Manera nos por a lesa y tende den e ultimo simannan, esnan envolvi den turismo ta mustra di ta consciente di e desaroyonan den e sector aki, unda un bon parti di esnan cu ta yega Aruba como turista no ta huesped na un hotel. E fenomeno aki a cobra mayor forsa cu entrada masal di persona di nacionalidad Venezolano, cu hasta por argumenta cu nan realmente no ta turista. Nan ta busca estadia di e forma mas barata y hasta ta keda na cas priva pa scapa di e gastonan di un apartamento, mucho mas ainda di un hotel. Parti di e dollarnan cu nan ta saca no ta pa gasta aki, pero pa hiba nan pais pa uza aya. Utilidad di e estadia di e hendenan aki pa nos economia ta limita.
Pero banda di esaki tin un grupo creciente di berdadero turista di Merca, Canada, Latino America y Europa cu ta bin Aruba pa huesped den otro acomodacion cu no ta hotel, pasobra nan ta scoge pa haci esaki. Nan ta aprecia e tipo di acomodacion aki, pero pakico? Fundamentalmente pasobra nan ta haya asina e oportunidad pa ‘get in touch’ cu e bida diario di nos comunidad pasobra ta esey ta loke nan ta bin busca, conoce Aruba mes. E distancia cu e estadia na un hotel grandi ta crea no ta loke nan ta desea. Nos a yega di toca e tema aki recientemente caba den e editorial aki.
Nos ta comprende awor di declaracion den prensa di e ministro encarga cu turismo cu e ta consciente di e fenomeno nobo aki y e desaroyonan menos positivo di e mercado Venezolano, e di dos mercado mas importante y esun cu a percura pa un gran parti di e supuesto crecemento di turismo den e ultimo par di aña aki. Su contesta ta cu lo mester inverti hopi mas den fortifica e mercado principal cu ta Merca, diversificando e inversion den mercadeo na e pais aki. Riba su mes esey ta parce nos un paso acerta, pasobra no por spera tanto crecemento na e momento aki ni di e mercado Latino Americano, ni esun Europeo. Pero, esaki no ta parce nos suficiente.
Nos no ta kere den inversion solamente den extende bo esfuerso den ‘invita hende bin keda cerca bo’. Esey basicamente ta loke bo ta haci cu aumenta bo mercadeo den e pais(nan) di cual bo ta desea di atrae turista. E ta necesario y mester haci’e, pero… Kico nos ta haciendo pa mehora e producto Aruba mes? Nos no ta papiando di e entrada dilanti waf pa e turista crucero of tur e desaroyo urbanistico cu nos a permiti dilanti e hotelnan. Nos ta papiando di e resto di Aruba, cu su cayanan no asfalta of mal asfalta, sin acera. Casnan completamente converti den ruina cu pa añanan ta para bashi, pisonan bieu unda nunca a caba di traha e cas, anto riba tereno erfpacht, sin cu ningun autoridad ta molestia e doñonan ta ki intencion nan tin. E cantidad di cas sin un cura drechi, yena cu sushedad y auto, frishider y stoof bieu, cacho na cantidad riba caya, etc.
Na inicio di e actual gobernacion por a aprecia cu tabatin hopi mas ekipo di limpieza paga pa gobierno cu tabata percura pa tene e areanan banda di caminda limpi. Aparentemente scarsedad di placa a haci e servicio na comunidad aki sufri, mientras ta gasta miyones yenando oficina gubernamental cu hende pa ken no tin trabao, un escogencia sin ningun sentido. Miho a haci un inversion hopi mas grandi den e fondonan na disposicion di e City Inspector y de paso aumenta su autoridad pa actua den caso di benta sushi unda cu ta.
Tampoco nos no ta mira ningun actividad pa cuminsa atende e mas di cincuenta dumpnan ilegal cu e teritorio chikito aki conoce y ta parce cu gobierno conscientemente kier ta complice di e ciudadano y empresanan na Aruba cu ta prefera di benta sushi otro caminda en bes di hiba esaki unda e mester ta. Pa corona obra, a para e proyecto di converti sushi den ‘fluff’ creando un debe miyonario pa nos haya paga, mientras cu e alternativa di converti sushi den gas pa uza na WEB ta para pa basta tempo caba, sin cu ta duna clarificacion kico por ta e problema den e proyecto aki. En todo caso nos a yega na 2016 sin cu nos tin un politica visibel riba e tereno aki.
Ki dia nos mandatarionan ta cuminsa comprende cu e miho inversion cu nos por haci ta den drecha Aruba, facilitando y exigiendo e colaboracion di tur, pa haci di Aruba e destinacion mas ordena y mas sigur den e region aki. Anto e ora nos por gaba cu nos ta biba den un pais cu realmente ta un placer pa biba y un placer pa bishita. En bes di esey nos tin un Prome Ministro cu tin tur hende cansa cu su papiamento sin contenido tocante ‘sostenibilidad’. Ta bira tempo pa cuminsa implementa en bes di predica!
