Directora di Departamento di Asuntonan Social (DSZ) Glenda Hernandez a trata e siman aki den un conferencia di prensa problema di pobresa den comunidad cu por tin efecto riba casonan di abuso domestico y violencia. Aunke e problemanan social aki no ta specificamente tocante vivienda esaki por hunga un rol grandi segun e directora.
Despues di diferente reunion yama pa gobierno e siman aki relaciona cu e casonan di abuso di mucha grave, por a mira mas movecion y interes pa mas structura y colaboracion bin den henter cadena social. Manera nos a publica ayera, gobierno ta trahando riba un plan multi disciplinario pa ataca e problemanan social cu pa basta tempo ta causa daño den comunidad. Tambe nan lo bin cu un programa di conscientisacion na scolnan y amplia conocemento y minimalisa burocracia di leerplicht. E plannan aki ta refleha e complehidad di e problemanan social: falta di fondo y personal den cadena social, falta di conscientisacion riba topiconan manera salud mental, un situacion di taboe rond henter e topico y no por lubida tampoco cu comunidad mes mester aporta na esaki por ehempel pa atende charlanan di conscientisacion.
Aunke e plannan ta na nan luga nos por mira cu tin un topico cu ainda a keda taboe mey mey di tur e conferencianan cu a wordo organisa pa gobierno riba e topico aki: pobresa. E topico aki pa algun tempo no ta wordo discuti tanto den boca di gobernantenan como den medionan di comunicacion. Te hasta ora e topico haya atencion rapidamente esaki ta wordo lubida.
Sinembargo recien den un conferencia di prensa yama pa minister di Asuntonan Social Glenbert Croes hunto cu diferente instancianan no-gubernamental (NGO’s) directora di Departamento di Asuntonan Social Glenda Hernandez a trece e punto di pobresa dilanti. E director a refleha bek na e caso di mayornan di ambos mucha cu a fayece, cual pa algun tempo tabata conoci cerca e departamento. “Ora un mucha ta maltrata den famia mescos cu ora bo ta papia di alcoholico, e mucha mañan ta bira e abusado. E mama den e caso aki tambe ta un victima di e violencia inter generacion cu ta anda den famia.”
Riba medionan social por a mira hende cu te hasta ta comenta cu rabia contra e mayornan cu a hunga un rol den e fayecimento di e dos criaturanan. Aunke e rabia ta hustifica e punto cu nos a trece dilanti caba ta cu no mester keda ciego na e echo cu e problema ta uno compleho y ta envolve varios aspecto. “Stress den famia pa wanta liña na awa por crea espacio pa tur tipo di violencia den famia. Esaki ta parti di e grupo di hende cu nos conoce cu tin riesgo halto pa ta victima di abuso y violencia. Nos ta lubida cu nos ta bibando na un Aruba cu tin hopi stress financiero. Si bo ta wak e costo di bida pa sobrevivi pa hopi hende ta exigi hopi sacrificio.”
Noodwoning
Aunke pa hopi tempo e casonan aki ta conoci pa e departamento, ‘nos no a spera cu e lo bira asina alarmante asina lihe’. Algo cu mester tene cuenta cu ne segun e directora ta cu e poblacion a redobla. Sinembargo ‘e esfuersonan pa yuda cu problemanan no a redobla’.
Hopi biaha ora mester saca un persona for di un situacion dificil na cas e ta bira un problema pa e departamento segun e director pasobra no tin luga unda pa pone personanan aki den dje temporalmente. Tin instancia cu ta ofrece luga pa diferente tipo di hende manera: Casa Cuna cual ta pa mucha te 6 aña di edad, Fundacion pa Hende Muhe den Dificultad, Imelda Hof cual ta pa mucha te 12 aña y Orthopedagogisch Centrum cual ta pa mucha te 16 aña.
Ademas di esaki tin noodwoning disponibel na Cruz Cora pero actualmente tin 9 refugiado cu ta kedando den e noodwoning, segun e director. “Normalmente nos ta paga pa hende keda na Cruz Cora su noodwoning. Actualmente nos ta simplemente busca hotelnan cu ta barata pa pone hende aden.” Sinembargo tin un listanan largo di espera pa por haya luga cerca un di e instancianan pa via di nan luganan limita. E punto sra. Hernandez ta trece dilanti ta cu no tin suficiente luga y e casonan ta keda bira mas. Antes tabatin vivienda disponibel na Savaneta y Jaburibari pa noodwoning pero ‘na Jaburibari esaki a wordo converti den cas pa hende grandi’. Aunke e punto di vivienda social y noodwoning a wordo poni como prioridad den plan di gobernacion di gabinete nobo, sra. Hernandez no ta wak cu ‘no tin desaroyo. Mi no ta wak movemento riba e punto aki’.
Pues actualmente pa via di e situacion aki sra. Hernandez su hendenan di guia social den e departamento tin cu bay busca tur caminda, entre otro den corant y Vraag & Aanbod(Facebook) pa asina haya luga pa hende por keda. Aunke e problemanan social aki no ta specificamente trata di vivienda, sra. Hernandez a conclui cu pa por saca un persona for di situacion alarmante unda e no ta sinti su mes, sigur mester tin un otro luga disponibel.
