Den un entrevista cu Juan Francisco Pardo cu Bon Dia a haci recien el a splica con e idea di Ciudad Oraño a bin. Esaki lo ta e prome novela/serie cu lo presenta na Aruba y esaki lo keda presenta dia 1 september venidero.
Sr. Pardo ta splica cu e idea di Ciudad oraño tabata pa cada escena lo tin den e serie ta pa tin algo oraño den dje. E ta bisa esey ta e idea inicial pero el a cay afo pa motibo di budget. Pa no tin budget e ta bisa cu por perhudica e placa no t’ey pa asina logra manera nan kier. “No tur ora sponsor ta coopera cual ta hacie un poco mas dificil.” E ta bisa cu tabata un challenge.
E serie cu lo mustra manera pelicula ta conta cu 5 episodio di 20 minuut. Segun sr. Pardo e actornan a train actuacion y train un script. Nan a haya 100 pagina pa tur actor siña for di cabes.
Pa siña un script ta un dedicacion sr. Pardo ta bisa. E ta bisa cu hopi kier actua, nan kier siña pero tambe nan mester sinti e personahe cu nan lo actua anto tur esey nan ta traha cu hobennan. El agrega tambe cu e actornan di ‘ciudad oraño’ a train henter un aña. “E hendenan ta bay keda sorprendi di wak un bon actuacion. Bo lo keda hinca den e serie. Si nos cuminsa kere mas den nos hende e ora ey nos ta duna oportunidad pa hende por kere den nan mes.”
Mas o menos 50 actor a participa den ciudad oraño asina sr. Pardo ta bisa. E ta agrega pa actornan cu no solamente a tuma parti den actuacion, pero tambe den produccion. E ta splica cu nan tabata activo den cualkier proyecto.
Sr. Pardo ta remarca cu no por haci film na Aruba, mester bay afo sea Hollywood paso ta ‘duda den nos cualidadnan’. E ta bisa cu Aruba tin talento pero, ‘nos mes ta wanta nos mes abou’. Segun e ta remarca cu ta pone un barera den caminda cu ta stroba di explora cada ken su potencialnan. “Nos no ta wak leu, nos ta riba un isla, pero pa tur hoben cu tin un soño nada no ta imposibel.
Tur hende mester por kere den nan mes asina sr. Pardo ta bisa. Un persona por ta na Aruba pero e por ta tur caminda. Segun sr. Pardo pa un persona por yega leu mester tin un bon storia y un bon actuacion pa asina e storia por yega tur caminda.
Tocante e mensahe cu ‘ciudad oraño’ ta bay duna segun sr. Pardo ta heftig ‘e mensahe ta hopi importante’. E ta bisa cu tin diferente temanan manera bullying, problemanan social di famia, entre hobennan.
Sr. Pardo ta bisa cu el a skirbi e serienan aki ora e tabata tin 14 aña. E ta bisa cu 26 aña e parti interesante ta ora el a bin cu idea pa motibo di uza articulo den corant, un di nan cu el a menciona tabata tin un night club unda cu un guy a bin tira un persona cu revolver anto herida otro persona, anto esey tambe ta algo cu a inspir’e hunto cu su problema na scol.
El a agrega tambe cu despues di 26 aña el a spera pa tur e problemanan social a mehora, pero e ta bisa cu el a bira pio. “E ta un inspiracion di bida real, cosnan cu mi a wak ora mi tabata hoben. Hende cu ta comete suicidio. Ainda e cosnan aki ta pasando”, e di.
“Tin un melding prome cu serie cuminsa pa motibo cu tin hende sensitivo pa wak cosnan asina. Tin escenanan fuerte. no ta recomendabel pa mucha wak’e pa asina no crea idea y por tin un influencia riba nan .
Segun sr. Pardo e ta kere cu e serie aki lo bay tin un impacto pa comunidad di Aruba. E ta bisa cu porta algun hende no lo bay gust’e paso e ta fuerte. E ta describi cu e lo ta un ‘eye opener’ pa hopi hende. “E hobennan aki a hacie hopi creibel. Nan ta kere locual nan ta wak. Nan a sinti e personahe y wak e persona.”
E parti di conscientisacion pa e hobennan y nan problema segun sr. Pardo ta pa tur sinti identifica y pa trece solucionnan tambe. E ta bisa cu e serie ta mustra obstaculonan cu ta confronta, pero cu tin un solucion. “Pa tur hende ta consciente di nan accion, pa nan realisa kico a haci cu nan conducta y cu esaki por afecta e resultado di relacion cu un otro persona. E persona ta realisa cu actitud tin cu cambia.”
Na final sr. Pardo a bisa cu hende mester tene den mente cu e ta un storia ficcion ‘e ta inspira pero e ta ficcion’. E ta uza ehempel cu cosnan asina ta pasa den bida real pa asina por evita e cosnan aki pasa na scol manera na Merca. E ta remarca cu e ta un ‘wake up call’. Na Aruba e no a yega di pasa pero e por pasa asina sr. Pardo a finalisa.
