Nos tin poblacion… Pa haya mas polis…?

Regularmente nos ta haya señal cu nos pais ta tocando e limitenan di capacidad pa atende cierto necesidadnan cu servicio publico specializa ta presenta. Tin escasez riba varios tereno, unda ta trata di personal na nivel profesional medio, cu pa gran parti mester por haya nan educacion localmente. Alto Comisario di Cuerpo Policial di Aruba, por ehemplo, a expresa e siman aki su preocupacion pa e subasignacion grandi di e cuerpo. E ta papia di un falta di como 50% na personal, pa un gran parti den e parti operacional. Esey ta serio, pero no ta bin como sorpresa; e falta cronico di personal den cuerpo policial ta bon conoci pa hopi tempo caba. Y no solamente cu e ta conoci, e opcionnan pa realmente remedia e situacion aki ta limita, di manera cu den ultimo añanan no a presenta solucion tampoco. Esaki tin como consecuencia cu tin un situacion di trabao di overtime den e cuerpo, cu a bira obheto di investigacion cu critica di e overtime, pero no a relaciona esaki publicamente tanto cu e escasez di personal. Mas en general, ta e cuerponan uniforma unda tin caso serio di overtime, cu no por soluciona sin mira e asunto aki den su contexto general.

Mester bisa cu e situacion den cuerpo policial no ta unico. Nos tin por ehemplo tambe e situacion den enseñanza, unda e preparacion di maestro pa enseñanza basico no ta suficiente pa cumpli cu e demanda di e sector aki. Den ambos caso, tin mas ainda, esaki ta conduci na admision di hende den e centronan di preparacion cu no ta cumpli cu e standard minimo necesario. E contesta practico ta pa haci esaki di tur manera, loke ta yama e pregunta si den e casonan aki a largo plazo ta cumpliendo cu e calidad minimo necesario pa e tipo di funcionnan aki. Esaki ta trece nos riba e siguiente pregunta: Nos tin ainda un parti di e poblacion cu por yena e bashi aki ainda, o nos ta yegando na e limite di loke nos tin, na hende prepara debidamente pa inicia opleiding, y cu ta dispuesto tambe pa ambiciona e careranan ey?

Nos ta kere cu nos ta yegando, o a yega caba, na e limitenan di lo posible, y cu no tin manera facil pa crea un base mas extenso for di cual por recluta persona disponible y dispuesto pa sigui e educacionnan specializa aki. Den esaki nos no ta papiando di e eventual popularidad o no di e profesion. Nos ta referi na e grupo cu tin e educacion adecua, plus un actitud y ambicion pa cuminza e carera ey. Di loke nos ta tende pa varios aña ta cu ta explorando caba den e grupo cu ta ‘substandard’ pero cu eventualmente por haya un tipo di upgrading pa por haci e opleiding cu exito. Atrobe, no ban discuti aki e calidad final, pero djis limita nos mes un rato na e aspecto numerico. Y pa esey nos ta bay na loke e cifranan general ta bisa nos.

Riba papel e asunto no ta mustra asina malo, ya cu e grupo cu ta caba Mavo ta e grupo mas grandi den nos sistema di educacion. Tin un grupo di Havo tambe cu no ta bay studia den exterior pero esey ta bastante limita. Pero, den ambos caso e exigencianan ta bay mas leu cu e simple diploma. Pa bira maestro bon conocimento di Hulandes, y Papiamento, ta importante y manera bisa caba, e ambicion y vocacion mester t’ey. Pa cuerpo policial tin otro criterio, fisico entre otro, y e ausencia di antecedente delincuente, entre otro. Nos por di algun manera amplia e grupo aki, es decir, yega na un grupo mas grandi cu ta mihor prepara pa e dos careranan aki? Talvez, pero e ora algo mas mester sucede. Porcierto na november 2022 Conseho Socio-Economico (SER) a publica un conseho encuanto ‘laaggeletterdheid’ na Aruba, unda ta dedica atencion na e fenomeno di hende cu oficialmente tin cierto educacion, pero cu nan falta di dominio, entre otro di idioma, ta stroba nan den nan bida personal y den nan carera profesional. En principio e estudio aki ta dedica atencion na e grupo cu no tin enseñanza primario termina, o no a pasa mas leu cu e promer dos aña di e ciclo basico di Mavo/EPB, cu ta e grupo mas afecta pa e falta di educacion suficiente. Honestamente, nos ta kere cu e problema ta mas serio, pasobra no tur persona cu logra caba Mavo o EPB, tin suficiente ‘equipahe’ pa continua cu un estudio na nivel mas avanza. Nos ta bisa esaki a base di e propio experiencia cu e material humano cu e sistema escolar actualmente ta produciendo. Y ta esaki ta causa, posiblemente, e escasez cu ta presenta actualmente. E analisis di SER ta propone entre otro pa fortifica un cultura di lesamento y e creacion di un centro di idioma pa fortifica conocimento di e grupo aki. Nos no por bay mas den detaye tocante e estudio aki; pa esun interesa, e ta obtenible riba website di SER (ser.aw).

Cu esaki nos ta kere cu por resolve e problema structuralmente? Honestamente: no. Pero ta logico cu sinta cu braza cruza sigur no ta bay yuda. E problema aki atrobe ta mustra riba e cambionan urgente cu mester bin den henter nos enseñanza, cuminzando na e base. E decisionnan clave ta pendiente, y e caminda ta largo. Mientras tanto, polis lo keda traha double shift…?