencio y sigur sin gana ningun compensacion pa esaki.
En todo caso esaki mas bien como un ehemplo di e cantidad di proyecto di ley den preparacion. Anto, kico ta e problema cu ta haci cu pa lunanan largo caba ningun proyecto di ley ta yega Parlamento, pasobra ta facil pa criticanan cu nan tambe a bira ‘parttimer’, pero si no tin nada den ‘pipeline’, anto Parlamento no tin nada pa trata. No pa prome biaha nos ta pone enfasis riba e falta di hurista specialisa den legislacion, cu lo por atende un volumen mas grandi di proyecto di ley. Si esey tabata e caso awor, lo por a manda otro proyecto di ley cana e caminda via Raad van Advies pa finalmente yega Parlamento. Asina ey lo por a probecha di e bashi cu a cay pasobra ni presupuesto 2016, ni e leynan fiscal cu tin pensa di renoba, no a drenta e proceso ainda, cu mester tuma luga despues cu Conseho di Ministro duna su aprobacion. Mientras tur hende ta den suspenso pa loke ta e presupuesto y e leynan fiscal, henter e makinaria di legislacion ta paralisa, cu excepcion naturalmente di Direccion di Legislacion, cu ta man na cabes cu e dos proyectonan grandi aki.
Pa recapitula: critica na adres di Parlamento no ta hustifica anto, pasobra nan ta ‘end of the line’? Nan simplemente mester warda te ora algo cay den nan letterbox pa nan bay traha? Sigur cu no, pasobra nan mes por a formula y vocifera e critica aki, cu e medio di comunicacion aki ta duna nan gratis awe. Ki dia nos ta bay tende nos parlamentarionan, di banda di gobierno como oposicion, ta cuminsa tackle e situacion aki cu ta haci cu nos Parlamento tin un performance bao di nivel, pa loke ta cantidad di caso trata pa aña solamente; nos no ta ni papia nivel di debate aki. Y, manera nos a yega di trece dilanti anteriormente, ta necesario pa mehora henter e trayecto, di su prome preparacion na e departamento di legislacion, cu apoyo serio y leal di otro departamento envolvi, un tratamento diligente y al caso den Conseho di Ministro, y apoyo adecua na Raad van Advies pa por atende un fluho mas grandi di trabao. Finalmente, un apoyo mas grandi y di miho calidad pa tur e partidonan representa den Parlamento. Nos por laga e cos manera cu e ta tambe, y laga e parlamentarionan disfruta di un vacacion extra cu nan no a spera (y no merece), pero esey ta lo corecto pa haci?
