ORANJESTAD – Arte Sano Foundation ta un fundacion cu a nace na aña 2012 di parti di Claudia Nooren Ruiz-Vazquez, cu ta su fundado y director creativo.
Durante un entrevista cu Bon Dia Aruba a haci cu Ruiz-Vazquez, el a splica cu e no a nace na Aruba, pero e ta Arubiano di curason y su pasion ta e hende cu ta den riesgo. El a comenta cu e fundacion ta traha cu un grupo di persona cu ta den ultimo fase di nan bida y nan mester di un segundo oportunidad.
E grupo di e fundacion ta conforma di hobennan cu ta den prizon, hende cu ta den rehabilitacion di droga, e fundacion ta bay pa e centronan y traha cu hende cu ta den curatela, manera Ruiz-Vazquez a bisa, e ‘dobel trouble’ tin problemanan psikiatrico y adiccion hunto. Tambe a indica cu den e grupo ey ta inclui e personanan cu ta adicto ambulatorio, loke e comunidad ta yama eroneamente como ‘Choller’.
Ruiz-Vazquez a splica cu aworaki Arte Sano Foundation tin e obhetivo di tambe incorpora den su fundacion e muhenan den prizon. El a bisa cu e fundacion ta haci entrenamento vocacional specificamente na industrianan creativo, nan ta ofrece tayernan di pintura y otro materialnan.
E mision di e fundacion, manera Ruiz-Vazquez a bisa, ta pa e fundacion crea un economia circular, den e cual Ruiz-Vazquez como director creativo ta duna idea di e diseño y e studiantenan por desaroya su capacidadnan vocacional, cu cual den futuro nan lo por haci souvenirnan, y asina nan lo por sali di su situacion y por bende loke nan ta haci pa nan por converti den empresarionan social.
Arte Sano Foundation ta entrena e studiantenan den e situacion social cu nan tin na e momentonan aki, pa motibo cu nan ta bay pa e luga unda e hendenan cu e problema ta. Por ehempel, nan como fundacion ta drenta den e prizon, y nan ta asisti na e momento ey pa por entrena e studiantenan, y ora nan ta sali for di eynan, nan mes tin otro opcion di bida.
Ruiz-Vazquez a splica cu Aruba ta un isla chikito, e comunidad tin un red den e cual e comunidad mes ta haci escogencia negativo. E fundacion ta un ente positivo cu ta drenta pa crea un red nobo pa e studiantenan por tin un di dos opcion, e hende cu nan tabata conoce prome y e fundacion Arte Sano Foundation.
Tambe el a expresa cu aworaki, e fundacion ta na buskeda di un luga, manera Ruiz-Vazquez a bisa ‘nos no tin un sosten di gobierno y nos ta na buskeda di enlace pa nos lo por haya un luga fiho pa e alumnonan por traha cu nos’. Di mesun manera el a comenta cu e fundacion tin varios institucion cu ta colabora cu nan, asina tambe un empresa priva cu durante tres aña y mey a confia den e fundacion cu aworaki tin un cantidad di 30 alumnonan pa siman. E fundacion tin un vision di ta un centro educativo creativo, manera Ruiz-Vazquez a comenta. Pero e problema cu e alumnonan ta enfrenta, ta cu algun biaha nan ta cay bek den e mundo di adiccion, nan ta drenta na e fundacion y nan ta bolbe sali manera un circulo, pa motibo cu nan no tin suficiente capacidad den area creativo y e opcion unico cu nan tin no ta interesante pa nan.
El a duna como ehempel cu un persona a gradua y a sali for di e mundo di droga, y ora nan ta sali e trabou cu nan por haya ta pa pega bloki bou solo durante henter dia, esey ta algo cu por kita e motivacion. Ruiz-Vazquez a bisa: “Si su pasion ta diferente, un trabou asina ta dificil.” P’esey e fundacion ta encarga di saca e potencial creativo di e persona. E comunidad di Aruba tin basta creatividad, asina Ruiz-Vazquez a expresa. El a splica cu e fundacion ta un grupo chikito pero consolida cu hende cu tin e mesun pasion pa Aruba, su boluntarionan tin hopi amor, compromiso y dedicacion, nan ta stima e studiantenan. “Esaki ta un trabou arduo pero ta hopi gratificante”, specialmente casonan manera Teacher Nitro, kende tabata parti di studiantenan, y despues di tres aña y mey a keda den fundacion pa yuda tur e studiantenan.
Na e fundacion ta duna dignidad pa e studiantenan, pa motibo cu Ruiz-Vazquez a bisa cu “esey ta hopi importante, ya cu despues cu nan ta sali for di prizon of rehabilitacion, nan tin un pasado, un historia y e hendenan di comunidad no mester husga nan”. Ruiz-Vazquez a expresa cu e experiencia cu el a haya ora e ta sali for di prizon despues cu e fundacion ta duna e tayernan pa su studiantenan, el a bisa cu ta ‘un experiencia impresionante’, pa motibo cu tur e miembronan di e fundacion ta sali feliz, pa motibo cu ‘e hobennan tabata nos pasion, pero nos a wak cu tabatin hende cu mas edad cu tambe a ser afecta pa via di droganan of otro problemanan, cu tin mas necesidad cu e hobennan’.
