Si nos mira cierto desaroyo for di banda positivo, lo por parce cu por fin nos ta mira algo di diligencia tumando lugar. Asina lo por aprecia e decision tuma den seno di Conseho di Ministro pa pasa e proyecto Traimerdia pa e mandatario encarga cu Asunto Social. Esey en principio ta na su lugar? Nos no sa; cu tempo lo resulta cu esey tabata un bon decision.
Di otro banda, inmediatamente a cuminsa sembra duda ta con exactamente e decision ey a tuma lugar. E mandatario encarga cu enseñansa ta bisa cu e tabatin plan anteriormente pa pasa e responsabilidad pa otro ministerio. Esey por ta berdad, y nos ademas no tin ningun informacion pa desmenti esey, ni nos ta bay haci esfuerso pa eventualmente logra esey. Tampoco nos ta bay profundisa den e otro comentarionan cu ta parce di tin como meta di señala y profundisa e contradiccionnan cu ta rondona e asunto aki. Y pakico no? Pasobra e ta distrai nos di loke ta realmente importante den e asunto aki. Tabata obvio cu e ministro encarga cu enseñansa a logra causa disgusto cerca mayor parti di parlamento, pretendiendo cu hende mester adapta na su interpretacion di loke ta informacion adecua. Nos ta spera cu el a siña hopi lihe cu e cosnan no ta bay asina y cu e ta sigui atende otro asunto di su cartera cu mas comprension pa e epoca den cual nos ta biba, unda ta importante pa duna informacion mas amplio, pasobra e persona promedio di e era aki ta mas custumbra pa maneha informacion y cu ta awendia accesible tambe na un grupo mas grandi y esey ta bon. Acaso no ta asina cu nos ta boga pa un comunidad miho informa, cu ciudadano cu a base di e bon informacion ey por contribui miho na bon desaroyo di nos comunidad y democracia? Y nos no por laga e bon intencion ey na lema y consigna so, berdad?
Sin embargo, cu e cambio di responsabilidad pa otro ministro no a cambia nada den meta, forma di organisacion y actividadnan di Traimerdia. Tampoco nada a cambia den e presupuesto disponible pa e proyecto y ta di spera cu por cuminsa amplia e fondonan destina na mehora y amplia e necesidad grandi aki den e añanan nos dilanti. Ya cu presupuesto 2020 ta den preparacion y ya casi finalisa caba, lo mester tene cuenta cu esaki. Nos no tin idea con grandi aportacion for di e Plan di Crisis Social lo por ta pa e proyecto, ni kico exactamente e acoplamento aki ta bay encera, asina cu nos no ta bay duna un opinion, ainda. Ban spera cu e asunto aki no ta keda unda cu e ta, sin avance.
Tin otro asunto unda nos ta mira masha poco progreso. E rueda di prensa cu e director nobo di Arubus, y su subsidiarionan Aruparking y Arutram, a duna a significa un decepcion, no concerniente e persona mes, nos ta desea su persona y su ekipo tur exito, pero si e preocupacion cu practicamente nos no ta avansando. Tuma por ehemplo e asunto di parkeo den Playa. Ainda no por duna claridad riba e asunto di sancion contra esnan cu no ta cumpli cu regla. Pakico nos ta keda pega den impunidad? Pakico no por simplemente resolve e problemanan legal, si esey ta un di e problemanan señala? Nos no por imagina cu ta un obra di magnitud pa introduci e cambionan necesario. Pero esey no ta tur. E reparticion entre vak liber, vak geel y vak blanco cu ta paga, no ta bay resolve e problema. Den e rueda di prensa di ayera realmente no a bin dilanti un solucion pa e cantidad grandi di vak geel cu ta bashi mayor parti di tempo, mientras otro hende, cu kier paga, no ta haya lugar pa parkeer. Ademas, gobierno simplemente no tin e cantidad di espacio pa logra resolve e problema riba su mes. Kico por ta e alternativa? Purba regla cu propietarionan di tereno apto pa sirbi como parkeo pa bay explota esakinan comercialmente, ofreciendo mas capacidad di parkeo na publico. Ningun parti di mundo resolve problema di parkeo ta un asunto di gobierno so; pakico aki na Aruba nos ta insisti den mira solamente loke supuestamente gobierno mester haci.
Algo similar ta pasando cu Arubus. Ta imposible pa un compania di bus rentable na un isla manera Aruba, cu urbanisacion plama riba alrededor di 100 km cuadra, pa organisa un bon red di transporte, cu suficiente frecuencia pa realmente bira un alternativa pa esnan cu tin auto, pero por opta pa usa bus, si tin servicio confiable y frecuente. E imposibilidad di percura pa linea di bus cu suficiente frecuencia ta duna bida na e fenomeno di loke nos lo yama e ‘Uber Latino’ cu ta efectivo den transporta nan clientenan di cas pa trabao y vice versa. Naturalmente e ta un actividad ilegal, pero si ta asina hende ta yega na tempo na nan trabao, ta parce nos hopi dificil pa para e fenomeno aki, simplemente pasobra nos no por brinda un alternativa. Asina nos ta keda dal vuelta y ta keda pega den mita medida, sin solucion contundente pa e problemanan cu nos tin.
