Aunke recientemente nos a toca e tema aki na varios ocasion, nos ta sinti cu nos mester dedica atencion atrobe na e asunto aki. E motibo directo pa haci esaki ta e informacion troci cu ta aparece den medionan digital Venezolano (anti-Maduro; esey no ta problema), cu ta trece noticia tendencioso tocante e situacion di refugiado na nos isla den un ambiente bastante hostil y agresivo. Den esaki ta papia ampliamente di violacion di derecho humano di e refugiadonan, di tal forma cu bo ta casi kere cu ta miho nan a keda na nan propio pais, pa nan no mester a sufri tanto maltrato na man di e autoridadnan di Aruba.

Nos ta kere cu e forma di duna informacion aki no ta yuda, no pa informa hende na Venezuela, ni aki na Aruba. Nos ta bay splica pakico, pero laga nos cuminsa cu bisa cu no ta nos intencion di defende autoridadnan di e pais aki; nan mes por haci esey. Pero no ta corecto pa divulga informacion simplemente incorecto, cu ademas ta duna e impresion di ta procedente di hende riba e isla aki, cu ta yuda divulga e informacion incorecto o incompleto aki. Algo cu no por keda sin contesta, y tambe pa duna e situacion real di e refugiadonan na Aruba.

Te recientemente ta masha poco hende tabata haci uso di e posibilidad di pidi asilo na Aruba. E gran, gran mayoria tabata simplemente yega aki, via aeropuerto y no a sali mas. Un minoria a yega via lama y costa, y tambe tabata desaparece, pa bista di hende en todo caso. Desde ultimo parti di aña pasa, pero specialmente den e prome parti di e aña aki, tin hopi mas peticion pa asilo, centenares. Gobierno hasta a tuma medida formando un ekipo special di funcionario publico cu tabata den e “overtolligheidspool” y cu a haya training special pa atende e fluho grandi aki di persona na Aruba cu a entrega peticion.

Den e edicion tendencioso di e programa digital na cual nos ta referi (Plomo Parejo di Ivan Ballesteros) ta bisa entre otro cu e funcionarionan aki no sa nada y cu nan no tin conocimento di derecho internacional, etc. E pregunta ta: ta con e por sa kico nan sa o laga? E contesta ademas den e caso aki ta masha simpel: nan no mester sa tanto tampoco, pasobra loke nan ta haci ta yuda e personanan aki pa yena nan papelnan (standardisa) pa completa nan peticion. No ta e personanan aki ta huzga ken ta haya asilo y ken no. Ya cu nos a yega na e punto ey, nos mester ta masha cla riba e asunto aki: un gran mayoria di e personanan aki lo no cualifica pa e status di refugiado pasobra nan tin bastante tempo caba na Aruba, hopi di nan hasta un aña of mas. Nan no a notifica ningun autoridad na entrada, sea cu nan a drenta na aeropuerto of no. Mayoria di nan tin un lugar di keda caba, asina ta cu nos no tin e problema (ainda) di hende cu ta yega aki desampara, sin recurso financiero ni lugar di keda. Den caso asina autoridadnan mester cumpli cu e tratado y mester percura pa e hendenan aki no keda sin dak riba nan cabes. Un pregunta masha simpel: nos ta mira e hendenan aki ta drumi riba caya? No, nan tur tin lugar di keda, sea cerca famia o amigo, pero no tin un situacion di emergencia, cu ta exigi accion inmediato pa gobierno percura pa albergue pa e personanan aki. Tambe, pa loke ta e cantidad di persona cu a pidi asilo compara cu e grupo cu no a haci esaki, nos por bisa cu bastante certeza cu pa cada peticion di asilo tin diez (10) otro cu ta keda aki como ilegal.

Cu esey nos no ta boga pa no prepara pa un situacion di berdadero emergencia. Cualkier momento un situacion asina por surgi y nos no ta asina convenci cu tur cos ta regla pa tal calamidad. Sin embargo, kico ta loke por spera di nos autoridadnan den e situacion actual? Algun cos, hopi simpel. Uno, atende tur caso di peticion di asilo ‘by the book’. Esaki ta encera tambe cu hende cu a cana henter e proceso y no a haya asilo, lo mester bandona e isla. Banda di esey, tin e grupo grandi di hende cu ta(bata) keda na Aruba clandestinamente y nunca a haci uso di e posibilidad di pidi asilo. Esaki ta implica tambe cu mayoria di e hendenan cu ta deteni pa deportacion, no ta cualifica como refugiado y ni sikiera ta den tramite pa esaki. Cu respet pa tur nan derechonan, tanto den libertad como ora nan ta deteni, mester tramita nan salida di nos pais.

Dia cu yega na nos oido, o nos haya prueba di maltrato, o di expulsion di hende cu ainda ta den tramite pa asilo, nos lo ta e prome pa denuncia y critica esaki. Esaki ta haci cu di mes nos ta keda sigui criticamente e acontecimentonan riba e tereno aki, tambe ora ta trata di e medionan progresista anti-Chavista na e pais bisiña. Mal informacion nunca a yuda ningun hende.

LJMADURO – 23-APR-2019