Pa cualkier comunidad por opera diariamente, mester haci hopi trabao. Un parti di esaki ta tuma luga cu pago, y un parti ta sucede a base di trabao boluntario. Tin ora e trabao boluntario ey ta haya un compensacion parcial den placa, pero mas tanto ta haci’e sin ningun compensacion. Pakico lo un persona haci e trabao ey gratis, talbes pa un simpel ‘danki’, nada mas? Pasobra por ta cu e ta haya importante pa haci’e y ademas e ta haya un cierto satisfaccion haciendo algo cu e ta considera importante of placentero pa haci. Ora nos bisa cu placa no ta tur cos, esey ta conta pa e volumen enorme di trabao boluntario cu ta ser haci den cualkier comunidad rond mundo. Es mas, ta inimaginabel pa comunidad funciona sin e trabao boluntario.
Unda nos ta topa cu trabao boluntario? Deporte ta un tereno importante y diferente tipo di trabao social tambe. Pero tambe organisacionnan cu ta boga pa un medio ambiente mas saludabel, pa conservacion di flora y fauna, cu ta traha pa conserva cultura y historia di un comunidad. Y no mester lubida e personanan cu ta yuda y atende famia y amigonan cu ta den un situacion dificil di salud por ehemplo y mester di atencion cu no tin un instancia pa duna e asistencia ey. Nos ta referi na loke na Hulanda ta yama ‘mantelzorg’, cu a bira tema grandi di debate aya, segun cu gradualmente gobierno ta haya cu no por paga pa tur tipo di asistencia y ta purba pasa e peso pa e cuido boluntario aki. No ta e intencion aki di habri e discusion ey, pero ta obvio cu cerca nos hopi trabao tambe ta cay bao di e concepto aki.
Otro aspecto di trabao boluntario cu no ta haya semper e atencion mereci ta e hecho cu trabao boluntario ta permiti e persona acumula experiencia, no solamente den e ramo di trabao specifico ey, sino tambe en general un persona ta siña traha cu otro persona den un ambiente organisa, ta siña comunica y negocia cu otro instancia y persona pa logra cos cu ta importante pa su organisacion. Un persona cu ta colabora como boluntario den un organisacion cu ta traha cu adicto di droga por ehemplo, no ta siña traha cu cliente di e instancia so, pero tambe con comunica cu instancianan oficial riba e tereno aki, cu autoridad hudicial y di salubridad publico, por ehemplo. Cu otro palabra, un persona asina ta siña con pa haya su caminda den bida organisa di su comunidad.
Esey no ta un enrikesimento di su bida personal so. Un persona asina por bira un individuo mas valioso na pia di trabao, pasobra e ta comprende miho con cierto instancianan ta funciona, talbes e tin contacto hasta cu sector priva den su trabao boluntario y ta desaroya contacto valioso cu por ta di uzo grandi den trabao regular diario. Un persona asina por desaroya experiencia valioso cu ta importante y util den trabao regular, na beneficio di e empresa o instancia unda e ta traha. No semper sa mira trabao boluntario for di e angulo aki. Sin embargo ta importante duna esaki atencion y hasta stimula esaki entre trahado pasobra e ta un manera pa desaroya empleado cu tin un bista mas amplio riba loke ta sucede rond di nan den comunidad y ta yuda crea un trahado cu mente mas habri, cu mas habilidad pa atende problema mas complica na pia di trabao, simplemente un trahado mas completo, mas sigur di su mes y mas dispuesto pa resolve problema sin cu necesariamente mester tin cu papia di biaha di remuneracion financiero. Un trahado cu ta custumbra y ta orguyoso di ‘go the extra mile’ pasobra el a siña e balor di un actitud positivo y di colaboracion.
Ta importante papia tambe di e areanan unda trabao boluntario y trabao paga ta topa. Den tur pais un gobierno ta haya su mes cu e pregunta kico ta e tareanan cu gobernacion mes ta haci como trabao paga. Banda di esey, kico ta subsidia pasobra dentro di maneho di gobierno ta reconoce esaki como trabao importante, pero no ta oportuno pa haci’e directamente bao di gobernacion. Tambe tin e aspecto di trabao boluntario cu tin cierto importancia pa comunidad en general, pero dentro di e tareanan gubernamental no ta reconoci como prioridad. No semper ta logra haya un bista cla kico e maneho gubernamental ta pa cu tur esaki. Tambe nos por a presencia ultimamente cu medida di austeridad ta yega na porta di e instancianan subsidia, sin cu tin un maneho bon formula y publica. E ultimo aki tambe ta importante pasobra por ta cu ta existi un maneho y cu hasta por ta hustifica, pero si no ta haci esaki di conocemento publico, no lo tin comprension pa e consecuencianan di e pasonan tuma.
Nos por conclui cu loke ta haci nos comunidad funciona ta hopi mas cu loke ta tuma luga cu trabao paga y esey lo keda asina. Ta importante pa reconoce esey.
.jpg "Philipine van Aanholt 26 luga prome dia Laser Radial Weganan Olimpico")
