Nos ta bolbe considera un refineria…?

Durante e ultimo añanan a haci hopi intento pa haya un otro operador pa e refineria na San Nicolas. Esey no a logra. No cu no tabatin pretendiente. Na inicio ainda nos tabata haya e bonnan: Petrobras, PetroChina, a sondea posibilidad na Colombia cu EcoPetrol, sin resultado. Despues naturalmente nos ta haya e aventureronan, e companianan cu no ta pertenece na e grupo di compania di renombre internacional, cu ta di confia y cu, importante, por garantisa pa nan mes un fluho constante di crudo pa por traha cune. No tabatin interes; esey caba ta un señal bon cla, pero no ta tur hende ta capta esey.

Despues a bin e aventureronan; nos no ta ni bay den detaye ken nan tabata, no mester perde tempo cu e tipo di hende aki. Nan no ta bin aki so, nan ta bay otro islanan tambe cu storia bunita, pero al fin y al cabo, nan no por produci e recurso y conocemento necesario pa ta competitivo den e sector aki. Asina Bon Dia Aruba a yega di publica e noticia di un consorcio cu lo a construi un refineria ‘brandnew’ na Bahamas, pa mas di 5 biyon dollar. Anto esey den un epoca unda aki aya sa construi refineria nobo, na henter mundo… Nos ta un par di aña mas leu y no a tende nada mas di e aventureronan aki, cu ademas a resulta di no tin ningun experiencia den sikiera cumpra crudo, y mucho menos di refineria.

Despues di tur esaki, gobierno anterior a logra e ‘deal di siglo’ pa Aruba: e actual proyecto di Citgo. Nos tur sa cu el a fracasa, pero ta bon pa bay den pasado, y revisa e argumentonan usa e tempo ey. Nos mester por corda cu a bisa bon cla cu no por considera e refineria mas como refineria, asina ey e no tin futuro, pero… como ‘upgrader’ si. A base di esey a firma e contract cu e gobierno dictatorial di Maduro, pa duna tal uzo na e instalacionnan. Pero den e mesun tempo ey otro hende na Aruba interesa si berdaderamente no por opera e refineria mas como refineria, a busca e experto Nelson English pa studia e caso y duna su opinion. El a haci esey, a duna un bon presentacion unda el a duna bon cla e realismo cu mester tin den e tipo di caso aki. Na prome luga el a calcula e rehabilitacion di e refineria te na e punto cu e ta produci atrobe loke e tabata produci dia Valero a cera porta, na un 2,1 biyon dollar. Esey pa un planta cu no ta produci producto final, sino mas bien loke ta yama ‘intermediate feedstocks’. Si lo tabata desea un refineria completo, anto lo mester a pone un biyon dollar mas riba mesa. Riba tur esaki ta bin naturalmente e pregunta clave: kico esun cu ta pone tur e placa ey riba mesa, ta haya? Un refineria riba un isla, unda mester trece y hiba tur cos, y cu ademas no tin acceso na gas natural. Pasobra awendia opera un refineria kimando fuel oil ta casi imposibel pa haci esey na un manera competitivo. Y ainda no a contesta e pregunta di unda e crudo mester bin pa traha cune. Un di e problemanan grandi cu Valero tabatin tabata e suministro na tempo di un refineria asina aleha di nan otro negoshinan. Asina nos por cuminsa comprende cu un futuro como refineria ta ‘gepasseerd station’.

Ta yega na e opcion di un ‘upgrader’. E unico pais den nos region cu crudo cu tin mester di mehoracion prome cu bende, ta Venezuela. Gobierno mes ta conclui e proyecto aki, observando cu e no ta bay ningun caminda. Hasta nos por lesa recientemente, y awe tambe den e edicion aki, cu e situacion na Venezuela, den su sector petrolero ta asina grave cu e upgradernan aya no ta opera como tal mas, sino mas bien ta funciona como planta pa mezcla crudo pisa di Orinoco cu crudo mas liviano pa haya un mix cu tin mercado. Lo bay dura hopi aña prome cu Venezuela su produccion bin riba pia atrobe. Esey ta implica cu nos no tin nada di haci cu Venezuela mas? Sigur si e pais ey bolbe na un gobernacion normal, tin cos di papia. Nan no mester un refineria pero pa hopi aña nan lo no tin suficiente capacidad di almacenahe. Ta pesey nan tabata haci uso di e servicio di e islanan Hulandes: Curaçao, St Eustatius, Bonaire, y Aruba, pa loke ta transshipment di crudo y producto petrolero. Dia nan industria bolbe riba pia, ainda nan no lo tin capacidad portuario y di almacenahe pa maneha nan exportacion.

Ademas di por keda un hub pa crudo, ta recomendable pa contempla e posibilidadnan di un hub pa transshipment di container, no na Barcadera cu no ta apto, sino na San Nicolas. Nos tin ey un di e miho facilidadnan portuario den nos region y cerca di canal di Panama. Y nos no a menciona e otro alternativanan cu tin pa e tereno di e refineria. Nos ta kere cu gobierno por bien salta e fase dos di nan plan y move di biaha pa fase 3. A perde hopi tempo caba.