Riba diadomingo 7 di mei nos a participa den e evento di “1000VOZ”. E evento aki a wordo organisa door di Fundacion Mito Croes. Esaki tabata tin como proposito pa duna e pueblo di Aruba bos y participacion directo den fiha e futuro direccion di desaroyo di Aruba. Pueblo a haya oportunidad pa bisa loke e ta desea pa Aruba. Esey ta un forma mas y concreto pa duna contenido na democracia bibo!
E temanan cu a wordo trata tabata sostenibilidad, comunidad, salubridad y economia. Nos por a mira con grandi e entusiasmo pa e evento aki tabata. Hopi hende jong y grandi y di tur parti di nos isla a bini hunto pa trece dilanti nan ideanan y nan opinion riba e temanan aki. Nos a discuti tocante di e diferente temanan den un manera habri y respetuoso, y nos por a scucha opinion y punto di bista di otro hopi otro hende riba e temanan. Cada persona por a trece dilanti nan opinion y duna di conoce kico ta e cambionan cu nan lo kier wak pa cu nos isla.
E ambiente di discusionnan habri y cu tur opinion a haya oportunidad pa bini dilanti, riba su mes so caba tabata bunita pa experiencia. Asina discusionnan riba desaroyo di nos pais mester ta! E evento aki tabata sin duda uno hopi valioso y exitoso. Un di e resultadonan directo tabata cu nos a haya un miho bista di con den pueblo ta pensa riba e temanan importante aki pa nos pais.
Personalmente mi ta contento cu e idea innovativo aki. E ta un evento cu lo por tuma luga cu mas frecuencia. Pasobra e ta duna pueblo e oportunidad di expresa su mes libremente tocante temanan importante pa progreso y futuro di Aruba. Ora cu nos ta scucha loke nos hendenan ta pensa y ta trece dilanti, nos como representante di e pueblo sa cu loke nos haci, ta loke pueblo mes kier. Di e forma aki nos ta traha hunto cu pueblo y actua di berdad den nomber di pueblo, pa pueblo! Esaki ta e unico forma real pa progresa y crea e Aruba cu nos tur ta desea.
