Na momento cu hopi di nos lectornan haya e edicion aki pa lesa, ya caba lo tin un acuerdo firma entre Aruba y Hulanda, formalisando e ayudo cu nos lo haya den e proximo añanan. Un acuerdo cu pa hopi hende lo por a bin varios luna pasa caba, pero mester a convence cierto forzanan politico cu no tabata kere cu no tabatin otro alternativa.
Nos conoce tur e argumentonan di dilanti te patras, pasobra nos mester a scucha o lesa nan tanto biaha den e ultimo lunanan. Mayoria di e personanan, cu idea modera o mas extremo, no a cambia nada den nan opinion y ta keda fervientemente pro o contra e acuerdo aki. Pa esun e ta keda un forma di ‘entreguismo’ unda nos supuestamente ta cumpra nos salbacion financiero y economico bendiendo – barata – nos autonomia. Pa e otro e acuerdo hasta ta trece bentaha pasobra banda di ayudo nos ta haya reforma den un cantidad di asunto cu, si nos ta honesto, ta malamente pega y cu ta existi pa hopi aña caba, sin cu nos ta mira algun avance. Nos no ta kere cu esey ta bay cambia tampoco, y segun e asuntonan ta sigui desaroya, critica o elogio ta loke gobierno lo ricibi. Esey no ta nos preocupacion tampoco.
Loke ta e mayor preocupacion si nos ta logra crea e cooperacion entre e dos paisnan pa nos probecha al maximo loke tin nos dilanti. Y esaki no solamente, y no primeramente tampoco, den sentido financiero. E bataya mayor lo ta den e cosnan cu nos tin tantisimo aña ta haci di un cierto manera y cu a yega e momento pa cambia esey. Nos ta ripara cu hopi biaha nos ta haya nos den un discusion unda ta pinta un futuro bunita pa nos isla, cu no den tur caso por descarta como soña di dia. Sin embargo, nos no ta dedica tanto atencion na con nos ta bay yega ey.
Un di e discusionnan ey ta e comparacion di Aruba cu e ehemplo grandi pa hopi pais, Singapore. Claro cu lo ta bunita si nos tambe por yega na e dinamismo y prosperidad di e pais chikito ey, pero nos a yega di sinta pensa ta kico nan mester a haci pa logra esey? Si nos djis mira e manera con nan a pasa nan manera di goberna den un proceso riguroso di mehoracion pa por garantisa e nivel di prestacion cu nan tabatin mester pa por maneha e economia cu nan tabata desea, y nos compara esey cu e intentonan cu nos a conoce den e algo mas di 30 aña di gobernacion autonomo, cu practicamente ningun tabatin a lo largo un resultado positivo, anto nos por yega na e conclusion cu tin masha hopi cos di haci. Tur e tempo nos tras nos a haya oportunidad pa hacie nos mes, y e no a sucede. Y awor cu nos ta bay haya ayudo den esey, ta logico cu tin esnan para na banda pa grita cu e Hulandesnan a bin ‘reconquista e isla atrobe’, etc. Esey no ta solamente e reaccion di parti di oposicion, sino di e propio partido grandi den e coalicion, cu por a scucha un di nan coleganan parlamentario yama nos partnernan den Reino pa “pirata”. Naturalmente e tin pleno derecho di bisa esey, si ta na e nivel ey e ta pensa, y sigur den sala di parlamento, y ta hasta bon tambe pasobra ya nos sa con e ta pensa. Nos ta spera si cu e por brinda nos e obhetividad necesario ora e mester huzga e esfuerzonan cu su propio gobierno lo bay emprende hunto cu Hulanda, y tumando na cuenta no di unda nos ta bin, pero den ki direccion nos ta bay. Y e direccion unda nos mester bay ta den un cambio riguroso di e manera di goberna, cu pa un gran parti ta contempla, laga nos cuminza cu reconoce esey, den e paquete cu Hulanda ta propone. Y, un vez mas, no ta cuestion di djis bay haci e cosnan aki manera un mucha recalcitrante cu ta obedece solamente pasobra e tin miedo di e mayor cu ta impone castigo, pero pasobra nos mes ta kere cu nos mester haci esaki.
Y claro cu den loke ta bay pasa den e proximo añanan no ta solamente nos politiconan mester siña hopi, y laga hopi custumber malo tambe, sino cu pueblo tambe mester siña. Por ehemplo, nos mester cuminza siña cu haya trabao na gobierno no por sigui sucede via e mecanismo di patronahe politico, pero a base di cualificacion cu un persona tin, y tambe cu tur departamento tin plan aproba di nan structura y di necesidad di personal cualifica. Esaki ta significa cu lo mester crea un sistema unda no ta e mandatario di turno ta dicidi ken ta empleado publico. Esaki ta exigi di e mandatarionan cu nan ta bay di acuerdo cu esaki y cu nan era di patronahe politico mester pasa pa pasado. Y laga nos ta bon cla den esaki: te dia di awe nos no ta mira tanto esfuerzo pa cuminza remedia e cosnan aki, como muestra di buena fe awor caba. Loke nos ta mira ainda ta nepotismo den gobierno y den e empresanan estatal. Esey no por keda asina. Nos tin un compromiso.
