Secretario di estado pa asunto di Reino a haya hopi reaccion rabia ora el a bisa cu e islanan aki no por maneha nan autonomia. Nos por constata cu despues di e incidente ey aparentemente nos ta haciendo nos best pa proba cu Knops tin razon.
Y por lo pronto nos ta sigui haci esey, pasobra e drama Lopez Tromp ta birando un berdadero ‘soap’. Pa colmo, henter e asunto, cu di mes caba ta stroba gobierno traha normal, awor a bira motibo pa gobierno bisa cu nan ta “tranca” y cu por lo tanto nan no por tuma decision den casonan di mas peso, entre otro pa loke ta regarda e contesta cu mester duna Hulanda riba e pakete di medida di reforma cu nan ta propone pa e proximo añanan. Y mara na esaki naturalmente e financiamento di nos emergencia actual, cu ta absolutamente necesario pa nos economia sobrevivi.
Mientras tanto Aruba ta den gara di un conflicto entre miembronan di e mesun partido, cu a haci e asunto bira algo di nos tur, pero nos no ta lamenta esey, y pakico no? Pa loke e ministro a trece dilanti cu a habri e discusion tocante e asuntonan di corupcion y nepotismo, cu nos tur ta comenta pero casi nunca por haya prueba palpable pa esaki. Awor un insider a papia.
Mientras nos por ta contento cu esey di un banda, di otro banda e problemanan ta sigui montona. E problema ta leu di ta resolvi, pasobra lo bin un otro intento di mediacion, pero sin ningun garantia pa un solucion final cu por carga aprobacion di tur.
Ademas, tin otro asunto cu por bira un problema entre e partnernan di coalicion. Un di nan por ta cu, manera varios persona di partido MEP a trece dilanti y a haya confirmacion di Promer Ministro ayera, ta cu e partido mas grandi den e coalicion ta haya cu e partido menor no lo haya oportunidad pa propone un ministro nobo pa e puesto vacante, si acaso ministro Lopez Tromp mester haya su retiro. Ta dificil pa imagina cu e partido ta bay di acuerdo cu e ponencia ey, pasobra esey lo significa cu henter e pleito lo tabata en vano. E idea tabata, segun nos opinion, pa logra pone un persona den e posicion ey cu si ta bay haci e cosnan cu e ministro actual a nenga di haci, desrespetando e ‘reglanan di wega’ di nos politica corupto. Esaki sigur ta un scenario cu e lidernan di e partido, cu o sin participacion di e lider di cual ta bisa cu e tey ainda, no a spera Naturalmente el a reacciona inmediatamente pa desmenti esaki; nos mester kere cu e ta un ciudadano comun y coriente. Nos por kere esey, si di awor en adelante e haci exactamente esey. Time will tell.
E perspectiva nobo aki, di por participa den gobierno pero cu un cartera menos, no ta parce nos suficiente base pa continua den gobierno. Esey pa varios motibo. Uno ta cu acepta e forma cu e partido grandi kier hunga e wega, ta hinca e partido menor den un posicion mas debil ainda, tambe den vista di publico. Y di mes caba nan posicion no ta di gaba, pasobra opinion publico pa gran parti a scoge banda di e ministro. Tur esaki ta haci nan posicion mas dificil ainda, mientras cu e opcionnan di antemano no tabata asina bon. Talvez na inicio di e conflicto tabata parce facil pa pensa cu ta logra kita e ministro for di su puesto y instala un otro cu si ta bay cumpli cu loke ta spera di e mandatario den e posicion specifico ey. Nos ta un poco dia despues y e opcionnan ta mustra mes o mas malo ainda.
Kico ta e opcionnan? Por forza un decision den parlamento, den e sentido cu ta yega na un mocion di desconfianza aproba, y e ministro ta baha, pero no tin otro ta subi…Esey ta trece cune cu mester cuminza e bataya cu e partner grandi den coalicion, cu awor caba a mustra un otro opinion. Kico por haci? Menasa un biaha mas, loke no ta facil, pasobra e ta di dos ocasion cu e partido mester bay logra su gana, menasando cu baha gobierno. Diabierna pasa a bira caba bastante cla cu e chantahe pa e partido grandi ta yegando na un limite. Di e manera aki e cartanan cu ambos tin riba mesa, ta e mesun cu na comienzo di e wega. Ta mas cu claro cu esun cu ta bay tumba gobierno mientras e pais ta den e crisis mas grandi di su existencia, no lo por conta cu ningun simpatia cerca e pueblo votador.
Y esey si ta bay tin eleccion… Si nos ta permiti un partido, cualkier cu e ta, pa den e momentonan dificil aki actua di tal manera contra nos interes como ciudadano, esey por provoca cu gobierno di Reino ta bay un stap mas leu cu nan a bay awor cu nan entidad di supervision. Si di berdad nos politiconan ta kere cu nos ta digno di autonomia, awor ta e momento pa demostra esey. Percura di no duna Knops razon cu nos no por run e lugar aki.
