Nos ta mira… Decision clave pa tuma…

Den nos reflexion di fin di aña nos ta contempla kico a pasa den e aña nos tras y ta purba proyecta loke nos tin nos dilanti den e aña nobo. Nos pensamento awe no ta pa observa loke a pasa den e ultimo aña, pero laga nos tuma un paso mas atras, pa mira si nos ta avansando, compara cu un periodo mas largo nos tras. Un cinco, dies aña, por ehemplo. Y no solamente cu un vistazo riba e cifranan economico general, pero tumando na cuenta otro aspecto tambe, cu ta hunto un indicacion di nos bienestar, no di nos prosperidad so.

Dies aña pasa nos a caba di sali di e crisis economico/financiero di 2008, cu a afecta nos mas fuerte na 2009. Segun e cifranan disponible, na 2014 nos a logra yega atrobe na e nivel di 2008, pa loke ta GDP. Cu e cifranan recalcula di CBS, y recientemente aproba pa IMF y otro entidadnan di supervision, nos ta mira un crecemento economico continuo te 2018. Den porcentahe esaki tabata un aumento di 15,8%, principalmente a base di un 2015 cu a duna un bunita 5,6% di crecemento nominal. Un averahe pa e periodo 2014 – 2018 di mas di 3% pa aña. Un pregunta: nos a sinti esey? Hopi di nos, no. Esaki no pa pone duda den e GDP recalcula cu a duna e aumento aki. Esnan cu a haci e trabao ey y e otronan cu a controla sa nan trabao, nos por supone. Pero crecemento nominal no ta bisa tur cos. Si nos desconta inflacion, nos lo mira cu e cifranan di crecemento real ta mas modera, di 11%. Y tin algo mas: aña 2018 tabatin solamente un crecemento real di 0,9% y ta conoci caba cu 2019 tambe ta bay den e mesun direccion. Esaki bao influencia di e inflacion considerable di ultimo dos aña, y cu 2020 practicamente igual, si nos mester confia e proyeccionnan di Banco Central. No un tremendo perspectiva pero en todo caso hopi miho cu nos bisiñanan di Curaçao, cu ta den nan di cuatro aña di recesion economico.

Esaki ta implica cu nos tin e añanan di relativo bonanza tras di lomba y ta bin algun aña mas dificil? Depende ken bo ta y unda bo ta den nos sistema economico. Si bo ta un empresa bon estableci den sector turistico, perspectiva lo ta bastante bon. Si bo ta un empresa chikito o mediano y bo clientela ta mayoritariamente consumidor local, bo lo ta contando otro storia. Y esaki ta conta tambe pa e consumidor local cu a carga consecuencia di e ahustenan cu gobierno mester a tuma den ultimo dos aña pa logra cumpli cu e exigencianan di supervision financiero di Reino. Y pa e aña venidero nos a haya caba e compensacion den loonbelasting, pero e golpi mes no a bin ainda. Y como cu gobierno lo mester haya mas entrada cu loke e ta entrega na otro banda, esun cu finalmente ta bay entrega ta e consumidor.

Pero nos ta laga e cifranan aki pa loke nan ta pa enfoca riba otro aspecto di nos crecemento. Si di berdad nos economia a crece tanto mas cu instancianan manera Banco Central por a mira cu e instrumentonan cu nan tin, ta con e crecemento a tuma lugar anto? Tabatin un crecemento grandi di empleo, por ehemplo na SVb, unda ta registra tur empleado cu ta traha legal? Por bisa cu tabatin un crecemento bastante grandi, sigur tambe na 2018 y 2019, unda na SVb a registra entre januari 2018 y 1 di december 2019 un crecemento di empleo cu casi 5.000. Algo cu nos tin hopi aña sin mira. Nos no sa cuanto ta debi na accion di inspeccion, cu realmente no ta empleo nobo. Asina mes, nos ta keda cu otro pregunta: si nos tin na ciudadano Venezolano indocumenta so caba mas di 15.000 persona, nos por conclui cu gobierno keto bay ta keda sin haya bastante entrada na prima y impuesto riba salario. Y si nos no tin tantisimo hende ta lastra riba caya, aki no tin e scenario dramatico di lugarnan manera Cucuta, anto nan tin lugar di biba y trabao pa nan paga nan cuminda. Por ta cu e crecemento economico cu a bin constata posteriormente, mientras cu desde 2011 gobierno anterior pa motibonan cu nan so ta comprende, no a laga traha e cuentanan nacional, ta bin probablemente di e entrada masivo di persona ilegal y cu a haya empleo? No ta aki gobierno mester pone su prioridad, envez di sigui impone mas medida riba e ciudadano Arubano mes?

Accion mas severo riba e tereno aki no ta solamente beneficioso pa gobierno mes, sino tambe pa e fondonan di seguro medico y di pension. Pa loke ta seguro medico esaki sigur ta di suma importancia pasobra no ta posible pa contene e gastonan si no ta bin cu medida cu ta afecta o e calidad di cuido mes, o ta exigi un contribucion mas grandi di nos tur. Nos no mester un repiticion di loke a pasa decada pasa, unda gobierno a keda sconde pa decisionnan dificil riba e terenonan aki te ora no tabata por mas. Mester conta pueblo na tempo kico ta bay pasa.