Nos ta paga hopi impuesto…Y kico pa haci…?

Aruba ta paga impuesto, hopi impuesto. Esey ta loke Conseho Consultivo (Raad van Advies; RvA) ta constata den nan comparacion di e peso total di tur impuesto, cu e paisnan di America Latino y Caribe. Nos ta lidera e lista ey. Por bisa anto cu nos ciudadanonan no ta keha sin razon. Y nos por sa di unda e peso grandi aki ta bin. Pa cuminza, nos tin un paquete grandi di tur tipo di impuesto, cu na varios ocasion den pasado tabata obheto di estudio y sugerencia pa simplifica e sistema fiscal. Den ultimo añanan nos no a mira nada di simplificacion, pero si di aumento den e total cu Pais Aruba ta cobra di nos. Esey tabata specialmente e caso na 2023, na momento cu entrada di impuesto di gobierno a aumenta cu 27,7% compara cu 2022. Esey entre otro bao di e impulso di aumento di BBO/BAZV di 6 pa 7% y e introduccion di BBO/BAZV na frontera. Nos ta bisa ‘entre otro’ pasobra e crecemento economico fuerte a contribui considerablemente na e aumento di entrada gubernamental.

Sin embargo, esey no ta kita e realidad di un regimen fiscal pisa, como medida pa percura pa gobierno haya e recursonan financiero pa maneha e situacion financiero preocupante. E pregunta ta si esaki lo mester keda asina. Nos ta kere cu por duna un contesta positivo, aunke no ta uno simple. Kico ta e caso? Manera bisa anteriormente, nos tin un sistema fiscal cu ta parce mas bien un selva di tur tipo di impuesto, unda a pesar di scucha keho y promesa di mehoracion, nada a sucede te awe. Nos por comprende cu tin persona ta pensa cu elimina cierto impuesto ta reduci entrada di gobierno y cu no por haci esaki, a menos cu ta indica di unda si e placa mester bin. Pero nos ta kere cu e solucion, por lo menos pa un parti, por bin di eliminacion di impuesto cu no ta trece tanto aden, pero ta costa mes hopi o hasta mas na gasto di personal y organizacion pa keda ehecuta nan. Finalmente gobierno no ta sali perdi pasobra por reduci e personal necesario pa e tareanan aki. Si nos tira un vistazo riba e lista di impuesto nos por observa idiotez den e era aki manera ‘zegelbelasting’ cu apenas ta genera loke e ta costa na organizacion: Afl. 1,9 miyon… Tambe nos tin un tax ambiental riba carrental cu ta entrega Afl. 0,2 miyon. Pero esey no ta tur; tin hopi mas pa drecha. Por ehemplo, pakico nos mester tin un sistema di impuesto di importacion asina complica? Den ultimo decadanan na varios momento a duna gobierno di Aruba e conseho di simplifica e sistema drasticamente, manteniendo e nivel di loke ta cobra. Resultado? Nada, ni contesta nos no ta haya pakico no. Ta pesey ainda nos a keda pega cu un 22% di invoerrechten riba muebles, mientras cu e hotelnan si ta haya excencion pagando nada ora mester remodela, pero e ciudadano si mester keda lidia cu e impuesto aki cu ta data di tempo di Antiyas, unda tabata duna proteccion na industria di muebles na Corsou. E siglo aki lo yega na un fin y ainda nos tin e estorbo ridiculo aki? Tin mas asunto, manera e supuesto reforma fiscal cu actualmente ta tumando lugar; esey nos ta supone anto pasobra ta parce cu despues di e introduccion di BBO na frontera nos no ta tende nada mas di e reforma. Mientras tanto, ta parce cu gobierno a lubida kico IMF a conseha aña pasa den nan informe: “… e medidanan di impuesto recientemente implementa no ta suficiente pa logra e metanan di presupuesto y mas medida lo ta requeri pa aumenta entrada y reduci gasto recurente.” Specificamente IMF ta conseha reemplaza e actual sistema (BBO/BAZV) cu un ‘VAT’ (BTW). Supuestamente e BBO/BAZV na frontera lo mester ta un paso intermedio pa yega na introduccion di un BTW completo. Sin embargo, nos tin duda cu esey lo bay sucede den e decada aki, a menos cu bin presion grandi di otro banda (Hulanda, IMF) pa logra esaki. Importante ta pa considera cu no solamente un BTW ta conveni gobierno, sino cu e ta medida cu mester pa pone un paro na e efecto inflacionario cu BBO tin. Esey ta nada menos cu un interes publico, di tur hende independiente di cual partido nan ta sostene den eleccion. Te awe e interes ey no por a haya prioridad?

Ora nos ta analiza entrada gubernamental, nos mester contempla tambe kico ta pasando cu e otro fluho di placa cu gobierno ta saca for di comunidad. Na 2024 gobierno ta spera di cobra na dividend y otro beneficio Afl. 342 miyon, 19,8% di entrada total. Pa gran parti esey ta bin di ganashi di entidadnan estatal y semi-estatal, unda pa mayor parti no tin transparencia den nan tarifanan ni den nan aporte na gobierno den forma di dividend, pasobra nan ta biba den e secretismo gubernamental cu nos ta critica regularmente. Por lo tanto ta imposible bisa si gobierno hunto cu e empresanan ta hibando un maneho di cobra nos di mas, loke por considera un impuesto extra scondi, cu ta haci e presion total di impuesto riba e ciudadano mas grandi ainda. Y nos tabata campeon continental caba, segun Raad van Advies… Ta bira tempo pa bin accion berdadero, y pa por tin accion lo mester bin claridad kico realmente ta bay haci cu e reforma fiscal cu a bira un di tanto secreto gubernamental. Asina nos ta sigui?