Awenochi lo tin otro evento den cuadro di e esfuersonan di e actual gabinete pa stimula y practica bon gobernacion, den tur aspecto. Un momento importante pa evalua unda nos ta para awor aki. Nos ta algo mas cu un aña cu un gobierno nobo, cu tin e metanan di cambio pa bon gobernacion bon fiha den su plan di gobernacion 2017 – 2021.
Ta interesante pa mira kico a logra pone cana caba. Di un banda no por spera milagro den un tempo relativamente cortico, di otro banda lo mester tin algo concreto pa mustra caba. Y loke mester mustra no ta solamente declaracion di bon intencion; di esey nos a tende suficiente caba. Ta bira tempo pa hunto cu ripiticion di bon intencion nos cuminsa mira unda e proyecto ta hiba nos.
Na prome lugar e intentonan pa yega na bon gobernacion lo mira accion concreto den e creacion di algun institucion cu mester bay carga e proceso. Asina tin pensa di crea tanto un Oficina di Integridad (Bureau Integriteit) como un Camara di Integridad (Integriteitskamer). E prome ta pa atende e proceso di mehoracion dentro di e aparato gubernamental, cu apoyo na e departamentonan, cu curso y guia den e proceso. Den esey no tin nada controversial, asina leu cu nos por tin bista riba e forma cu esaki ta bay tuma. Por ta cu por a mustra un poco mas diligencia, pero poniendo esey un banda, ban spera cu e lo por duna su fruto. Awor, djis spera cu tur cos ta bay bon no ta realmente e manera pa nos como prensa y e publico en general mester sigui e progreso cu e proyecto mester tin.
Cuminsa cu algo anto cu no ta asina comun den gobernacion di Aruba, den ningun di e gobiernonan cu a goberna te awor: transparencia. Esey no lo sucede asina facil, al y al cabo gobierno(nan) ta haya masha lihe cu algo ta pa nan ‘insidernan’ so y no pa conocimento general. Honestamente, nos no ta mira tanto diferencia cu gabinetenan anterior den esey. Pero laga nos ta optimista, tin tempo ainda pa cambio, y nos por haci algun sugerencia pa mehora esaki y cu ademas no ta costa gobierno un cent preto: cuminsa cu pone tur entidad estatal responsable pa publica nan relato anual completo y na tempo. Pa e entidadnan empresarial liga na gobernacion esey ta implica nan cuentanan anual tambe. Nos no por sigui den e situacion unda nos ta cu nos ta canando hopi atras compara cu otro paisnan, pa no yama nos situacion hasta retrogado.
Pa nan sorpresa nos politiconan lo ripara cu mundo lo no caba, ni tampoco e plafond ta bin cay riba nan cabes. Tin varios entidad cu ta cumpli cabalmente cu nan responsabilidad den esaki y nos no tin gana di tende di e gabinete actual ta kico ta nan argumento pa no publica tur cuenta anual relaciona cu gobernacion. Si no por cumpli cu e simple tarea gratuito aki, no tin di invita nos mas pa bin scucha charla bashi tocante bon intencion, cu manera bisa anteriormente, nos a scucha suficiente caba.
Otro tereno unda ta spera cu lo ta bin cambio proximamente, ta den e procesonan di destaho publico y incluyendo destaho cerca e entidadnan legal liga na gobernacion. Por ehemplo obranan grandi cerca e entidadnan aki, manera e proyecto grandi na aeropuerto di cual algun tempo pasa a anuncia cu a keda cla cu e proceso di financiamento, pero no a tende nada realmente ta con esaki a bay. Nos no por evalua ni valora e rumornan cu a surgi despues, inclusive e rumornan alrededor di e retiro repentino di e director. Tur esaki por a evita dunando claridad y transparencia, y na tempo. Pregunta na gobierno ta awor: mester warda te algun dia tin un Camara di Integridad pa acompaña y investiga, si ta necesario, e tipo di proceso aki? No ta posibel pa cuminsa caba cu impone cierto proceso obligatorio transparente pa e entidadnan aki, den linea di bon gobernacion corporativo? Of ta net e proposito pa warda te ora tur e destahonan grandi pa e periodo di gobernacion aki caba di pasa, pa despues bin cu regla?
E motibo pa trece e inkietud aki dilanti ta cu nos no ta mira, banda di e declaracionnan di bon intencion, tanto cambio den e mal custumbernan gubernamental cu nos mester a soporta pa tanto aña caba. E patronahe politico, e nepotismo den gobernacion, e yenamento di cuponan disponible cu persona di cual nan merito mas grandi ta cu nan a campaña na 2017… De paso a consumi practicamente tur e espacio financiero cu tabatin mester na diferente departamento pa contrata cuadro profesional cu ta indispensable pa mehoracion y desaroyo di e trabao gubernamental.
Kico ta e resultado di tur esaki? Cu nos ta mira hopi bon intencion, sin ningun duda, y paralelamente e bida y practica politico di antaño ta parce di ta sigui nan caminda, sin ningun aparente obstaculo. Como comparacion: bo no por traha ley so; bo mester pone polis traha tambe. Cuidao cu nos cayanan no termina pavimenta cu bon intencion, pero no ta ataca e malesanan mes den e aparato.
