Nos ta cera politico… Pero no ta drecha nada…?

Aruba ta na cabez den e ‘competencia’ pa mira ken tin mas politico cu ta bay cera pa corupcion. Den un articulo den nos edicion di ayera nos a resumi e casonan di pasado, pa ta exacto desde inicio di e siglo aki. Si nos a sigui bay mas leu den pasado nos lo por a conta di poco caso mas, pero nos a laga e asunto te ey. En total nos a yega na seis caso di parlamentario/ministro acusa y den cierto caso procesa penalmente caba, den ultimo 20 aña. Di un banda nos por mira esey como algo positivo, pasobra ta actua contra e corupcion aki. Esey no ta kita si cu nos ta keda sinta cu e berguenza cu tur esaki ta tuma lugar den nos pais, mientras nos mester por confia cu nos tin hende na cabez di nos pais cu nos por confia.

Esey ta yama e pregunta tambe ta cuanto caso tin unda cu husticia no a yega bati na porta den marduga… Ta ken ta bay hura cu no tabatin mas caso di corupcion? Ban papia por ehemplo di e trayecto di permiso di estadia/residencia. Tempran den añanan 2000 tabatin e caso di un director di e departamento di stranheria cu mester a duna cuenta di e negoshi cu su casa y yiu tabatin di permiso, y tabata conta cu un ‘open door policy’ na e departamento. Despues nos a haya e caso di e ministro di husticia cu bao presion Hulandes mester a pasa e cartera di admision di stranhero pa su colega, e tempo ey encarga cu infrastructura. Despues di 2009 e cartera di stranheria no a bolbe na husticia, pero a keda hunto cu infrastructura. E siguiente ministro a ser acusa y te awor condena den promer instancia pa corupcion den infrastructura, loke ta bon, pero a yega di tira un vista riba e trayecto di admision? Lo no tabata algo asina straño pasobra un colega a bay cera pa su negoshi cu exoneracion di conseho di labor, e conocido ‘ontheffing’, pero Ministerio Publico a ‘djis lubida’ cu un conseho positivo di labor no ta ‘cumpra’ automaticamente un permiso di estadia… Lo ta bon toch pa haci e pregunta na Ministerio Publico pakico a opta pa laga e parti aki fuera di e investigacion haci. Loke tampoco a haci ta e investigacion riba e corupcion cu placa cu empresanan ta paga na e asina yama ‘maatschappelijke bijdrage’ pa por haya tereno comercial. Esaki ta un practica cu segun nos ta sigui su curso, creando un fluho di miyones cu ta bay na esnan beneficia pa e ministro di turno, mientras no tin ningun control oficial gubernamental riba esaki. Pa nos mantene obhetividad aki, mester bisa cu e ex-mandatario actualmente envolvi como acusado principal den e caso Flamingo, tabata te awor e unico cu a duna un lista grandi di e aportenan di maatschappelijke bijdrage durante parti di su periodo como ministro, cu tabata abarca un suma di mas di cuatro miyon florin. Nos por supone razonablemente cu durante henter e periodo di e practica aki, hopi mas cu e suma menciona a bay pa esnan cu e mandatarionan tabata kier a beneficia, sin ningun control. Acaso no ta bira tempo pa e autoridadnan corespondiente cuminza haci nan trabao? No ta bira tempo pa Contraloria General haya e apoyo administrativo y profesional pa nan por haci e tipo di control aki? Nos ta mira cu cierto ironia con siman pasa ta sali noticia tocante e comision cu mester traha riba independizacion di e tipo di organismo aki, unda gobierno mes ta constata cu no tin mucho avance… Nos ta haya e impresion cu esaki ta destina pa pone nos na soño, o mejor dicho pa nos sigui drumi, pasobra e independizacion financiero no ta bay cambia nada na e cuadro legal dentro di cual por ehemplo Contraloria mester funciona, unda nan no por ni acudi directamente cu un caso, unda nan ta topa cu indicacion di cosnan penal, directamente na Ministerio Publico. No, nan mester acudi na parlamento, unda e mayoria gubernamental ta hari nan den nan cara y ta tapa tur cos… Na cual pais nos a yega di tende di semehante ridiculez? Na cualkier asina yama ‘republica bananera’ riba nos continente un Contraloria General ta hiba caso contra ministro o presidente mes, straight pa Ministerio Publico. Nos tin e caso tambe di e control riba financiamento di partido politico, unda nan tur mester entrega nan cuenta anual na Conseho Electoral, cu no tin ni un secretario. Pakico e cuentanan aki no ta bay pa Contraloria, loke lo tabata e paso logico? Practicamente por bisa aki cu esnan cu a prepara e ley ey ta tuma nos haci, y tur partido a keda contento cu esey, pasobra e ley di financiamento di partido a muri promer cu el a nace. Ta solamente e subsidio cu e partidonan den parlamento ta haya tin cierto control, loke a conduci tambe na caida di e parlamentario cu a bay cera pa malversacion cu esey.

Kico ta e consecuencia di tur esaki? Cu bao presion, y asistencia di Hulanda, ta tumando lugar e casonan aki contra e mandatarionan cu a haya nan mes acusa y den cierto caso condena caba. Pero, nos no ta mira nada ta cambia den control berdadero y efectivo den e procesonan adminstrativo pa preveni mas maldad den futuro. Ta asina inepto nos gobiernonan ta cu nan no por cambia nada, o mester supone cu nan no kier cambia nada?