Nos ta prepara pa e crisis na Venezuela?

Cada tanto tempo nos ta practicamente obliga di evalua e situacion cerca nos bisiña grandi cu ta parce di bay collapse, pero ainda esey no a sucede. Den e dianan aki tabatin bishita di ministro di asunto exterior di Hulanda, unda sigur e tema Venezuela tabata na top di e lista. Tempo pa realmente nos actualisa kico ta andando, aunke nos no conoce e detayenan di e combersacion cu e ministro Hulandes, ni di e entrevista cu e delegacion di Citgo, cu lo a papia cu nos mandatarionan. Asina mes ta posibel pa destila kico ta e posicion cu na e momento aki gobierno Hulandes ta maneha pa loke ta Venezuela. Den esaki sigur por ripara un cambio. Di e actitud cuidadoso di par di aña pasa, unda tabata parce cu no tabata kier nada pasa cu por a stroba e bon relacion cu e regimen corupto aki, pasobra tabata pensa cu na dado momento por tin cierto beneficio economico, pa Hulanda mes o pa empresanan Hulandes, cu mester tabatin prioridad. Esey a cambia, tambe bao di influencia di Union Europeo, unda ta parce cu a yega na un consenso cu lo bin temponan miho, pero esey lo ta despues cu e regimen aki desaparece. P’esey e sancionnan, ademas cu e presion di Merca den esaki, unda por cierto hasta Suisa a join e medidanan tuma contra e ladronnan grandi di e regimen, cu a kere cu nan miyones y biyones tabata bon warda na e pais aki.

E pensamento ey, cu cos lo drecha na su debido tempo, dia tin un gobierno normal atrobe na e pais ey, ta haci cu e situacion di comunicacion y intercambio economico lo keda paralisa por lo pronto. Pa nos como e bisiña mas cerca di Venezuela, no ta keda nada otro cu tuma esaki como un hecho. Cu esey, sin embargo, no a keda resolvi e asunto di ken ta responsabel pa e eventual refugiadonan cu nos por haya na momento cu cos bira cayente di berdad aya. Y e momento por ta cerca. Dia 20 di mei e regimen dictatorial ta organisa eleccion pa nan mes, cu un ganado sigur: Nicolas Maduro. No lo ta solamente e fervor electoral y e rabia di esunnan cu ta sinti nan margina lo ta factor importante. Tambe e deterioro economico cu ta sigui cu paso gigantesco den direccion di e collapse total di e sistema economico. E hiperinflacion cu a cuminsa aña pasa rapidamente ta caba cu tur salario, y ta haci e intentonan di adaptacion di e salario minimo mustra ridiculo, loke nan ta tambe. Si bo salario subi cu 100% y di un balor di 3 dollar e bira 6, ainda bo no por cumpra cuminda pa cria bo famia, asina simpel.

E situacion actual ta cuminsa haya e caracteristicanan di otro casonan di hiperinflacion riba continente Americano di den pasado, unda e moneda local a bay, di casi paridad cu e dollar, pa devalua te na varios miyon pa un dollar. Den cierto caso, manera na Nicaragua na aña 1989, a scoge pa print e biyetenan di nobo, añadiendo tres o mas cero. Papel di 100 asina a bira di 100.000 di nochi pa mainta, pero esey no a yuda. E escogencia di e cartel di Maduro pa kita tres cero y emiti biyete nobo tampoco ta yuda. Nos no mester ta economista pa comprende cu si gobierno ta sigui print placa, y economia ta cayendo den otro, e placa no tin balor, sigur no den relacion cu e productonan importa, cu ta birando dia pa dia un parti mas grandi di loke tin disponibel pa cumpra.

Manera nos a yega di bisa caba den un editorial anterior, na e momento aki no ta relevante mas kico oposicion ta haci o bisa, igualmente kico gobierno di Maduro ta haci o bisa. Punto ta cu ningun hende no por bira e oloshi pa otro banda; e caida economico ta ireversibel. Esaki ta keda miho ilustra cu e caida di e empresa cu ta realmente e life vest cu tin cabes di e pais riba awa, ainda. Pdvsa a caba di cera luna di maart cu otro caida di 100.000 bari pa dia di crudo cu no a sali for di tera, lagando e produccion actual na menos di 1,5 miyon bari pa dia. Pa colmo, procesamento di crudo na e pais a cay te na 30% di e capacidad, pa varios motibo: no tin crudo, no tin instalacion sano mas cu por opera, no tin personal cu experiencia y no tin placa pa drecha nada. Den e situacion aki, con relevante por ta loke un delegacion kier bin conta nos encuanto e refineria?

Den e situacion aki, unda tur cos ta parce di ta cay den otro pa nos bisiñanan, ainda tin hopi politico na Aruba cu of no ta lesa corant of busca noticia riba internet, of ta aparenta di no comprende e situacion. E unico beneficio cu nos a haya di e actividadnan na e refineria, ta cu nos a keda cu un bunita mancamp pa pone refugiado aden. Ban bisa cu nan tabatin miho bista pa futuro cu nos mes…